Nimwiza Meghan niwe wavuze ijambo ubwo abahatanye muri Miss World 2019 basuraga Umunyamabanga Mukuru wa Commonwealth

Yanditswe na Nsengiyumva Emmy
Kuya 7 Ukuboza 2019 saa 03:07
Yasuwe :
0 0

Mu gitondo cyo ku wa Gatanu tariki 6 Ukuboza 2019 nibwo abakobwa bahatanye muri Miss World 2019 bakiriwe n’Umunyamabanga Mukuru wa Commonwealth, Miss Nimwiza Meghan avuga ijambo mu izina ry’abahatanira ikamba.

Umunyamabanga Mukuru wa Commonwealth Patricia Janet Scotland yavuze ko yishimiye guhura n’aba bakobwa bose ndetse anishimiye urugendo barimo rwo guhagararira ibihugu byabo mu irushanwa.

Yakomeje agira ati “Mwagize amahirwe yo kumenyana umwe ku wundi. Isi irabakeneye ngo ibikorwa byanyu biyigire nziza kurushaho.”

Yababwiye ko yizeye adashidikanya ko buri mukobwa azamenya impano ye ndetse n’uburyo yayagura ubundi zikaba zabateza imbere kimwe n’abandi kuko bashobora gukora buri kimwe baba bahisemo.

Yunzemo ati” Iyi si yaba uko mubishaka muramutse mwifuje kuyigira uko muyishaka. Ndatekereza ko buri umwe muri mwe ayo ariyo mahitamo ye.”

Umuryango w’Ibihugu bikoresha ururimi rw’icyongereza “The Commonwealth” ugizwe n’ibihugu 53 ukagira Miliyari 2.4 z’abaturage.

Nimwiza Meghan wavuze mu izina ry’abandi bakobwa bahataniye ikamba rya Miss World 2019 yijeje uyu munyamabanga ko bumvise impanuro bahawe kandi biteguye kuzikurikiza.

Ati” Ni iby’agaciro gakomeye kuba hano uyu munsi, mu izina ry’ibihugu byose bihagarariwe turabashimira ku bw’umwanya wanyu mwigomwe mukatwakira ndetse mukadusangiza n’ubumenyi.”

” Twanyuzwe n’inama ndetse n’ibiganiro mwadusangije tuzabigira impamba mu buzima bwacu. Buri umwe muri twe afite umushinga ujyanye n’ubwiza bufite intego mu gihugu cye. Bamwe muri twe turi kurwanya imirire mibi, turarwanira uburenganzira bw’abana n’abagore (…), ikintu cyiza cyane cy’iri rushanwa ni uko rireba ubwiza bufite intego.”

Ku wa 19 Ugushyingo 2019 Nimwiza Meghan yitabiriye irushanwa rya Miss World 2019, aho yagiye guhatana n’abandi bakobwa 120 baturutse mu bihugu bitandukanye ku Isi yose.

Kuri ubu iri rushanwa rigeze kure, mu minsi ishize abakobwa batangiye guhatana mu byiciro bitandukanye, bakigera mu Bwongereza aho iri rushanwa riri kubera bahise bakora tombola y’igice cy’irushanwa rizwi nka ‘Head to Head Challenge’ aho bashyirwa mu matsinda bakagenda bahatwa ibibazo ku mishinga yabo n’ibibazo by’ubumenyi rusange.

Mu itsinda rya Meghan Nimwiza ari kumwe na Ghislaine Mejia (Aruba), Michelle Daniela DEE (Philippines), Alba Blair (Dominican Republic) na Rebecca Kwabi (Ghana).

Nimwiza yerekanye umushinga we mbere y’abandi, yasobanuye ko kuba yarakuriye mu Rwanda mu gihugu gikesha umusaruro mwinshi ubuhinzi byatumye afata umushinga we nk’ingirakamaro. Yavuze ko yakuze abona aho bahinga bigatuma abikunda, yifuza gukundisha urubyiruko ruhugiye mu bindi kwibuka ubuhinzi "kuko butariho batabasha kubaho."

Miss World 2018, Vanessa Ponce yabajije Meghan Nimwiza umushinga we ujyanye na ’Beauty with a Purpose’ isaba abakobwa bose kwerekana ibikorwa bakoze bijyanye no kugaragaza ubwiza bufite intego.

Nyampinga w’u Rwanda uhatanira kuba Miss World yasobanuye ko yahisemo gufasha abana bafite ikibazo cy’imirire mibi. Ibikorwa nk’ibi yabikoze mu Ugushyingo aho yatangije igikorwa cyo gufasha abana 50 bo mu karere ka Nyamagabe bafite ikibazo cy’imirire mibi basanzwe bakurikiranwa n’ibitaro bya Kigeme.

Yagize ati "Nkunda kubona abana, nibuka ko igihe cyose byamenaga umutima kubona umwana ufite ikibazo cy’imirire mibi ndetse iyo ngize uwo mbona binyibutsa aho nari ndi mu gihe cyabo. Guverinoma yacu yakoze byinshi mu guhangana n’iki kibazo gusa haracyariho uduce tumwe na tumwe kikigaragaramo. Niyumvisemo ko hari icyo nshobora kubakorera."

Abakobwa bari guhatana muri Miss World 2019 bakiriwe n'Umunyabanga Mukuru wa Commonwealth
Miss Nimwiza Meghan yitabiriye Miss World 2019 ahagarariye u Rwanda
Nimwiza Meghan niwe wari uhagarariye abandi bakobwa ubwo bahuraga n'umunyamabanga mukuru wa Commonwealth
Nimwiza Meghan ageza ijambo ku bitabiriye iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .