Miss Tanzania Sylivia Sebastian yageze i Kigali yitabiriye ibirori bya Miss Rwanda 2020

Yanditswe na Nsengiyumva Emmy
Kuya 19 Gashyantare 2020 saa 10:47
Yasuwe :
0 0

Nyampinga wa Tanzania, Sylivia Sebastian, watowe mu mwaka wa 2019 yageze i Kigali aho yitabiriye ibirori byo gutora Nyampinga w’u Rwanda 2020 biteganyijwe tariki 22 Gashyantare 2020 kuri Intare Arena.

Mu gitondo cyo kuri uyu wa Gatatu tariki 19 Gashyantare 2020 nibwo Nyampinga wa Tanzania Sylivia Sebastian yabimburiye abandi bakobwa bagomba kwitabira irushanwa rya Miss Rwanda 2020, uyu akaba yakiriwe ku kibuga cy’indege i Kanombe na Miss Rwanda wa 2019, Nimwiza Meghan.

Usibye uyu mukobwa wageze i Kigali mbere, Ubuyobozi bwa Miss Rwanda bwabwiye IGIHE ko hitezwe abandi bakobwa banyuranye bazaturuka mu bindi bihugu bitabiriye iri rushanwa rizarangira ku wa Gatandatu tariki 22 Gashyantare 2020.

Ubwo yageraga i Kigali kandi uyu mukobwa yanahahuriye na Sherri Silver umubyinnyi kabuhariwe umaze kuba icyamamare ku Isi nawe watumiwe mu birori bya Miss Rwanda 2020.

Bamaze kwakirwa ku kibuga cy’indege i Kanombe aba bakobwa bahise bajyanwa kuri Hotel La Palisse i Nyamata aho bagiye gucumbikirwa.

Kugeza ubu irushanwa rya Miss Rwanda 2020 riri kugana ku musozo abakobwa bahatanira ikamba bari mu mwiherero mbere y’iminsi mike ngo hamenyekane uzegukana ikamba.

Aba bakobwa bari mu mwiherero bamaze kuvamo umwe cyane ko ubu basigaye ari 19 nyuma y’uko Ingabire Jolie Ange asezeye mu irushanwa kubera uburwayi.

Kugeza ubu amatike yo kwinjira mu irushanwa rya Miss Rwanda 2020 yamaze gushyirwa ku isoko aho abayashaka bashobora kuyagura bifashishije Mobile Money (*182*8*1*333111#) , Ecobank cyangwa bakayasanga kuri Camellia KBC, Keza Saloon ndetse no kuri Smart Design.

Nimwiza Meghan niwe wakiriye Miss Tanzania mu Rwanda
Miss Nimwiza Meghan na Sylivia Sebastian baherukanaga muri Miss World i Londres
Sherri Silver akigera i Kigali
Uyu mukobwa w'Umunyarwandakazi amaze kuba umubyinnyi karundura ku Isi nzima
Nimwiza Meghan, Sherri Silver na Miss Tanzania Sylivia Sebastian

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza