00:00:00 IGIHE NETWORK KN KINYARWANDA EN ENGLISH FR FRANCAIS

Ni iki umuziki nyarwanda uzungukira mu kuba Trace East Africa yashyizeho uyihagarariye mu Rwanda?

Yanditswe na Mahoro Vainqueur
Kuya 13 Mutarama 2023 saa 05:54
Yasuwe :

Ku wa 12 Mutarama nibwo hasakaye inkuru ivuga ko Nduwimana Jean Paul wamenyekanye nka Noopja muri muzika akaba n’umuyobozi wa Country Records yagizwe uhagarariye televiziyo ya Trace East Africa mu Rwanda.

Ni inkuru nziza yageze kuri Noopja ku wa 10 Mutarama 2023 ahabwa uburenganzira bwo guhararira iyi televiziyo ya Trace East Africa ibarizwa mu kigo cya Trace Group.

Mu kiganiro yahaye IGIHE, Nduwimana Jean Paul [Noopja] yavuze ko kuba ahawe uyu mwanya bigiye korohereza abari muruganda rw’imyidagaduro mu Rwanda kumenyekanisha ibikorwa byabo hirya no hino ku Isi binyuze muri iki kigo gishamikiye kuri Trace Group igera mu bihugu bisaga 180.

Yagize ati “Ntabwo ibihangano byabo bizaca kuri Trace East Africa gusa, ni Trace Global kuba mpari nk’umuntu uyihagarariye biraduha amahirwe yo kubona umuntu anyuraho ku buryo biborohereza kugezayo ibihangano byabo.”

“Si Abahanzi gusa abikorera nabo uyu mwanya ntubacike cyane ko ni andi mahirwe yo kwamamaza u Rwanda binyuze mu bikorwa bitandukanye bihakorerwa.”

Trace Group ni ikigo gifite shene za televiziyo zitandukanye zikunzwe na benshi bakunda umuziki umugezweho nka Trace Africa, Trace Muzik, Trace Urban, Trace Gospel, Trace Hits n’izindi.

Noopja avuga ko umuhanzi azajya ahitamo aho ashaka ko ibihangano bye bica cyangwa se mu biganiro bitewe n’uko abyifuza.

Ati “Umuhanzi buriya ahitamo ikiganiro cyangwa aho ashaka ko indirimbo ze zica abahanzi benshi barabikora bitewe n’isoko ashaka mu gihe runaka.”

“Niba ushaka kuba umaze kumenyekana muri Afurika y’Uburasiraziba , Afurika, u Burayi cyangwa ahandi ibi babigufashamo gusa mbere byari bigoye cyane kubono aho ubinyuza ubu rero bigiye koroha.”

Iyi n’indi ntambwe nziza yo kugeza ibihangano by’abanyarwanda ku rundi rwego dore ko mu myaka yashize kubona umuziki wo mu Rwanda ukinwa kuri shene za televiziyo mpuzamahanga byafatwaga nk’inkuru ikomeye cyane.

Kuri ubu kubera iterambere ry’umuziki ibihangano byabo bisigaye binyuzwa kuri shene zitandukanye nubwo bitari ku rwego rwo kwishimira.

Trace Group yashinzwe mu 2003 ni ikigo kigari cy’imyidagaduro ku Isi gifite amashami atandukanye hirya no hino ku Isi muri Afurika, u Bufaransa, u Bwongereza, Leta Zunze Ubumwe za Amerika, Canada,Brazil, muri Caraïbes no mu bihugu biri mu nyanja y’Abahinde

Iki kigo gifite abagikurikira barenga miliyoni 350 bari mu bihugu 180 na shene za televiziyo zisaga 29, amaradiyo arenga 100 n’ababakurikira ku mbuga nkoranyamabaga barenga miliyoni 22.

Trace East Africa ni ishami ry’iki kigo rikurikirana ibikorwa bya muzika bibera mu karere ka Afurika y’Uburasirazuba aho u Rwanda ruherereye.

Iyi televiziyo Trace East Africa ifite icyicaro i Westlands mu mujyi wa Nairobi muri Kenya, yafunguye na radiyo bise Trace Radio mu 2019 nayo ikorera muri iki gihugu.

Ibi byakozwe mu rwego rwo kwegera abari mu ruganda rw’imyidagaduro bakoresha ururimi rw’igiswayile n’icyongereza bari muri aka akarere bafashwe kumenyekanisha ibikorwa byabo hirya no hino ku Isi binyuze muri iki kigo.

Tariki 21 Werurwe 2022, ubuyobozi bwa BK Arena bwakiriye itsinda ryari riyobowe n’uwatangije akaba n’Umuyobozi mukuru wa Trace Group, Olivier Laouchez.

Bimwe mu byao baganiriyeho harimo ko u Rwanda rwazakira itangwa ry’ibihembo bya Trace Africa Music Awards, igikorwa giteganyijwe mu mpera Werurwe 2023.

Noopja wahawe inshingano zo guhagararira Trace East Africa mu Rwanda yamenyekanye mu myidagaduro yo mu Rwanda ubwo yakoraga indirimbo yitwa ‘Urabeho ndagiye’ yavugaga ku musore wanduye Sida ari gusezera ku nshuti ze kubera ubwo burwayi.

Nyuma yaje gusubika umuziki ariko aguma kugaragara mu bikorwa by’imyidagaduro ndetse akaba yarashinze studio itunganya umuziki Country Records iri mu zikunzwe muri iki gihe.

Uretse umushinga wa Studio Noopja yaje gushinga na radiyo yitwa Country FM ikorera mu karere ka Rusizi mu ntara y’Uburengerazuba aho avuka.

Noopja yahawe inshingano zo guhagararira Trace East Africa mu Rwanda asanzwe ari umuyobozi wa studio ya Country Records ifite na Radiyo ya Country FM
Nduwimana Jean Paul [Noopja] yahawe inshingano zo guhagararira Trace East Africa mu Rwanda
Umuyobozi mukuru wa Trace Group, Olivier Laouchez aheruka gusura inyubako ya BK Arena ku wa 21 Werurwe 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .