Mwiseneza yagarutsweho mu gitaramo cy’urwenya cya Nkusi Arthur

Yanditswe na Muvunyi Arsène
Kuya 7 Mutarama 2019 saa 04:35
Yasuwe :
0 0

Umunyarwenya Nkusi Arthur, yaraye akoze igitaramo cy’urwenya wenyine, yise ‘Shit Happens’ asetsa abantu yifashishije Ingagi, Mwiseneza uhatanira kuba Nyampinga w’u Rwanda n’ibindi.

Iki gitaramo cyabereye muri Kigali Convention Centre, ku mugoroba wo kuri iki cyumweru. Kwinjira byari ubutumire kandi nta munyamakaru cyangwa undi wese wari wemerewe gufata amafoto n’amashusho, kuko bashaka kujya babyicururiza.

Uretse Alex Muhangi wo muri Uganda wahamagaye Nkusi Arthur, nta wundi munyarwenya wigeze yiyerekana.

Mbere y’uko Arthur agera aho aterera urwenya, Muhangi yabanje kunyuzaho urwenya umwanya muto, cyane cyane yibanda ku Rwanda.

Yavuze ku mukobwa uri mu irushanwa rya Nyampinga w’u Rwanda ukomeje kuvugisha benshi, yemeza ubu ikigezweho ari ukureba ubwiza bw’imbere kuruta ubw’inyuma.

Ati “Mugiye kuba nka Uganda, twebwe iwacu twaretse kureba ku bakobwa beza ku isura, ubu tureba ubwiza bw’imbere mu mutima. Na Josiane ni mwiza ku mutima.”

Yagarutse ku bahanzi b’abanyarwanda, avuga indirimbo zabo zishobora kwerekana ubuzima babayemo. Agendeye ku ndirimbo za The Ben asanga ari umusambanyi, naho Bruce Melody we ni umubeshyi.

Nkusi Arthur wari umutaramyi w’imena, yamaze isaha imwe n’iminota 30 atera urwenya adahagaze. Yakoreshaga Icyongereza cyinshi n’Ikinyarwanda gike.

Yakomoje kuri Mwiseneza Josiane avuga ko iyo Filime ya Black Panther ikinirwa mu Rwanda uyu mukobwa yari kuba ari mu bakinnyi b’imena.

Uyu munyarwenya benshi bita Rutura, yavuze ko yavumbuye ibitutsi bijyanye n’iterambere, maze abivuze abantu baraseka bajya hasi.

Ati “Hari ukuntu twiziritse ku Kinyarwanda cya kera! Nk’urugero umuntu akakubwira ngo kavune umuheto. Ubu se ni nde uwufite muri iyi minsi? Dukeneye kuvugurura ururimi rwacu. Ubu ushobora kuvuga ngo gahakingwe (hacking) icyo ni igitutsi gikomeye, iyo baguhakinze baba bakwishe, kabure likes, kabure retweet niko wabaye.”

Yakomoje ku buryo inka zahoze zifite agaciro gakomeye mu muco nyarwanda zigenda zirutishwa ingagi. Ati “Muzagira amazina y’ingagi mu minsi mike, kuko ubu ingagi ziri kugira amazina yanyu.”

Yongeyeho ko mu gihe mu misango y’ubukwe havugwa amazina y’inka mu minsi mike bazajya bavuga amazina y’ingagi, imbyino zishushanya imiterere y’inka zigasimburwa n’izerekana iy’ingagi.

Mu kiganiro yagiranye na IGIHE nyuma y’iki gitaramo, Arthur Nkusi yavuze ko yagiteguye mu rwego rwo kongera gushimisha abakunda urwenya rwe dore ko mu mwaka ushize wa 2018, yagiye aba umuyobozi w’ibirori kuruta uko aba umunyarwenya.

Yagize ati “Umwaka ushize ugiye kureba, ntabwo navuga ko nakoze urwenya cyane kuko nabaga nyoboye ibirori. Nandika utuntu tutarengeje iminota 10, iyo ubikoze igihe kinini, nawe ubwawe ugera aho ukagira ubwoba bw’uko ntawe ugisetsa.”

Ateganya kuzajya akora igitaramo nk’iki rimwe mu mwaka. Mu cyumweru cya nyuma Werurwe 2019 hazaba Seka Fest izamara iminsi itatu, igizwe n’igitaramo cy’urwenya kizabera mu modoka, ikizakorwa n’umunyarwenya w’umunyamahanga utaremezwa n’ikindi kizahuza abanyarwenya batandukanye bo mu Rwanda.

Arthur yabanje aganiriza Alex Muhangi ibyo yari agiye kuvuga
Arthur yamaze isaha n'iminota 30 asetsa abantu
Ibitwenge byari byose
Abanyamakuru Ashanti na Antoinette Niyongira bakwenkwenutse
Igitaramo cya Arthur kitabiriwe n'abantu benshi
Mwiseneza yagarutse mu gitaramo cy'urwenya cya Shit Happens

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza