00:00:00 IGIHE NETWORK KN KINYARWANDA EN ENGLISH FR FRANCAIS

Netflix yahagaritse abakozi 300

Yanditswe na IGIHE
Kuya 24 June 2022 saa 08:09
Yasuwe :

Ikigo gikwirakwiza amashusho cya Netflix cyahagaritse abakozi 300, mu gihe gikomeje kunyura mu bihe bitoroshye by’ubukungu.

Umuvugizi wa Netflix yabwiye CNN kuri uyu wa Kane ko bakoze impinduka mu miterere y’imirimo, mu gihe bakomeje kongera ishoramari ngo bahuze ikiguzi basabwa "n’izamuka riri hasi ry’amafaranga yinjira."

Yakomeje ati "Twishimiye ibintu byose bakoreye Netflix kandi turimo gukora ibishoboka byose ngo tubafashe muri ibi bihe bigoye by’impinduka."

Impinduka zakozwe kuri uyu wa Kane zingana no guhagarika 3% by’abakozi bose ba Netflix, bagera ku 11.000 bafite akazi gahoraho.

Umubare munini w’abakozi bahagaritse bakoreraga muri Leta Zunze Ubumwe za Amerika.

Muri Mata Netflix yatangaje ko yatakaje abafatabuguzi benshi ku nshuro ya mbere mu myaka isaga cumi ishize.

Ni ibintu byateye amakenga, bituma abashoramari btangira kwitandukanya n’iki kigo cyari kimaze igihe gihagaze neza.

Nibura agaciro k’imigabane yacyo ku isoko kamaze kugabanukaho 70% muri uyu mwaka.

Mu kwezi gushize nabwo Netflix yahagaritse abakozi 150, ivuga ko bishingiye ku mafaranga make arimo kwinjira.

Iki kigo kimaze igihe kigerageza kwisuganya ngo kirebe uko cyasubira ku murongo ngo kirusheho guha serivisi abafatabuguzi miliyoni 221,6 gifite.

Bumwe mu buryo cyahise gishyiraho harimo koroshya uburyo ibigo bishobora kwamamaza ku rubuga rwacyo ku mafaranga makeya no kugabanya uburyo umuntu wafashe ifatabuguzi asangiza abandi umubare w’ibanga, ku buryo ifatabuguzi rye rikoreshwa n’abantu benshi.

Netflix ikomeje kunyura mu bihe bitoroshye by'ubukungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .