Miss Nimwiza Meghan yageze mu Bwongereza aho yitabiriye Miss World 2019

Yanditswe na Uwiduhaye Theos
Kuya 21 Ugushyingo 2019 saa 11:10
Yasuwe :
0 0

Nimwiza Meghan yageze mu Mujyi wa Londres aho yitabiriye irushanwa ry’ubwiza rya Miss World azahuriramo n’abakobwa baturutse mu bice bitandukanye by’Isi.

Ku ikubitiro Nimwiza na bagenzi be kuri uyu wa Kane tariki 21 Ugushyingo 2019, barakora tombola y’igice cy’irushanwa rizwi nka ‘Head to Head Challenge’ aho abakobwa bashyirwa mu matsinda bakagenda bahatwa ibibazo ku mishinga yabo n’ibibazo by’ubumenyi rusange.

Ubwo Nimwiza yahagurukaga mu Rwanda yabwiye IGIHE ko yiteguye bishoboka ku buryo yizeye gutsinda nubwo azi neza ko ibyo agiyemo ari irushanwa kandi mu irushanwa buri wese aba afite amahirwe.

Yanavuze ko ba Nyampinga bamubanjirije hari impanuro n’ibyo bamubwiye bibera muri iri rushanwa cyane ko nabo barinyuzemo.

Ibirori byo gutanga ikamba rya Miss World bizaba ku wa 14 Ukuboza 2019 ahitwa Excel i Londres, bizasusurutswa n’abahanzi bakomeye mu Bwongereza. Ibi birori bizatambuka kuri shene ya televiziyo yitwa London Live.

Julia Morley ukuriye Miss World Organisation yavuze ko umuhango wo gutanga ikamba uzasusurutswa na Lulu mu ndirimbo ‘Shout’ ndetse na Peter Andre uzaririmba iyitwa ‘Mysterious Girl’ agafatanya na Megan Young kuyobora ibirori.

U Rwanda rumaze kwitabira iri rushanwa inshuro enye ; mu 2016 hagiyeyo Mutesi Jolly, 2017 hajyayo Iradukunda Elsa, mu 2018 hagiyeyo Iradukunda Liliane na Nimwiza Meghan waserukiye igihugu uyu mwaka.

Ikamba rya Miss World ry’umwaka ushize rifitwe n’umukobwa ukomoka muri Mexique witwa Vanessa Ponce ari na we uzaryambika uzaritwara hagati ya Nimwiza Meghan na bagenzi be.

Irushanwa rya Miss World rigiye kuba ku nshuro ya 69, ryitabiriwe n’abakobwa bo mu bihugu 120. Bazahatana mu bikorwa bitandukanye bizamara ibyumweru bitatu birimo ibijyanye n’ibikorwa bakoze, siporo, kwerekana impano, kumurika imideli n’ibindi bitandukanye.

Nimwiza Meghan ubwo yahagurukaga mu Rwanda
Nimwiza Meghan ari kubarizwa mmu Bwongereza aho agiye guhatanira ikamba rya Miss World 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza