Mukamwiza Yvette yegukanye ikamba rya Miss Career Africa 2019 ahembwa $ 5 000 (Amafoto)

Yanditswe na Uwiduhaye Theos
Kuya 14 Ukuboza 2019 saa 08:34
Yasuwe :
0 0

Mukamwiza Yvette wo mu Rwanda yegukanye $ 5 000 ahigitse abakobwa 29 bahatanaga na we mu irushanwa rya Miss Career Africa 2019, mu cyiciro cy’abakobwa bo mu Biyaga Bigari.

Ku wa 10 Ukuboza 2019 nibwo abakobwa 29 bahataniraga ikamba rya Miss Career Africa, batangiye umwiherero wamaze iminsi itatu, mu Mbuto z’Amahoro Hotel iherereye ku nkengero z’Ikiyaga cya Muhazi.

Mu mwiherero abakobwa 15 nibo batoranyijwe bagaragaza imishinga yabo imbere y’akanama nkemurampaka ka Miss Career Africa 2019, katoyemo ufite umushinga uhiga iyindi.

Saa mbili na 42 abakobwa bose bagiye mu mwiherero bahamagawe biyereka abari bitabiriye iki gikorwa. Hahise hahamagarwa 15 bageze mu cyiciro cya nyuma biyereka abari bateraniye muri iki gikorwa.

Aba bakobwa bageze mu cyiciro cya nyuma barimo; Igihozo Mireille , Munsabe Sheillah, Mukamwiza Yvette, Umutoni Ange, Umuhumuriza Yvonne, Mazimpaka Christelle, Iradukunda Faustine, Muneza Manzi Redempta, Mahoro Mireille Chadia na Uwimana Martine bo mu Rwanda.

Habonimana Hycinthe, Munezero Ornella bo mu Burundi. Fundiko Elysee wo muri RDC, Otiano Josephine wo muri Kenya na Baluubu Jaliyah wo muri Uganda.

Nyuma yo guhamagara aba bakobwa bahise bagenda, Rukotana Victor uri mu bahanzi bagezweho cyane muri iki gihe mu Rwanda, ahabwa umwanya ngo asusurutse abitabiriye.

Uyu muhanzi yanyuze benshi mu ndirimbo zirimo ‘Umubavu’ aheruha gushyira hanze na ‘Warumagaye’ ahita asezera abitabiriye ariko Uncle Austin wari uyoboye amubwira ko agomba kuririmba indi imwe ahita aririmba iyitwa ‘Love’ nayo iri mu ze zikundwa.

Yagarutse abwira abantu ati “Hari akantu nshaka kubaririmbira, ndi umuririmbyi mwiza w’ibi ariko na gakondo ndayizi, hari ibintu byitwa ‘Amararo’ hano nabonyemo ababyeyi reka mbanze mbasogongezeho”.

Yahise ayaririmba arangije ahita akomerezaho n’iyi ndirimbo yari agiye kuririmba yise ‘Love’.

Nyuma abakobwa 15 bageze mu cyiciro cya nyuma bose banyuze imbere y’akanama nkemurampaka buri wese asobanura iby’umushinga we.

Aka kanama nkemurampaka kari gahagarariwe n’umuhanzi Muyombo Thomas [Tom Close], Uwase Hirwa Honorine wamamaye nka Miss Igisabo, Dr. Mercy Ngunjiri, Dr. Rubagumya Fidèle, Dr. Manirakiza Achille, umwanditsi w’ibitabo Karen Bugingo, Umulisa Yvonne na Cheez Muragwa.

Aba bakobwa bamaze kugaca imbere, Bruce Melodie yahise ahamagarwa ku rubyiniro aza kuririmbira abantu bari bitabiriye. Yaririmbye mu buryo bwa live afashijwe n’itsinda rya Symphony rimaze kuba ikimenyabose mu Rwanda.

Uyu muhanzi yatangiriye ku ndirimbo yamamaye cyane yakoranye na Urban Boyz, Riderman n’abandi yitwa ‘Nta Kibazo’ akomereza ku yitwa ‘Twongere’ yakoranye na Queen Cha, ‘Embela Zo’ ye na Sheeba wo muri Uganda, ‘Uzandabure’, ‘Ndakwanga’, ‘Ntundize’, ‘Kungola’ n’izindi.

Nyuma akanama gashinzwe gutanga amanota kahise kajya kwiherera maze kabanza gutanga andi makamba.

Ikamba rya Miss Art ryahawe Faustine Iradukunda ufite umushinga ujyanye no gukorera Make Up abakora filime n’abahanzi, Miss Hospitality yabaye Umuhumuriza Mpano Yvonne ufite umushinga yise FAFS ujyanye no gukora ikoranabuhanga izajya ifasha gukurikiranya abantu uko baje kwivuza, Baluubu Jaliyah wo muri Uganda yegukanye ikamba rya Miss Talent, we yerekanye ikanzu ikozwe mu bipapuro mu mwiherero.

Miss Speaker yabaye Munezero Ornella wo mu Burundi ufite umushinga ujyanye no kwisuzumisha hakoreshejwe ikoranabuhanga ryo kuri murandasi, Mahoro Chadia Mireille wakoze Imbabura ikoresha imirasire y’izuba n’amashanyarazi yabaye Miss science, Habonimana Hyacinthe wo mu Burundi ufite umushinga ujyanye no guhuza aba-enjeniyeli n’abashaka ababubakira amazu bifashishije ikoranabuhanga yabaye Miss Entrepreneur naho Miss Technology yabaye Mukamwiza Yvette wakoze inkoni y’abafite ubumuga bwo kutabona ikoreshwa n’umuriro.

Aba bakobwa bose buri umwe yahembwe $1 000 naho Mukamwiza Yvette wabaye Miss Career Africa ahabwa $ 5 000 yaje yiyongera ku yo yahawe ubwo yegukanaga ikamba rya Miss Technology.

Batanu ba mbere bose babaye abanyarwandakazi barimo uwitwa Muneza Redempta Assoumer uwa gatanu, Mahoro Chadia Mireille uwa Kane, Sheillah Munsabe wegukanye uwa gatatu , Mazimpaka Christelle yabaye uwa kabiri na Mukwamwiza Yvette wegukanye ikamba rya Miss Career Africa 2019.

Mukamwiza Yvette w’imyaka 20 wegukanye iri kamba yiga mu mwaka wa kabiri w’Ishuri ry’Imyuga n’Ubumenyingiro rya IPRC Ngoma, uyu mushinga we watumye atsinda witwa ‘Digital Blind stick.’

Irushanwa ntabwo ribereye mu Rwanda gusa, kuko ryabaye mu bihugu byo mu Burengerazuba bw’Afurika guhera ku wa 30 Ugushyingo 2019 kugera ku wa 30 Ukuboza 2019, aho rizabera muri Nigeria.

Mu bihugu byo hagati muri Afurika iri rushanwa rizabera muri Angola. Abakobwa bazatangira kwiyandikisha guhera kuwa 03 Werurwe 2020; ikamba ritangwe ku wa 04 Mata 2020 nyuma abazaba bahagarariye abandi mu turere ibihugu byabo birimo bazahurira hamwe hatoranywe uhiga abandi ku rwego rwa Afurika mu irushanwa rikomeye rizabera mu Rwanda.

Akanama nkemurampaka kari kagizwe n'abantu umunani
Baluubu Jaliyah wo muri Uganda yegukanye ikamba rya Miss Talent we yerekanye ikanzu ikozwe mu bipapuro mu mwiherero
Bruce Melodie yanyuze abari bitabiriye iki gikorwa
Bruce Melodie yishimiwe cyane kubera uburyo yaririmbyemo bw'umwimerere
Habonimana Hyacinthe wo mu Burundi yabaye Miss Entrepreneur
Ikamba rya Miss Art ryahawe Faustine Iradukunda ufite umushinga ujyanye no gukorera make up abakina filimi n'abahanzi
Iki gikorwa cyacaga ku ISIBO TV mu buryo bwa live
Mahoro Mireille Chadia wakoze imbabura ikoresha imirasire y'izuba n'amashanyarazi yabaye Miss Science
Miss Hospitality yabaye Umuhumuriza Mpano Yvonne ufite umushinga yise FAFS ujyanye no gukora ikoranabuhanga rizajya rifasha gukurikiranya abantu uko baje kwivuza
Miss Speaker yabaye Munezero Ornella wo mu Burundi
Miss Technology yabaye Mukamwiza Yvette wakoze inkoni y'abafite ubumuga bwo kutabona ikoreshwa n'umuriro wanabaye Miss Career Africa
Mukamwiza Yvette niwe wabaye Miss Career Africa 2019
Mukamwiza Yvette wo mu Rwanda yegukanye $ 5 000 ahigitse abakobwa 29 bahatanaga na we mu irushanwa rya Miss Career Africa 2019, mu cyiciro cy’abakobwa bo mu Biyaga Bigari
Mukamwiza Yvette wabaye Miss Career Africa 2019 ubwo yafataga ifoto y'urwibutso n'abari bagize akanama nkemurampaka
Mukamwiza Yvette wabaye Miss Career Africa ubwo yerekanaga umushinga we
Rukotana Victor uri mu bahanzi bagezweho mu Rwanda muri iki gihe yashimishije benshi muri iki gikorwa
Tom Close ari kugerageza inkoni ya Mukamwiza Yvette yifashishwa n'abafite ubumuga bwo kutabona ikoreshwa n'amashanyarazi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .