Ndi nk’umutetsi uhazwa n’umwuka! Yvan Buravan wubaka urukundo rwa benshi iwe byaranze

Yanditswe na Nsengiyumva Emmy
Kuya 8 Werurwe 2021 saa 08:57
Yasuwe :
0 0

Nyuma yo gusohora indirimbo nshya yise ‘Supernatural’ igaruka ku nkuru y’umusore waryohewe n’urukundo rw’inkumi bakundana, Yvan Buravan yasubije abakunze kwibaza impamvu yubaka iz’abandi nyamara nta marenga y’uko iwe bihagaze neza.

Yvan Buravan yabwiye IGIHE ko ari indirimbo yakoze igaruka ku musore waryohewe n’urukundo yahawe n’inkumi.

Uyu muhanzi ukunda gukora indirimbo zubaka urukundo rw’abatari bake, nta na rimwe aragaragaza ko yaba afite umukunzi umutera kubona inganzo.

Asubiza abibaza ku rukundo rwe, Yvan Buravan yagize ati “Njye meze nk’umutetsi uhazwa n’umwuka w’ibiryo, burya abantu bateka nubwo babizana tukarya bikatugirira akamaro, hari igihe batabasha kuryaho kuko bahagishijwe n’umwuka.”

Yvan Buravan avuga ko ikintu kimushimisha bikomeye, ari ukumva indirimbo ye hari umusanzu yatanze mu mibanire y’abakundana cyangwa hari urukundo rw’abantu yubatse.

Ati “Si ngombwa ko naba mfite umukunzi, njye ikintu kinshimisha bikomeye ni ukumva ko indirimbo yanjye hari urukundo rw’abantu yubatse cyangwa yafashije.”

Uyu muhanzi asohoye indirimbo ‘Supernatural’ nyuma y’iminsi mike asohoreye rimwe izindi eshatu yakoranye n’abahanzi b’abanyamahanga.

Yvan Buravan yari aherutse gusohorera rimwe ni ‘Tulale’ yakoranye n’umuhanzi wo muri Repubulika Iharanira Demokarasi ya Congo; Gaz Mawete, ‘Toté’ yasubiranyemo na Dream Boyz, itsinda rikomeye mu muziki wa Angola na ‘Si belle’ yakoranye na A Pass yo muri Uganda.

Iyi ndirimbo yabaye iya kane yasohoye itari kuri album ye ya kabiri ateganya gusohora mu mpera z’uyu mwaka hatagize igihinduka.

Ubuyobozi bwa New Level bwatangaje ko igihe icyo cyose icyorezo cya COVID-19 kizatangira agahenge bazasubukura Yvan Buravan agataramira abakunzi be abamurikira album ye nshya.

Yvan Buravan avuga ko ikintu kimushimisha bikomeye, ari ukumva indirimbo ye hari umusanzu yatanze mu mibanire y’abakundana cyangwa hari urukundo rw’abantu yubatse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .