Meddy yateye ivi asaba umukobwa bakundana ko yamubera umugore

Yanditswe na Nsengiyumva Emmy
Kuya 19 Ukuboza 2020 saa 08:07
Yasuwe :
0 0

Umuhanzi Meddy usanzwe atuye muri Leta Zunze Ubumwe za Amerika yateye ivi asaba umukobwa bamaze igihe bakundana, Mimi Mehfira, ko yamubera umufasha.

Mu ijoro ryo kuri uyu wa Gatanu tariki 19 Ukuboza 2020 nibwo Meddy yasabye uyu mukobwa ukomoka muri Ethiopia ko yazamubera umugore. Hari mu birori by’isabukuru y’amavuko ya Mimi Mehfira.

Ku mbuga nkoranyambaga hakwiriye amashusho uyu musore aca bugufi ashyira ivi hasi agasaba uyu mukobwa ko yazamubera umugore, undi nawe nta kuzuyaza yahise yikiriza atega urutoki Meddy arushyiramo impeta.

Kuva muri Kanama 2017 nibwo byatangiye kumenyekana cyane ko Meddy akundana n’uyu mukobwa, ndetse ahantu hose bajyaga babaga bari kumwe agatoki ku kandi.

Muri Kanama 2018, Mimi kwiyumanganya byaranze maze asuka hanze amarangamutima ye yifuriza isabukuru uyu muhanzi.

Icyo gihe, yashyize kuri Instagram ifoto ari kumwe na Meddy, ayiherekeza amagambo y’Ikinyarwanda amubwira ati “Mutima wanjye, ndagukunda”, arangije ashyiraho utumenyetso tw’umutima.

Urukundo rwakomeje kugurumana kugeza aho Mimi yifataga rimwe na rimwe akandika amagambo agaragaza ko ariwe mukobwa ubayeho neza ku Isi kubera urukundo ahabwa na Meddy.

Muri Kamena 2019 yanditse agira ati “Nta byishimo bibaho mu buzima nko gukunda, ugakundwa.” Meddy nawe amusubiza amwereka ko nawe yanyuzwe no gukundana n’uyu mukobwa.

Mimi yongeye gushimangira urwo akunda Meddy ubwo ku isabukuru ye uyu mwaka yandikaga amagambo menshi agaragaza ko yamwihebeye.

Ku wa 7 Kanama 2019, yanditse agira ati “Isabukuru nziza rukundo! Uri umunyamutima mwiza. Umutima utagira uko usa, unkoraho mu buryo bunejeje, inshuti yanjye magara […] Uyu munsi ni uwawe rukundo. Ndakwifuriza imyaka myinshi y’ibyishimo ndetse n’ubuzima buzima.”

Ku munsi w’amavuko mu 2019, Meddy yongeye kwereka uyu mukobwa ko yamwihebeye anamubwira ko afite umwanya wihariye mu mutima we.

Amwifuriza isabukuru y’amavuko icyo gihe yagize ati “Uyu munsi ni umunsi udasanzwe! Ni isabukuru y’umwamikazi wanjye Mimi. Uratangaje mu buryo butandukanye, uri mwiza imbere n’inyuma. Imana ikomeze kukurinda, kugundagazaho imigisha, iguhe byinshi bishoboka. Ufite umwanya wihariye mu mutima wanjye. Ndagukunda […]”

Mu mpera za 2018 Meddy yagiye kwerekana mu muryango uyu mukobwa, icyo gihe babanje guca ku ivuko ry’uyu mukobwa Meddy aramutsa abo kwa sebukwe.

Ubwo yari yitabiriye igitaramo cya East African Party cyatangiye umwaka wa 2019 Meddy yeretse uyu mukobwa abakunzi be maze amagambo ashira ivuga.

Meddy yafashe icyemezo asaba Mimi Mehfira ko yamubera umugore
Bombi bamaze igihe baryohewe n'urukundo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .