00:00:00 IGIHE NETWORK KN KINYARWANDA EN ENGLISH FR FRANCAIS

Danny Vumbi yakebuye abahuje urupfu rw’umubyeyi we n’amarozi

Yanditswe na Nsengiyumva Emmy
Kuya 30 June 2022 saa 09:24
Yasuwe :

Danny Vumbi yasabye abaturage kwirinda kuvuga ko umubyeyi we yitabye Imana azize amarozi, nyuma y’uko apfuye bigatangira guhwihwiswa ku musozi w’aho yari atuye.

Yabigarutseho ku wa 29 Kamena 2022 mu muhango wo guherekeza umubyeyi we uherutse kwitaba Imana azize urupfu rutunguranye.

Ni umuhango wabereye aho yari atuye mu Karere ka Nyabihu mu Murenge wa Kabatwa mu gasantere ka Kinyebebe.

Ubwo yari ahawe ijambo mu muhango wo gushyingura umubyeyi we, Danny Vumbi yahereye ku byavugwaga ko umubyeyi we yaba yaritabye Imana azize amarozi cyane ko yituye hasi agahita yitaba Imana.

Ati “Hari abantu bamwe na bamwe umuntu yagiye anyuraho bavuga ngo kuba hano hari abantu benshi buriya nabamugiriye nabi barimo.”

Byabaye ngombwa ko Danny Vumbi asobanura icyishe umubyeyi we, ati “Mu myaka ibiri ishize mama yarwaye indwara y’umutima turamuvuza aroroherwa, ariko hari imiti yagombaga kujya afata […] kuba rero yarikubise hasi ntabyuke, rwose nta marozi arimo, ni indwara yari amaranye igihe kirekire hatagira rwose uwo babeshyera.”

Mu gihe gito yamaranye ijambo, Danny Vumbi yahishuye ko umubyeyi we yari yarigeze kumwihaniza amusaba kutongera kuririmba indirimbo zijyanye n’urupfu.

Ati “Nasohoye indirimbo nise wabigenza ute, arampamagara arambwira ati biriya ni ibiki wakoze, namubwiye ko ari ubuhanzi ariko arambwira ngo urupfu rurababaza byaba byiza utongeye kururirimba.”

Uyu muhanzi yaboneyeho kandi gushimira abaturage benshi bari bakoraniye ku musozi wa Kabatwa bitabiriye umuhango wo guherekeza umubyeyi we.

Mu bantu bazwi mu myidagaduro batabaye Danny Vumbi harimo Mico The Best n’ubuyobozi bwa KIKAC Music bigeze kubanamo, Element, Bruce Melodie na Kayitesi Alice uzwi nka Linda muri sinema nyarwanda.

Umubyeyi wa Danny Vumbi yitabye Imana mu buryo butunguranye ku wa 28 Kamena 2022, aguye iwe mu rugo.

Danny vumbi yasabye abaturage kutitiranya urupfu rwa nyina n'amarozi
Byari amarira n'agahinda ubwo Danny vumbi yaherekezaga mu cyubahiro umubyeyi we
Abaturage batabaye umuryango wa Danny Vumbi ari benshi
Umubyeyi wa Danny Vumbi yashyinguwe mu cyubahiro
Bruce Melodie yahahingutse ibyari ikiriyo bihinduka ibindi
Umugore wa Danny Vumbi (ibumoso) ari kumwe na Bruce Melodie
Danny vumbi yasabye abaturage kutitiranya urupfu rwa nyina n'amarozi
Bruce Melodie ashyira indabo ku mva y'umubyeyi wa Danny Vumbi
Bruce Melodie yafashwe n'ikiniga ubwo yari amaze gushyira indabyo ku mva y'umubyeyi wa Danny Vumbi
Nyuma yo gushyingura umubyeyi wa Danny Vumbi, Bruce Melodie na Mico The Best banyuze mu rugo iwabo wa Danny Vumbi
Danny Vumbi yakiriye mu rugo iwabo Bruce Melodie, Element n'abandi bashyitsi bari bamutabaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .