Munyakazi Deo, Angel Umutoni na Eric Soul bagiye gutaramira ku kirwa cya Zanzibar

Yanditswe na Nsengiyumva Emmy
Kuya 12 Gashyantare 2020 saa 04:07
Yasuwe :
0 0

Umukirigitananga Munyakazi Deo, umuraperi Angel Mutoni na Dj Eric Soul bagiye gutaramira muri Zanzibar aho bitabiriye Iserukiramuco rikomeye rya muzika ryitwa Sauti za Busara.

Aba bahanzi bahagurutse ku Kibuga Mpuzamahanga cy’Indege cya Kigali i Kanombe ku wa 9 Gashyantare 2020.

Sauti za Busara bitabiriye iteganyijwe kuba hagati ya tariki 13-16 Gashyantare 2020. Izabera mu Mujyi uzwi nka ‘Mji Mkongwe’ cyangwa Stone Town mu Cyongereza.

Mutoni Angel, Munyakazi Deo na Eric Soul bari kubarizwa ku butaka bwa Zanzibar ku mugoroba wo kuri uyu wa Gatatu bateguye igitaramo kigamije kuzamura umuziki Nyafurika binyuze mu mushinga w’inzu ifasha abahanzi izwi nka Urban Music Label.

Muri iri serukiramuco Uganda ihagarariwe na Okello na Dj Izaya; Tanzania yaserukiwe na Msagasum, Dj Msolopa na Kandolo mu gihe Kenya ibendera ryayo ryazamuwe na Labdi, Dj Mula.

Aba bahanzi bari i Zanzibar kuva ku wa mbere aho bamaze iminsi bitegura igitaramo banumva amahumbezi yo ku Nyanja y’u Buhinde muri iki kirwa gifite ubukungu bushingiye ku bukerarugendo n’amateka yihariye.
Igitaramo gihuriramo abahanzi Nyarwanda cyatewe inkunga n’Ikigo cy’Abadage gishinzwe guteza Imbere Umuco (Goethe Institute) ari nacyo cyagize uruhare mu kubahuza.

Biteganyijwe ko kuri uyu mugoroba bari butaramire mu ishuri ryigisha ibijyanye n’Umuziki (Music Academy Zanzibar) aho berekana ubudasa mu guhuza umuziki gakondo n’ugezweho.

Ni igitaramo kibanziriza Iserukiramuco rikomeye ryitwa Sauti za Busara ribera muri Zanzibar.

Sauti za Busara Festival ni iserukiramuco ngarukamwaka ritegurwa n’Umuryango udaharanira inyungu wa Busara Promotions. Mu minsi ine rimara, rihuriramo abantu batandukanye baturutse ku Isi yose bishimira umuziki w’Abanyafurika baba ku mugabane no hanze yawo.

Munyakazi Deo yabwiye IGIHE ko we na bagenzi be bahuye bagasubiramo inidirimbo bagategura igitaramo cyo kugaragaza umuco gakondo w’u Rwanda n’iterambere rya muzika muri rusange.

Yakomeje ati “Twarahuye dusubiramo indirimbo kandi ubu turiteguye tumeze neza. Turi butarame, ibintu byose biri ku murongo. Turaririmba nk’itsinda gusa.’’

Itsinda rigizwe n’Umukirigitananga Munyakazi Deo, umuraperi Angel Mutoni na Dj Eric soul si ubwa mbere rigiye gutaramira muri Tanzania kuko mu mwaka ushize aba bahanzi baririmbye muri Ongala Music Festival.

Iri serukiramuco ryabaye muri Kanama 2019 ryabereye muri Kaminuza yigisha ibijyanye n’Ubugeni (Chuo cha Sanaa) iri mu Mujyi wa Bagamoyo.

Si ubwa mbere aba uko ari batatu bahagarariye u Rwanda mu maserukiramuco atandukanye kuko bitabiriye irya Ongea Summit ryaberereye muri Kenya, Bayimba International Festival na Doadoa Festival yo muri Uganda.

Reba indirimbo yitwa “Italanto”, Deo Munyakazi aheruka gushyira hanze

Angel Umutoni, Eric Soul na Munyakazi Deo bageze muri Zanzibar
Munyakazi Deo muri Zanzibar

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .