Mukamurigo wabaye Top Model Europe agiye gutangiza ishuri ry’imideli mu Rwanda

Yanditswe na Uwiduhaye Theos
Kuya 17 Ukwakira 2019 saa 06:39
Yasuwe :
0 0

Marie Chantal Mukamurigo wabaye Top Model Europe 2019, agiye gutangiza mu Rwanda ishuri ryemewe na Leta ryigisha ibikorwa bitandukanye bijyanye n’imideli.

Iri shuri ateganya ko rizatangira ibikorwa umwaka utaha ndetse imirimo yo kuryubaka igeze kure ku buryo mu minsi mike rizaba ryamaze kugera ku musozo.

Mukamurigo yabwiye IGIHE ko nk’uwabaye umunyamideli w’umwaka mu Burayi bwose atifuje gushinga ishuri mu bihugu bitari icyo akomokamo ahubwo yatekereje ku ivuko rye kuko yagenzuye agasanga muri Afurika nta gihugu wapfa kubonamo amasomo ajyanye n’imideli.

Ati “Kuba narafashe umwanzuro wo gushinga ishuri ni uko rigomba gufasha abanyarwanda kandi tukaba ntaryo dufite. Nk’umunyamideli wabigize umwuga uhagarariye u Burayi bwose nabonye ko aho kugira ngo njye kurishinga hanze ngomba guhera iwacu.”

Yakomeje avuga ko iri shuri azariifungura ku Nyundo mu Karere ka Rubavu kuko ariho imirimo yo kuryubaka iri gukorerwa.

Iri shuri abanyeshuri bazajya baryigamo babamo. Byitezwe ko rizatangira umwaka utaha.

Nibura biteganyijwe ko ku ikubitiro rizakira abanyeshuri hagati ya 300 na 400 n’abarimu 20 b’anyamahanga gusa bazagenda bahugura abandi barimo abanyarwanda.

Mu mezi atatu ya mbere, abanyeshuri bazigira ubuntu. Hazaba harimo ibyiciro bibiri birimo icy’abana bato bari hagati y’imyaka 12 na 25 baziga imyaka itatu ndetse n’igice cy’abarengeje imyaka 25 bo bazahabwa amahugurwa y’amezi atandatu kugeza ku mwaka.

Yabajijwe niba kuba riri ku Nyundo bitazaba imbogamizi kuri bamwe, avuga ko ariho yabonye ubutaka bunini kandi avuga ko umuntu ufite ishyaka koko ryo kwiga ibyo bitaba ikibazo kuko no mu mashuri yisumbuye umuntu ashobora kuva i Rwamagana akajya kwiga i Butare.

Ubusanzwe Mukamurigo avuka i Rwamagana. Afite imyaka 28 y’amavuko, akaba aba mu Bubiligi gusa afite ubushabitsi mu Mujyi wa Rubavu ndetse akenshi akunda no kuza mu Rwanda.

Ni umuforomo gusa yiyeguriye ibyo kumurika imideli. Ubu akorana n’ibigo bijyanye n’imideli byinshi birimo igikomeye i Burayi cyitwa People Choice gikorera mu Bubiligi.

Ni umwe bamurika imideli bahagaze neza muri iki gihe cyane ko aherutse kwegukana ikamba ry’umunyamideli uhiga abandi i Burayi.

Marie Chantal Mukamurigo yabaye Top Model Europe 2019
Mukamurigo yaje mu Rwanda kureba aho imirimo y'ishuri agiye gutangiza igeze ndetse no gushaka ibyangombwa byose bizakenerwa ngo aritangize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza