Inkuru y’urukundo rwa Iyakare na Nyirandayishimiye bahujwe no gucuranga igisope mu kabari

Yanditswe na Nsengiyumva Emmy
Kuya 7 Kamena 2020 saa 08:07
Yasuwe :
0 0

Abakunda kunywera mu tubari dutandukanye mu mujyi wa Kigali bazi itsinda ry’abacuranzi b’umuziki w’Igisope bitwa “His voice band”. Ni itsinda rikomeje kwamamara kuko hejuru yo gucuranga mu tubari, banacuranga mu birori bitandukanye nk’ubukwe n’ahandi.

Iri tsinda abarizi bakunze kubonamo umugabo w’ibigango ufite igikara gisa neza n’umusatsi mwinshi uzi gucuranga ibikoresho hafi ya byose bya muzika akagerekaho no kuririmba. Uyu mugabo aririmbana n’umugore we ufite ijwi ryihariye akanagira ubuhanga mu gucuranga gitari.

Uwo mugabo yitwa Iyakare Wenceslas [Rickson] akaba umuyobozi wanashinze iri tsinda, ribarizwamo n’umugore we Consolée Nyirandashimye.

Bamaze imyaka ibiri babana nk’umugore n’umugabo ndetse banamaze kwibaruka imfura z’impanga.

Mu kiganiro na IGIHE, Iyakare yavuze ko ahura bwa mbere n’umugore we byari mu 2018 ubwo yamusangaga ari gucuranga mu kabari.

Ati “Nari nsanzwe muzi kuri Youtube acuranga inanga, umunsi umwe ari ku wa Gatanu sinari nakoze, nanjye nsohoka nk’abandi basore, icyo gihe aho nari nasohokeye nahasanze umwana w’umukobwa ucuranga neza ngira igitekerezo cyo kumuzana mu itsinda nari mfite.”

Nyuma yo kuzana Nyirandayishimiye mu itsinda rye, hagati ye na Iyakare urukundo rwatangiye kuziramo, birangira biyemeje kubana.

Ati “Hashize nk’amezi atandatu byaje guhinduka bizamo urukundo duhita twiyemeza kubana.”

Nyirandayishimiye avuga ko na we ubwo yageraga mu itsinda rya Iyakare yari yaramaze gufatwa n’ubwiza bw’uwo musore ndetse n’imico ye byatumye birangira bakundanye.

Yaba umugabo cyangwa umugore bemeza ko kuba bakorana bibafasha mu kazi kabo, bakajya inama y’uko bakanoza biboroheye.

Nyirandayishimiye yize umuziki mu ishuri rya muzika rya Nyundo akaba umwe mu mfura zaryo mu gihe Iyakare na we yawize ahantu hatandukanye harimo Kigali Music School no mu mujyi wa Kampala muri Uganda.

Kugeza ubu batunzwe no gukora umuziki ndetse bavuga ko ubuzima bwabo mirongo inani ku ijana babufashwamo n’ibyo bakura mu muziki.

His voice band mu minsi ishize yitabiriye irushanwa ry’amatsinda y’abacuranzi ryateguwe na Marriott Hotel bitwara neza kuko nubwo bategukanye igihembo ariko bari mu bageze mu byiciro bya nyuma.

Ikiganiro n’abagize umuryango utunzwe no gucuranga icyo benshi bita "Igisope"

His voice band ni itsinda ry'abacuranzi bakora umuziki uzwi nk'Igisope
Iyakare Wenceslas [Rickson] ni we washinze iri tsinda rikomeje kwamamara mu mujyi wa Kigali
Consolée Nyirandashimye yahuye na Iyakare nyuma yo gusoza amasomo mu ishuri ry'umuziki ryo ku Nyundo
Muri Kigali Marriott ubwo bari mu irushanwa ry'amatsinda acuranga mu buryo bwa Live
Ku munsi w'ubukwe bwabo, ubwo Nyirandayishimiye yacurangiraga abatumirwa
Iyakare na Nyirandayishimiye bahujwe n'igisope, bashinga itsinda ryagutse rinababera inzira yo gushinga umuryango
Iyakare na Nyirandayishimiye bamaze kwibaruka imfura zabo z'impanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .