Iki gitaramo cyabereye ku kibuga cy’umupira cya Kaminuza y’u Rwanda ishami rya Nyagatare. Iki gitaramo cyatangiye Saa Munani z’amanywa cyari kiyobowe na Bianca ndetse na MC Buryohe mu gihe abakunzi b’umuziki basusurutswaga na DJ Tricky.

Nyuma y’umwanya basusurutsa abakunzi b’umuziki, Bushali yabimburiye abandi ku rubyiniro asusurutsa abakunzi b’umuziki we b’i Nyagatare cyane ko ari umwe mu bahanzi bakunzwe bikomeye.

Uyu muraperi waririmbye nyinshi mu ndirimbo ze zakunzwe, yavuye ku rubyiniro asimbuweho na Bwiza witabiriye iki gitaramo atameze neza kuko yageze mu Karere ka Nyagatare avuga ko arwaye.

Nubwo ariko yavugaga ko arwaye, abakunzi b’umuziki we ntabwo bigeze babirabukwa kuko muri iki gitaramo yasimbukaga nk’inkumi idafite n’igicurane.

Bwiza wamaze iminota irenga 30 ku rubyiniro, yaruvuyeho akurikiwe na Kenny Sol.

Kenny Sol wize amayeri yo kwigendanira umushyushyarugamba we ndetse n’inkumi imubyinira, yishimiwe bikomeye n’abakunzi be ahamya ko urukundo yeretswe i Nyagatare rwamukoze ku mutima bikomeye.

Uyu muhanzi nawe wari wahawe iminota igera kuri 30 ari ku rubyiniro yavuyeho amaze gushyira abakunzi b’umuziki mu bicu hanyuma abasigira Chriss Eazy.

Ubwo yari ageze ku rubyiniro, Chriss Eazy yakiriwe n’induru nyinshi y’abakunzi be bari bishimiye kumubona ku rubyiniro cyane ko ahafite abakunzi batari bake.

Kuva ku ndirimbo nka ‘Ese urabizi’ kugeza kuri Sekoma aherutse gusohora, Chriss Eazy yaririmbanye n’abakunzi be indirimbo ku yindi mbere y’uko amasaha yari yahawe agera akava ku rubyiniro.

Chriss wari ubaye umuhanzi wa nyuma mbere ya Bruce Melodie mu bacurangirwa na Symphony Band, yavuye ku rubyiniro arusigira Danny Nanone ucurangirwa na Sonic Band.

Danny Nanone utari wagendanye ababyinnyi nk’uko yabigenje mu bitaramo byabanje, yakoze iyo bwabaga ashimisha abakunzi bari benshi mu kibuga cyabereyemo igitaramo.

Uyu muhanzi wamaze ku rubyiniro hafi iminota 40 yaririmbye nyinshi mu ndirimbo ze zakunzwe kuva mu myaka yo ha mbere kugeza ku zo aherutse gusohora mu myaka mike ya vuba.

Akiva ku rubyiniro, Danny Nanone yakorewe mu ngata na Ruti Joel wari waserukanye n’itsinda ry’Ibihame by’Imana bataramira abakunzi b’umuziki i Nyagatare biratinda.

Uyu muhanzi ukunzwe mu muziki gakondo, yishimiwe bikomeye n’abari bitabiriye iki gitaramo.

Ruti Joel yavuye ku rubyiniro arusigira Bruce Melodie wagombaga gushyiraho akadomo kuri iki gitaramo ndetse nk’uko byagenze ahandi hose ibi bitaramo byanyuze, yongeye gushimangira ko ari umwe mu bahanzi bakomeye mu muziki w’u Rwanda.

Bruce Melodie wari witwaje Ross Kana usanzwe ukomoka mu Karere ka Nyagatare, yaje kumutumira ku rubyiniro baririmba indirimbo ‘Fou de toi’ bahuriyemo na Element.

Bruce Melodie kuva yajya ku rubyiniro kugeza ubwo yaruvagaho ntiyigeze aha akaruhuko abakunzi be kuko baririmbanye banabyinana indirimbo ze, aho yaziririmbye mu gihe kirenga isaha yamaze ku rubyiniro.

Ibi bitaramo biterwa inkunga na MTN ndetse na PRIMUS, byitezwe ko bizakomereza mu Karere ka Ngoma ku wa 21 Nzeri 2024.

Abakunzi b'umuziki b'i Nyagatare bari bitabiriye bazindutse

Igare ryaparitswe babanza kureba uko abahanzi bakunda

Yitabiriye iki gitaramo yitwaje umuduri we

Imyambarire ya Bianca na MC Buryohe isigara mu mitwe ya benshi mu bakurikiye ibi birori

MC Buryohe na Bianca nibo bari bayoboye ibi birori

Bushali ni umwe mu baraperi bafite abakunzi benshi i Nyagatare

Bushali yakoresheje imbaraga nyinshi kugira ngo ashimishe abakunzi be

Kuba afite ubumuga ntabwo bimubuza kwihera ijisho ibirori byabereye iwabo

Izuba ryari ryinshi, Bushali umenyereweho kumena amazi ku bafana no kuri iyi nshuro ntabwo yaboroheye

Nubwo Bushali yabanje ku rubyiniro abakunzi b'umuziki we ntabwo bigeze bamutenguha kuko bamweretse urukundo

Bwiza afite itsinda rimubyinira adakunze gusiga aho agiye gutaramira hose

Byari bigoye kumenya ko Bwiza yitabiriye iki gitaramo arwaye

Bwiza yaririmbye nyinshi mu ndirimbo ze zakunzwe

Bwiza yasoje afatana ifoto y'urwibutso n'abakunzi be

Bwiza yishimiwe ku rwego rwo hejuru n'abakunzi be

Kenny Sol n'umubyinnyi we bakomeje guca ibintu muri 'MTN Iwacu Muzika Festival'

Kenny Sol yanyuzagamo agasimbuka akabyinana n'abakunzi be

Iminota 30 yamaze ku rubyiniro, Kenny Sol yatanze ibyishimo ku bakunzi be

Kenny Sol yishimiye uburyo abakunzi b'umuziki bamwakiriye i Nyagatare

Ati "Muzamure amaboko yanyu ndebe niba munyishimiye!"

Ni uku Chriss Eazy yahingutse ku rubyiniro

Chriss Eazy ni umwe mu bahanzi bafite abakunzi benshi i Nyagatare

Umuziki si uw'abato gusa, n'abakuze banyuzamo bakawubyina

Abafana bajyaga mu mujyo yifuza

Chriss Eazy yishimiwe bikomeye i Nyagatare

Danny Nanone ni umwe mu bahanzi bari muri ibi bitaramo bamaze igihe kinini mu muziki

Danny Nanone nta kujenjeka ari gushyira mu bitaramo bya MTN Iwacu Muzika Festival

Danny Vumbi n'umugore we ntabwo bajya bacikanwa n'ibi bitaramo

Ibyishimo iyo bigufashe kwifata biragorana

Danny Nanone yiyambaje nyinshi mu ndirimbo ze zakunzwe kuva mu myaka yo ha mbere kugira ngo arusheho kuryohereza abakunzi be

Danny Nanone utari kumwe n'ababyinnyi yatanze ibyishimo i Nyagatare

Ruti Joel yishimiwe byihariye kubera kuririmba injyana gakondo

Ruti Joel yavuze ko Abanyarwanda bakunda umuziki gakondo ahubwo ikibazo kikaba ko abawukora bakiri bake

Ruti Joel aba ari kumwe n'abagize Itorero Ibihame by'Imana

Bruce Melodie yavuye ku rubyiniro bwamaze kwira

Bruce Melodie ntagisiga ababyinnyi be

Babyinnye ivumbi riratumuka

Bruce Melodie yitwaje Ross Kana usanzwe n'ubundi uvuka i Nyagatare

Ni ibitaramo biri no gukura bamwe mu Mujyi wa Kigali bikabajyana mu ntara

Umugoroba ugeze nibwo iki gitaramo cyarangiye

Amafoto: Kwizera Remy Moses