Igihembo cya ‘GIFA D’OR 2024’ cyatanzwe ku nshuro ya 15, cyahawe PDG Brenda Thandi nk’Umunyafurika ukomeje gukora ibikorwa by’indashyikirwa.

Ibihembo bya GIFA d’OR bihabwa abashoramari, ba rwiyemezamirimo n’abantu bahanze udushya, bagejeje iterambere ku Banyafurika barimo abatuye ku Mugabane wa Afurika cyangwa se ababa i Burayi.

PDG Brenda Thandi Mbatha watangiye ubucuruzi akiri muto kandi akaba yarakuriye mu buzima bugoye, ubwo yakiraga iki gihembo, yashishikarije urubyiruko by’umwihariko abari n’abategarugori gukomeza kwiteza imbere.

Yavuze ko iyo umuntu akoze cyane agera ku nzozi ze nk’uko na we ari gukabya inzozi nk’umushoramari ukomeye i Burayi.

Ati “Ndashishikariza by’umwihariko urubyiruko, nibanda cyane cyane ku bari n’abategarugori. Ndabifuriza ishya n’ihirwe, mbakangurira gukora kugira ngo mwiteze imbere, mutinyuke akazi, mwihangire imirimo mugane ubucuruzi, mugerageze guhanga udushya, mukore cyane mwiteze imbere kuko iyo ufite intego nziza inzozi zawe uzigeraho.”

PDG Brenda Thandi w’imyaka 45, yavuze ko mu myaka irenga 25 amaze akora ubucuruzi, icyatumye akomera akagera aho ageze ari ukudacika intege.

Uyu mugore ubusanzwe utuye ku Mugabane w’u Burayi mu Bufaransa, mu Mujyi wa Paris, ahamya ko umwaka wa 2024 wamugendekeye neza cyane ndetse akaba ari byo byatumye yegukana igihembo cy’umushoramari, akaba na rwiyemezamirimo wa mbere mu bihembo bya GIFA D’OR.

Thandi yagiye aba hafi abahanzi batandukanye bakomeye mu Rwanda ndetse Bruce Melodie yamuririmbiye indirimbo yise “Brenda”, agaragaza ko ari umugore w’icyitegererezo.

Ubu abana na Hardy Conaté ukomoka muri Mali, ndetse ubwo yahabwaga igihembo bari kumwe.

Umva “Brenda”; indirimbo Bruce Melodie yaririmbiye Brenda Thandi

Uyu mugore nyuma yo kwegukana iki gihembo yafatanye ifoto n'inshuti ze

PDG Brenda yagiranye ikiganiro n’abanyamakuru nyuma yo kwegukana igihembo

PDG Brenda Thandi Mbatha yavuzwe cyane mu Rwanda mu bikorwa by'ishoramari mu myidagaduro mu myaka yashize

PDG Brenda Thandi ntabwo yaherukaga kuvugwa mu itangazamakuru mu Rwanda

Akanyamuneza kari kose kuri PDG Brenda Thandi wa gatatu uturutse ibumoso. Uyu mugore yari yaserukanye na Fiancé we Hardy Conaté ukomoka muri Mali, uri ibumoso bwe