Mushambokazi witabiriye Miss Rwanda yakorewe ibirori byo gusezera ubukumi (Amafoto)

Yanditswe na Uwiduhaye Theos
Kuya 1 Werurwe 2021 saa 03:04
Yasuwe :
0 0

Mushambokazi Jordan wari mu bakobwa 20 bahataniye ikamba rya Miss Rwanda mu 2018, yakorewe ibirori byo gusezera ku bukumi byitabiriwe n’inshuti ze n’abavandimwe.

Uyu muhango wabaye kuri iki Cyumweru tariki 28 Gashyantare witabiriwe na mugenzi we Mutesi Aisha wabaye nyampinga w’Akarere ka Ruhango mu 2016, akitabira Miss Rwanda mu 2017 akagera mu bakobwa 15 bageze mu cyiciro cya nyuma, murumuna we Mukabashambo Phionah witabiriye Miss Rwanda mu 2020 akaza mu bakobwa batandatu baboneye itike mu Majyaruguru ariko ntabashe kujya mu mwiherero n’abandi.

Uyu muhango wabaye nyuma y’aho tariki 18 Gashyantare 2021, Mushambokazi n’umukunzi we Mbonyumuvunyi Karim bari basezeranye mu mategeko mu Murenge wa Kimihurura mu Mujyi wa Kigali.

Hari nyuma y’aho tariki 30 Mutarama 2021, bari bakoze umuhango wo gusezerana muri Islam uzwi nka Nikkah.

Icyo gihe Mushambokazi yabwiye IGIHE ko bakoze uyu muhango ndetse bagiye gukirikizaho indi itandukanye, ariko byose bakazagenda babikora bitewe n’uko icyorezo cya COVID-19 kizaba kimeze.

Yagize ati “Turi mu bihe bikomeye bya COVID-19, twabaye dusezeranye mu idini kuko aribyo byashobokaga. Ntabwo twahise tubana n’ubwo hari abajya babikora indi mihango igakorwa nyuma. Twe nibafungura tuzakora indi mihango irimo gusezerana mu murenge, gusaba no gukwa n’ibindi birori. Ntabwo nari kugenda iwacu batarantanga ntakitwirukansa.”

Tariki 04 Ukwakira 2020, nibwo Karim yafashe irembo ndetse Mushambokazi yakirwa mu Idini ya Islam bashyigikiwe n’inshuti zabo n’abandi.

Icyo gihe, Mushambokazi yavuze ko uyu musore bamenyanye bagahita bafata umwanzuro wo gukundana.

Ati “Twamenyanye mu 2018, nyuma gato ya Miss Rwanda. Namukundiye ko ari umusore unkunda, w’umukozi kandi ufite gahunda.”

Mushambokazi abajijwe impamvu yahisemo guhindura idini, yavuze ko byatewe n’uko yabonaga umugabo we ashikamye kumurusha.

Uyu mukobwa waniyise akazina ka Rayhan nyuma yo kujya muri Islam, yagize ati “Nari nsanzwe nsengera muri Christian Life Assembly mpitamo guhindura nkajya murye kuko nabonaga ashikamye mu idini. Hari igihe ubona umuntu akurusha gushikama mu idini rye. Ni cyo cyatumye mpitamo kumusanga muri Islam.”

Mushambokazi ari mu bakobwa bakurikirwa cyane kuri Instagram cyane ko abarenga ibihumbi 89, bahoza ijisho ku mafoto y’ikimero akunda gushyiraho.

Mu 2018 yitabiriye Miss Rwanda ahagarariye Intara y’Amajyepfo, abasha kugera muri 20 bitabiriye umwiherero ariko ntiyagira amahirwe yo kugira igihembo na kimwe yegukana.

Mushambokazi aritegura kurushinga
Akanyamuneza kari kose kuri uyu mukobwa
Mushambokazi yakorewe ibirori byo gusezera ku bukumi
Mutesi Aisha ubanza ibumoso ari mu bari bitabiriye uyu muhango
Abavandimwe ba Mushambokazi bari bitabiriye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .