00:00:00 IGIHE NETWORK KN KINYARWANDA EN ENGLISH FR FRANCAIS

Platini yaba ari kwitaza bucece Sosiyete yo muri Nigeria imufasha mu muziki?

Yanditswe na Nsengiyumva Emmy
Kuya 17 May 2022 saa 09:52
Yasuwe :

Abakurikiranira hafi imyidagaduro bari kwibaza impamvu Platini akomeje kwirengagiza ‘One Percent International’ mu ndirimbo ze nyamara ari sosiyete baherutse gusinyana amasezerano y’imikoranire mu bijyanye na muzika.

Ibi byatangiye kugarukwaho mu biganiro by’ababarizwa mu myidagaduro mu minsi ishize ubwo yasohoraga indirimbo ‘Ibyapa’. Byarushijeho kwibazwaho nyuma y’uko Platini asohoye indirimbo ye nshya ‘Jojo’ ku mugoroba wo ku wa 16 Gicurasi 2022.

Izi ndirimbo zirinda zirangira nta kirango kigaragaza ko Platini akorana na ‘One Percent International’ nkuko bimenyerewe mu ndirimbo z’abahanzi bafite ibigo bakorana.

Nyuma y’uko iyi ndirimbo nshya igiye hanze, IGIHE yagerageje kuvugana na Platini ngo avuge impamvu atigeze yifuza gushyira iyi sosiyete mu ndirimbo ze ziheruka, icyakora yirinda kubikomozaho.

Platini yagize ati “Nta kibazo gihari. Nyine niko biba byagenze gusa nta kibazo kiri mu mikoranire yanjye nabo. N’ubu bari mu ba mbere bamfasha kumenyekanisha ibihangano byanjye.”

Nubwo yavugaga ko nta kibazo gihari, amakuru twakuye imbere avuga ko kwirengagiza iyi sosiyete byatewe n’uko mu masezerano Platini afitanye n’iyi sosiyete harimo ingingo ivuga ko mu gihe hari igikorwa yikoreye batakigizemo uruhare we ntacyo aba abagomba. Ibi bikavuga ko byari uburenganzira bwe kubashyiraho cyangwa kutabashyiraho.

Mu 2021 nibwo Platini yasinye amasezerano y’imikoranire na Sosiyete yitwa ‘One Percentage International’ yo muri Nigeria, iyi yari yiyemeje kumufasha bya hafi mu muziki.

Kuva batangiye gukorana, muri Nzeri umwaka ushize nibwo bamukoreye indirimbo ya mbere ‘Shumuleta’. Yafatiwe amashusho muri Nigeria banamufasha kuyimenyekanisha muri iki gihugu.

Amakuru ahari avuga ko uyu muhanzi atishimiye kuba batinda kumukorera ibindi bihangano bityo agahitamo kwirwanaho ari nacyo cyatumye asohora indirimbo ebyiri ku giti cye.

Icyakora nkuko bikubiye mu masezerano bagiranye hari amakuru avuga ko umushinga batagizemo uruhare ntacyo babaza uyu muhanzi, ariko na we ntacyo abasaba mu kuwumenyekanisha n’ibindi binyuranye.

Iyi ndirimbo nshya ya Platini igaragaramo Umukundwa Clemence uzwi nka Cadette uyu akaba umwe mu bitabiriye irushanwa rya Miss Rwanda muri iyi minsi winjiye muri sinema y’u Rwanda.

Ni indirimbo amashusho yayo yafashwe na Omario umusore mushya muri uyu mwuga. Platini avuga ko yahisemo ko bajya bakorana ibijyanye no gutunganya amashusho y’indirimbo ze.

Omario umaze igihe akorana n’uyu muhanzi uretse kuba atangiye kumukorera amashusho y’indirimbo, ni nawe usanzwe umufotora ndetse akamufata n’amashusho y’ibihe by’ingenzo igihe uyu muhanzi aba aririmba.

Platini yongeye kwirengagiza sosiyete yo muri Nigeria basanzwe bakorana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .