00:00:00 IGIHE NETWORK KN KINYARWANDA EN ENGLISH FR FRANCAIS

Netflix ikomeje gukomanyiriza Will Smith

Yanditswe na Uwiduhaye Theos
Kuya 23 April 2022 saa 09:57
Yasuwe :

Urubuga rwa Netflix ruzwiho gutunganya filime no kuzerekana, rwahagaritse umushinga wa filime ya kabiri rwari rufitanye na Will Smith kubera imyitwarire yagaragaje akubita Chris Rock.

Ikinyamakuru The Bloomberg cyatangaje ko filime yitwa “Bright 2” ya Netflix Will Smith yagombaga kugaragaramo ariko umushinga wayo wabaye usubitswe kugeza igihe kitazwi.

Iki kinyamakuru kigaragaza ko impamvu yabiteye nta yindi byaturutse ku rushyi Will Smith yakubise umunyarwenya Chris Rock mu kwezi kwashize ubwo hatangwaga Oscars.

Ntabwo ari uyu mushinga wonyine wasubitswe kuko n’undi uyu mukinnyi wa filime yari afitanye na National Geographic bise “Pole to Pole” wabaye usubitswe.

Mu minsi yashize nabwo imishinga ya filime Will Smith yari afitanye na Netflix na Sony yose yabaye ihagaritswe kubera imyitwarire aheruka kugaragaza.

Netflix yahagaritse umushinga wa filime yise “Fast and Loose” Will Smith yari kugaragaramo, ndetse ntabwo biramenyekana igihe izasubukurira umushinga wayo cyangwa niba iteganya gushaka undi uzamusimbura agakina igice ‘role’ yari afitemo.

Sony yo yahisemo gusubika umushinga wa “Bad Boys 4” nayo uyu mugabo yari kugaragaramo. Izi sosiyete zose zafashe iyi myanzuro nyuma yaho Will Smith arwanye mu itangwa ry’ibihembo bya Oscars.

Will Smith aheruka gushyira hanze itangazo avuga ko yikuye mu banyamuryango ba Academy of Motion Picture Arts and Sciences itanga ibihembo bya Oscars kubera imyitwarire mibi yagaragaje.

Will Smith yasohoye iri tangazo nyuma y’irindi yari yanditse asaba imbabazi Chris Rock yakubise.

Mu ijoro rya tariki 27 Werurwe 2022, ubwo hatangwaga ibihembo bya Oscars ku nshuro ya 94, ni bwo Will Smith yakubise urushyi umunyarwenya Chris Rock wari uyoboye ibirori amuziza amagambo asesereza umugore we Jada Pinkett Smith ajyanye no kutagira umusatsi yavuze.

Jada Pinkett Smith asanganywe indwara ituma atakaza umusatsi ku mutwe izwi nka ‘Alopecia areata’.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .