Master Fire umaze imyaka 16 yiga muri Kaminuza agiye kuyirangiza

Yanditswe na Hakizimana Jean Paul
Kuya 17 Mata 2021 saa 03:11
Yasuwe :
0 0

Hakizimana Innocent wamenyekanye ku izina ry’ubuhanzi rya Master Fire ari kwandika igitabo kizamufasha gusoza icyiciro cya kabiri cya kaminuza amazemo imyaka 16.

Uyu muhanzi watangiye kwiga kaminuza mu 2006 ubwo yajyaga muri Kaminuza y’u Rwanda mu ishami rya Huye, ni umwe mu bamenyekanye cyane mu myaka ya za 2007, 2008 na 2009.

Iki gihe uyu muhanzi yari mu bagezweho mu njyana ya Hip Hop yari igezweho.

Mu 2008, uyu muraperi yagiranye ibibazo na Mutsindashyaka Théonèste wari Umunyamabanga wa Leta muri Minisiteri y’Uburezi bituma ahanishwa kumara imyaka ibiri atiga muri kaminuza.

Yongeye gusubira kwiga mu 2011 nabwo akomeza kumenyekana cyane biturutse ku bitaramo byaberaga i Butare.

Mu myaka yakurikiyeho avuga ko yigaga neza ndetse akanatsinda gusa ngo yaje gutungurwa no kwirukanwa burundu.

Mu kiganiro yagiranye na IGIHE, Master Fire yavuze ko akimara kwirukanwa yahise ajya gutangira muri Kaminuza y’Ikoranabuhanga n’Ubugeni ya Byumba, UTAB, iherereye mu Karere ka Gicumbi, kuri ubu akaba ari kwandika igitabo kizamufasha gusoza amasomo muri uyu mwaka.

Ati “Njye natangiye kaminuza mu 2006, 2007 ntangira guhura n’ibibazo by’ubuzima, mu 2008 nahuye n’ikibazo barampagarika ubwo nashwanaga n’umuyobozi, icyo gihe bampanishije imyaka ibiri nsubirayo mu 2011, nakomeje kwiga neza ariko umuyobozi umwe aza kunyirukana.”

Master Fire yakomeje avuga ko muri UTAB yakurikiranye isomo rya ‘Renewable Energy’, amasomo yose ngo yarayarangije ubu ari kwandika igitabo.

Ati “Ikijya imbere ubu ni ukwiga nkasoza nkashaka akazi, ubu igitabo nicyo ndi kwandika ninsoza nkakora graduation ni ukujya ku isoko nkashaka akazi nk’abandi bantu bose.”

Master Fire avuga ko ubu afite imyaka 37 y’amavuko akaba yicuza ubuzima yagiye anyuramo.

Master Fire yahishuye uko ubu yakiriye agakiza aho asigaye anasengera mu Itorero ry’Abadivantisiti b’umunsi wa Karindwi.

Master Fire ubu uri kwitegura gusoza Kaminuza yakiriye agakiza, twahuye avuye mu isengesho ryo ku wa Gatandatu
Master Fire umaze imyaka 16 yiga muri kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .