00:00:00 IGIHE NETWORK KN KINYARWANDA EN ENGLISH FR FRANCAIS

Menya abahanzi bari gukora ku myambaro ya ’Kwanda’, umushinga mushya wa Moshions

Yanditswe na Mukahirwa Diane
Kuya 8 Ukuboza 2022 saa 01:05
Yasuwe :

Ku wa 3 Ukuboza nibwo Moses Turahirwa watangije inzu y’imideli ya Moshions yamurikiye itangazamakuru imbanziririzamushinga ya Kwanda igiye kujya ikora imyambaro yo ku rwego rwo hejuru.

Mu kiganiro Moses Turahirwa aheruka kugira na IGIHE yavuze ko Kwanda yatangijwe mu rwego rwo kwagura ibikorwa bya Moshions kandi ko izakorwaho n’bahanzi 12 bazahuriza hamwe ubuhanga mu bintu bitandukanye.

Ni urutonde rugaragaraho abahanga mu mideli, umuziki, gufata amashusho, ubugeni n’ibindi, bazaba bayobowe na Moses Turahirwa.

Ndanga Bugingo Patrick [Pastor P]

Ndanga Bugingo Patrick [Pastor P] ni umwe mu bahanga u Rwanda rwagize mu gutunganya imiziki kuko yakoze indirimbo zakunzwe cyane nka “Adi Top” ya Meddy, “Habibi” ya The Ben, “Indoro” ya Charly na Nina n’izindi zo mu bihe byashize nka “Mu Gihirahiro” ya Jay Polly, “Sintuza” ya Urban Boys n’izindi.

Pastor P ni umwe mu bahanzi bazakora kuri Kwanda azaba ashinzwe gutunganya ibijyanye n’amajwi n’imiziki byose bizajya bikenerwa muri uyu mushinga.

Pastor P ni umwe mu bahanzi bazakora kuri Kwanda akazaba ashinzwe gutunganya ibijyanye n’amajwi n’imiziki byose bizajya bikenerwa muri uyu mushinga

Cedric Dric

Karemangingo Cedric ni umwe mu Banyarwanda bamaze kugaragaza ubuhanga mu gutunganya amashusho haba ay’indirimbo z’abahanzi, ayamamaza ibigo bikomeye n’andi akoranywe udushya twinshi.

Uyu umusore watangiye ikigo yise ‘Dric Entertainment’ si muto muri uyu mwuga gusa izina rye ryatumbagiye mu myaka mike ishize yakoranye n’abahanzi bakomeye muri Afurika no mu Rwanda nka Burna Boy, Ya Levis, Malick Berry, Fally Ipupa, Sauti Sol, Patoranking, Meddy, The Ben, Knowless, Israel Mbonyi, Yvan Buravan n’abandi.

Karemangingo amaze kubaka izina mu gukora amashusho yamamaza kuko yakoreye ibigo bikomeye nka MTN Rwanda na Moshions bagiye gukomezanya mu mushinga wa Kwanda.

Muri Kwanda Karemangingo azaba ashinzwe ibijyanye no gufata amashusho no kuyatunganya.

Karemangingo amaze kubaka izina mu gukora amashusho yamamaza kuko yakoreye ibigo bikomeye nka MTN Rwanda na Moshions bagiye gukomezanya mu mushinga wa Kwanda

Serrah Galos

Serrah ni umusore w’Umunyarwanda umaze kugaragaza ubuhanga mu gukora amafoto atanga ubutumwa, hamwe umuntu areba ifoto agahita asobanukirwa ibyayo ntawe ubimubwiye.

Serrah yakoranye n’imiryango mpuzamahanga itegamiye kuri Leta , azwi cyane mu gufata amafoto agaragaza ubwiza bw’u Rwanda akayagaragariza ku rubuga yise ‘Rwanda nziza’ ndetse yari asanzwe afotora imyambaro ya Moshions.

Muri Kwanda Serrah ashizwe ibijyanye no gufata amafoto byose bizakenerwa muri uyu mushinga.

Nishimwe Imfura Paradine

Nishimwe ni we watangije ikigo cya ’Wood Habitat’ kimaze kwigarurira abasirimu n’ibigo bikomeye bishaka kurimbisha amazu.

’Wood Habitat’ ikora ibitanda, intebe, ameza n’ibindi bikoresho byo mu nzu bikozwe mu buryo bugezweho kandi bihanganye udushya twinshi.

Nishimwe azaba ashinzwe gukora ibikoresho bitandukanye bizifashishwa mu mushinga wa Kwanda.

Nishimwe watangije Wood Habitat ari mu bazakora kuri Kwanda

Nizeyimana Claude

Nizeyima Claude ni umwe mu banyabugeni u Rwanda rufite bakora ibihangano by’ubuhanga kandi binogeye ijisho, abamaze kubibona ntabwo bashidikanya ku buhanga bwe.

Nizeyimana yasoje amasomo y’ubugeni mu ishuri rya Nyundo, aho yanogereje impano ye.

Kuri Kwanda uyu musore ashinzwe ibijyanye n’ibihangano by’ubugeni bizajya bikenerwa.

Umunyabugeni Nizeyimana Claude azajya akora ibihangano by'ubugeni muri Kwanda

Kalisa Winnie

Kalisa Winnie yakanyujijeho mu kumurika imideli mu 2015, nanubu akaba akiri mu barebwaho n’abakibyinjiramo.

Kuri ubu yatangije ‘Laini Studio’ ikora imitako n’ibikoresho bitandukanye birimbisha amazu mu ibumba bigatuma ahantu abantu baba cyangwa bakorera harushaho kugira ubwiza budasanzwe.

Kalisa abinyujije muri ’Laini Studio’, muri Kwanda azajya akora ibikoresho asanzwe akora ariko bijyanye n’ibyo bari gukoraho.

Kalisa Winnie ni umwe mu bazakorana mu mushinga wa Kwanda

Niwemutoni Nadia

Niwemutoni Nadia aheruka guhabwa inshingano zo guhanga imyambaro y’abagore n’abagabo muri Moshions, akaba yanahawe inshingano muri uyu mushinga mushya wa Kwanda.

Uyu umukobwa wize imideli mu Bwongereza, yatangiye gukora muri Moshions ubwo yimenyereza umwuga birangira ahawe akazi.

Niwemutoni Nadia aheruka guhabwa inshingano zo guhanga imyambaro y’abagore n’abagabo muri Moshions akazaba anakora kuri Kwanda

Francesco Tavanti

Francesco ni umutaliyani wakoranye na Moses Turahirwa mu gihe yigaga ibijyanye n’imideli mu Butaliyani, kugeza ubu niwe mu Muyobozi w’Ubuhanzi muri Moshions na Kwanda.

Francesco kuri ubu ari mu Rwanda aho ari gukorana bya hafi n’aba bahanzi bose bari gutegura gushyira hanze imyambaro ya Kwanda muri Gicurasi 2023.

Turahirwa yatangaje ko iyi myambaro izashyirwa hanze muri Gicurasi 2023 ikaba ari mike kandi ifite igiciro cyo hejuru, imurikwa ryayo rya mbere rikazabera muri Pariki y’Ibirunga n’ahandi mu bice bitandukanye by’Isi.

Francesco ni umutaliyani wakoranye na Moses Turahirwa igihe yarari kwiga ibijyanye n’imideli mu Butaliyani, kugeza ubu niwe mu Muyobozi w’Ubuhanzi muri Moshions na Kwanda

Kwezi Sana

Kwezi Sana yashinzwe na Angela Mutegevu ikora ibikoresho bitandukanye bituma ahantu abantu bari harushaho gusa neza no guhumura neza nka buje n’imibavu bikomoka ku bimera.

Kwezi Sana nayo izajya ikorana na Kwanda mu mushinga wo gukora imyambaro yo ku rwego rwo hejuru.

Kweza Sana iri mu bazakora kuri Kwanda

Usibye aba kandi hari n’ibigo bitandukanye bizakorana na Kwanda Season1 bikora ibikorwa bitandukanye nka; Adire Lounge, Anda Restaurant, Aqua Rwanda, City Textile, Deissa, Desalu Naturals, Dokmai, Illume Creative Studios, Inzuki Designs, Johnson the Baker, Kivu Noir, K’tsobe Jewel, Maeko Tessuti, Mukati Na Butta, Niofar by Milcos, Tamrat Group, Uzuri K&Y.

Turahirwa yagaragaje imbanziriza mushinga wa Kwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .