00:00:00 IGIHE NETWORK KN KINYARWANDA EN ENGLISH FR FRANCAIS

Mu Cyunamo twarababuze! Frank Joe yanenze ibyamamare byatereye agati mu ryinyo mu gihe cyo #Kwibuka27

Yanditswe na Nsengiyumva Emmy
Kuya 14 Mata 2021 saa 08:56
Yasuwe :
0 0

Umuhanzi akaba n’umumurikamideri Rukundo Frank, wubatse izina mu myidagaduro y’u Rwanda nka Frank Joe, yanenze ibyamamare byatereye agati mu ryinyo mu gihe cyo Kwibuka ku nshuro ya 27 Jenoside yakorewe Abatutsi mu 1994.

Uyu mugabo abinyujije ku rukuta rwe rwa Twitter yibukije ibi byamamare ko bikwiye kwifatanya n’Abanyarwanda yaba mu bihe byiza n’ibibi. Yabasabye ko badakwiriye kumva ko bazajya babana mu gihe cyo gushyushya imbuga nkoranyambaga gusa mu gihe cyo kwibuka bakabura.

Yagize ati “Mu minsi ishize twari dufite abantu bamaze kubaka amazina ku mbuga nkoranyambaga, mu cyunamo twarababuze mwo kagira inka mwe kandi nibwo twari tubakeneye. Ntabwo tubakeneye mu gutwika gusa, ahubwo tubakeneye no mu kababaro nk’akangaka twibuka abacu!”

Yakomeje avuga ko abantu bamaze kubaka amazina ku mbuga nkoranyambaga bakabaye baragize uruhare mu kugaragariza amahanga ibyabereye mu Rwanda by’ukuri, bakagaragaza aho igihugu cyavuye n’aho kigeze mu myaka 27 ishize, bagahumuriza Abanyarwanda babuze ababo n’ibindi.

Ati “Iki nicyo cyari igihe cyo gukoresha amazina yanyu mu kweraka Isi ibyabaye mu Rwanda, mukabereka aho u Rwanda ruvuye n’aho rugeze! Mugahumuriza impfubyi n’abapfakazi n’abacitse ku icumu rya Jenoside, ariko twarababuze.”

Uyu muhanzi avuze ibi mu gihe benshi mu bakurikiranira hafi imyidagaduro batashimishijwe n’uburyo abahanzi b’ibyamamare ndetse n’abandi bantu bafite amazina akomeye basa n’abatereye agati mu ryinyo mu gihe cyo Kwibuka ku nshuro ya 27 Jenoside yakorewe Abatutsi mu 1994.

U Rwanda n’abatuye Isi muri rusange bari kwibuka ku nshuro ya 27 Jenoside yakorewe Abatutsi mu 1994, iki gikorwa ngarukamwaka kimara iminsi 100 kiba kigamije kwibuka iminsi nk’iyo yiciwemo Abatutsi barenga miliyoni bazize uko baremwe.

Frank Joe usigaye aba muri Canada ni umumurikamideri n’umuhanzi wakanyujijeho mu muziki w’u Rwanda. Azwi cyane mu ndirimbo nka Ni wowe, Umusonga n’izindi.

Reba indirimbo Umusonga iri mu z’uyu muhanzi zakanyujijeho

Usibye kuba umuhanzi ukomeye, Frank Joe ni n'umumurikamideri ukomeye wakanyujijeho mu myidagaduro y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .