Niyitegeka Félicité, uri mu ntwari z’igihugu yahimbiwe indirimbo

Yanditswe na Uwiduhaye Theos
Kuya 26 Mutarama 2021 saa 10:47
Yasuwe :
0 0

Hakozwe indirimbo yakomowe ku gitabo cyanditswe na Padiri Dusengumuremyi Jean D’Amour mu 2011 yise “Niyitegeka Felisita abamuzi baramuvuga koko ni intwari.”

Iyi ndirimbo ni incamake y’iki gitabo kivuga ku mateka y’ubuzima bw’Intwari Niyitegeka Félicité wishwe muri Jenoside yakorewe Abatutsi mu Rwanda mu 1994, azira guhisha no kurokora bamwe mu bahigwaga.

Iyi ndirimbo yise ‘Uwahiriwe’ yahimbwe na Iyambonye Arcade abisabwe na Padiri Jean d’Amour nyuma yo gusoma no kwicengezamo ayo mateka ya Niyitegeka Félicité kuva avutse kugera yishwe. Si indirimbo y’amaganya ahubwo irata ubutwari bwamuranze.

Iyi ndirimbo yayihimbiye mu Nyakibanda muri Werurwe 2013, ayiririmba bwa mbere muri Kanama 2013, yongeye gusubirwamo muri Nyakanga 2020 ikorerwa amashusho inandikwa ku buryo bw’amanota.

Iyambonye Arcade wayihimbye ni umwe mu bagize urunana rw’incuti za Niyitegeka Félicité ni n’umuririmbyi n’umunyamuziki muri Chorale Christus Regnat yo muri paruwasi Regina Pacis.

Iyambonye Arcade yabwiye IGIHE ko kuba yarapfuye azira guhisha abari bamuhungiyeho, atari ibintu byari bimugwiririye ahubwo yari asanganywe umutima wo kwitanga.

Ati “Niyitegeka Félicité yapfuye nk’intwari azira gushaka gukiza abari bamuhungiyeho. Ntibyamugwiririye ku buryo hari abatekereza ko byabaye nk impanuka ahubwo impuhwe, urukundo no kwita ku bari mu kaga ni umuco yatojwe kuva mu buto bwe arabikurana.”

Arakomeza ati “Ni yo mpamvu tutavuze iby’urupfu rwe gusa ahubwo twamuvuze duhereye ku ivuka rye kuko ubuzima bwe bwasigiraga isomo uwo bahuraga wese ku buryo ubu n’ubu. Ni yo mpamvu ubutumwa bw’indirimbo ari ukugaragaza uburyo Imana yamuteguye akivuka noneho abifashijwemo n’ababyeyi be agahabwa uburere bwa gikirisitu bumufasha kubera ingenzi abo yabanye na bo bose kugeza n’ubwo yishwe azira kugira neza.”

Ubutwari bwa Niyitegeka Félicité bwahawe agaciro na Leta y’u Rwanda mu Nama y’Abaminisitiri yo ku wa 12 Nzeri 2001 yemeje ko Niyitegeka Félicité ari mu Ntwari z’Igihugu, mu cyiciro cy’Imena. Iki cyemezo cyashimangiwe n’Iteka rya Perezida Nº 18/01 ryo kuwa 26 Gashyantare 2013 ryemeza abagizwe Intwari z’Igihugu.

Niyitegeka Félicité ari mu cyiciro cy’Imena hamwe n’izindi Ntwari: Umwami Mutara III Rudahigwa Chearles Léon Pierre, Uwiringiyimana Agathe, Rwagasana Michel n’Abanyeshuri b’i Nyange bigaga mu mwaka wa gatanu bagera kuri makumyabiri n’icyenda (29) n’abigaga mu wa gatandatu bagera kuri cumi n’umunani (18).

Ibikorwa by'ubwitange bya Niyitegeka Félicité byatumye ashyirwa mu ntwari z'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .