Miss Igiraneza yabaye Igisonga cya Miss Globe World 2020

Yanditswe na Uwiduhaye Theos
Kuya 21 Ukuboza 2020 saa 12:34
Yasuwe :
0 0

Igiraneza Ndekwe Paulette uherutse guhagararira u Rwanda mu Irushanwa rya ‘Miss Earth 2019’, ryabereye muri Philippines umwaka ushize, yabaye Igisonga cya kane mu irushanwa rikomeye ku rwego mpuzamahangan rya Miss globe World 2020.

Mu kiganiro cyihariye na IGIHE, Miss Igiraneza yavuze ko iri rushanwa, ryabaye hifashishijwe ikoranabuhanga mu rwego rwo kwirinda ikwirarakwira ry’icyorezo cya Coronavirus, ritari ryoroshye, kuko ryitabiriwe n’abakobwa baturutse mu bihugu byinshi.

Yagize ati “Twatangiye turi abakobwa 500 baturutse mu bihugu birenga 150. Mu gutoranya bwa mbere, hatowe 48 ba mbere, u Rwanda ruzamo. Kuri iki Cyumweru hatangajwe batanu ba mbere na bwo u Rwanda ruzamo. Hateganyijwe ko umuhango wo kwambikwa amakamba uzakorwa COVID-19 imaze kugabanuka. Igihugu n’aho bizabera ntibiratangazwa.”

Irushanwa rya Miss Globe World ribaye ku nshuro ya 46, rikaba riza mu 10 ya mbere akomeye ku Isi mu marushanwa y’ubwiza. Ikamba ry’iri rushanwa muri uyu mwaka ryegukanywe na Andrea Luna wo muri Peru, umukobwa w’imyaka 29 uzwi cyane mu gukina filime. Iri rushanwa ryatangiye muri Nyakanga 2020.

Miss Igiraneza asanganywe abamukurikira benshi ku mbuga nkoranyambaga, aho nko kuri Instagram akurikirwa n’abantu ibihumbi 540.

Si ubwa mbere Miss Igiraneza yitabiriye amarushanwa mpuzamahanga y’ubwiza, kuko mu mwaka ushize uyu mukobwa yari mu bandi 85 bari bitabiriye irushanwa ryo guhatanira ikamba rya ‘Miss Earth 2019’.

Icyo gihe ntabwo yitwaye neza, kuko ataje mu myanya y’imbere mu irushanwa ryegukanwe na Lindsey Coffey wo muri Leta Zunze Ubumwe za Amerika, wanaciye agahigo ko kuba umukobwa wa mbere ukomoka muri icyo gihugu utwaye iri kamba.

Miss Igiraneza yabaye Nyampinga w’Ishuri rya ETMR (Ecole Technical Muhazi Rwanda) mu 2016, aza kwitabira ijonjora rya ‘Miss Rwanda mu 2019’ ariko ntiyakomeza. Uyu mukobwa kandi yanitabiriye irushanwa rya ‘Miss Supranational Rwanda mu 2019’.

Ni ku nshuro ya mbere u Rwanda rwari rwitabiriye irushanwa rya Miss Globe ndetse Miss Igiraneza yaciye agahigo ko kuba umukobwa wa mbere uhagarariye igihugu muri iryo rushanwa.

Miss Igiraneza Ndekwe Paulette, yaje ku mwanya wa kane mu irushanwa rya Miss Globe World

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .