Perezida Kagame yagiranye ibiganiro na Cyril Ramaphosa watangiye inshingano zo kuyobora AU

Yanditswe na IGIHE
Kuya 8 Gashyantare 2020 saa 01:12
Yasuwe :
0 0

Perezida Paul Kagame kuri uyu wa Gatandatu yagiranye ibiganiro na mugenzi we wa Afurika y’Epfo, Cyril Ramaphosa watangiye inshingano zo kuyobora Umuryango wa Afurika Yunze Ubumwe, AU.

Perezida Kagame ari i Addis Ababa muri Ethiopia aho yitabiriye inama ya 33 isanzwe ya AU, yiga ku guhagarika intambara ku Mugabane wa Afurika nk’uburyo bwo guharurira inzira iterambere umugabane wifuza. Ifite insanganyamatsiko igira iti “Gucecekesha imbunda: Guharurira amayira iterambere rya Afurika”.

U Rwanda na Afurika y’Epfo bisanganywe umubano mwiza ndetse icyo gihugu giheruka kugena Ambasaderi mushya wacyo mu Rwanda, nyuma y’umwaka nta ambasaderi urasimbura George Nkosinati Twala.

Mu Ukuboza 2018 nibwo uwari Ambasaderi wa Afurika y’Epfo mu Rwanda, George Nkosinati Twala yahamagajwe i Pretoria, nyuma y’uko manda ye yari yararangiye.

Icyo gihe hari hashize iminsi hari umwuka mubi wakuruwe n’ibitutsi bivugwa ko byatutswe uwari Minisitiri w’Ububanyi n’Amahanga wa Afurika y’Epfo, Lindiwe Sisulu, biturutse mu Rwanda.

Ibihugu byombi byamaze kwemeranya kuri ambasaderi byavuzwe ko ari Mandisi Mpahlwa w’imyaka 60, usanzwe ari Ambasaderi wa Afurika y’Epfo muri Mozambique, uzarangiza manda ye muri uyu mwaka.

Yigeze kuba Minisitiri w’Ubucuruzi, anakora mu yindi myanya muri Guverinoma ya Afurika y’Epfo guhera mu 2004.

Umunyamabanga wa Leta muri Minisiteri y’Ububanyi n’amahanga, Nduhungirehe Olivier, aheruka kuvuga ko umubano w’u Rwanda na Afurika y’Epfo umeze neza, ndetse ngo n’ibibazo bihari bari kubikemura.

Yagize ati “Umubano wacu na Afurika y’Epfo ni mwiza. Twagize ibibazo mu minsi yashize ariko turi gukorana ngo tubikemure. Ambasaderi wacu mushya muri Afurika y’Epfo yakiriwe neza i Pretoria, na ambasaderi wabo mu Rwanda yeremewe.”

Nduhungirehe yavuze ko bari no gukemura ibindi bibazo biri hagati y’ibihugu byombi.

Mu Ukwakira 2019, Perezida Paul Kagame yakiriye Jeff Radebe, Intumwa yihariye ya Perezida wa Afurika y’Epfo, Cyril Ramaphosa. Nyuma y’aho abakuru b’ibihugu byombi Kagame na Ramaphosa bahuriye i Sochi mu Burusiya bagirana ibiganiro aho bari bitabiriye inama ihuza u Burusiya na Afurika.

Muri Nyakanga 2019, u Rwanda rwasimbuje uwari Ambasaderi warwo muri Afurika y’Epfo, Vincent Karega wari uhamaze imyaka umunani, asimburwa na Ambasaderi mushya, Eugène Kayihura.

Nubwo umubano w’u Rwanda na Afurika y’Epfo ugenda ugarura isura, hari ibitaranoga, cyane cyane ko Afurika y’Epfo icumbikiye Kayumba Nyamwasa ukuriye RNC n’Umutwe w’abarwanyi wa P5, uhuriweho n’amashyaka atanu arwanya Leta y’u Rwanda.

Uyu mutwe wakomeje gutegura ibikorwa bigamije guhungabanya umutekano w’u Rwanda no kugirira nabi ubutegetsi buriho ndetse bamwe mu bari bawugize barimo umuyobozi wabo Rtd Major Mudathiru Habib, barimo kuburanishwa n’inkiko za gisirikare mu Rwanda, nyuma yo gufatwa n’ingabo za RDC, abandi bakishyikiriza MONUSCO.

Kugeza ubu kandi Abanyarwanda bakomeje kugorwa no kubona viza zo kwerekeza muri Afurika y’Epfo, ikibazo Perezida w’icyo gihugu, Cyril Ramaphosa aheruka kuvuga ko kigiye gukemurwa, ariko imyaka igiye kuba ibiri bitarashoboka.

Perezida Kagame yagiranye ibiganiro na Cyril Ramaphosa kuri uyu wa Gatandatu
Umubano w'u Rwanda na Afurika y'Epfo ukomeje kuzahurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza