Miss Supranational: Hari gushakwa umukobwa uzakatisha itike yo kujya muri batanu ba mbere, ijwi rimwe ni 50 Frw

Yanditswe na Uwiduhaye Theos
Kuya 13 Ukuboza 2020 saa 11:38
Yasuwe :
0 0

Urugendo rwo gushakisha umukobwa uhiga abandi uzahagararira u Rwanda muri Miss Supranational International izaba mu mwaka utaha, rurakomeje aho abakobwa 11 baherutse gutoranywa bari gushakishwamo uzajya muri batanu ba mbere atowe hifashishijwe internet.

Ni igikorwa kiri kubera ku rubuga rwa MNI aho ushaka guha amahirwe umukobwa nibura yishyura 50 Frw kuri buri jwi atanze.

Nsengiyumva Alphonse ukuriye Suprafamily Rwanda Ltd itegura Miss Supranational Rwanda, yavuze ko irushanwa ry’uyu mwaka batekereje gukoresha ubu buryo bashaka kureba umukobwa waba akunzwe n’abantu.

Ati “Urumva twashatse gushyiraho igiciro gito kuri buri jwi, tuzi ko koko mu gihe umukobwa azaba afite abamushyigikiye bizamworohera guhita akatisha itike yo kujya muri batanu ba mbere. Ikindi twashakaga gutangira kumenyereza abanyarwanda kwikura amafaranga n’iyo yaba make, bagafasha abahatana muri iri rushanwa no mu yandi.”

Aba bakobwa 11 bamaze iminsi bari guhatana muri iri rushanwa mu byiciro bitandukanye birimo icyo kwivugaho, kuvuga ku bwiza bw’u Rwanda, kuvuga ku mushinga no kwamamaza Oppo nk’umufatanyabikorwa w’iri rushanwa.

Muri batanu bazagera mu cyiciro cya nyuma muri iri rushanwa, hazabanza gutoranywamo babiri bazaba barimo uwigaragaje neza ku mbuga nkoranyambaga [Social influencer] ndetse n’uzaba ari hejuru mu majwi yo kuri internet.

Abandi batatu bazatoranywa hazateranywa urugendo rwose banyuzemo muri uru rushanwa, batange amanota hakurikijwe uko bitwaye.

Iri rushanwa riri gukorwa hifashishijwe TV1 ndetse n’imbuga nkoranyambaga. Abo bakobwa bakorera mu matsinda, bigatambutswa kuri televiziyo.

Akanama nkemurampaka gakurikirana irushanwa inshuro nyinshi kifashishije ikoranabuhanga, ariko rimwe na rimwe bahura n’abakobwa barimo guhatana.

Bikini ikunze kuvugisha benshi mu marushanwa y’ubwiza yakuwe mu irushanwa kubera Coronavirus.

Aba bakobwa bagiye guhatanira ikamba rifitwe na Umunyana Shanitah wabaye Miss Supranational Rwanda mu 2019.

Yahembwe miliyoni 1 Frw anaserukira u Rwanda mu irushanwa rya Miss Supranational ryabereye muri Pologne kuva ku wa 6 Ukuboza 2019. Igisonga cya Mbere cyegukanye 500 000 Frw mu gihe Igisonga cya kabiri yahembwe 300 000 Frw.

Irushanwa rya Miss Supranational International bahatanira kwitabira, ribera muri Pologne, aho abakobwa batandukanye bahurira muri iki gihugu bakamarayo ibyumweru bitatu bahatanira iri kamba.

Urugendo rwo gushaka umukobwa uzahagararira u Rwanda muri Miss Supranational International mu 2021, rwatangiye nyuma yaho gutora uwari kwitabira iri rushanwa rya 2020 mu Ugushyingo, byasubitswe.

Umunya-Thailand ufite ikamba rya Miss Supranational, Anntonia Porsild n’Umunyamerika Nate Crnkovich ufite irya Mister Supranational, bazagumana amakamba kugeza igihe hazatorwa ababasimbura.

Gutora uzahagararira u Rwanda muri iri rushanwa bizakorwa mu mpera za Ukuboza uyu mwaka.

Guha amahirwe umukobwa unyura hano

Gutoranya umukobwa uzahita akatisha itike muri iri rushanwa biri gukorwa, hakishyurwa 50 Frw kuri buri jwi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .