00:00:00 IGIHE NETWORK KN KINYARWANDA EN ENGLISH FR FRANCAIS

Hateguwe urugendo mu duce RPA yafashe bwa mbere yinjira mu Rwanda

Yanditswe na Nsengiyumva Emmy
Kuya 26 June 2022 saa 02:23
Yasuwe :

Mu gihe u Rwanda n’Abanyarwanda bakomeje imyiteguro yo kwizihiza ku nshuro ya 28 umunsi wo Kubohora u Rwanda, ‘MB Simba safaris’ itegura urugendo rwo guhugura abantu amateka y’urugamba rwo kubohora u Rwanda ‘Liberation tour’ bongeye kurutegura ku nshuro ya gatatu.

Kuri iyi nshuro, Mariya Yohana, Cyusa na Alouette bose bazwi mu gukora umuziki w’umwimerere bagiye gutaramana n’abazitabira urugendo rwo kwihugura kuri aya mateka.

Uru rugendo rwiswe ‘Liberation tour’ rugiye kuba ku nshuro ya gatatu cyane ko umwaka ushize rwabaye inshuro ebyiri ahasuwe ibice bitandukanye bibumbatiye amateka y’urugamba rwo kubohora u Rwanda.

Muri Nyakanga umwaka ushize, abitabiriye uru rugendo basuye igice cy’Umutara mu gihe mu Ukwakira muri uwo mwaka nanone basuye igice cy’Amajyaruguru ahahoze ari Byumba ndetse na Gicumbi.

Muri uyu mwaka byitezwe ko abazitabira uru rugendo bazasobanurirwa amateka y’ikitwa ‘Agasantimetero’ mu rugamba rwo kubohora u Rwanda.

Kuva mu kwezi kwa karindwi 1991 kugeza mu kwezi kwa gatatu 1992, nibwo ingabo za RPA zagotewe mu gace gato kangana na kilometero zirindwi z’ubutambike n’eshatu z’ubuhagarike, ugana ku mupaka wa Uganda.

Ni mu gace kamenyekanye nka Santimetero bitewe n’uko leta yakitaga, kagizwe n’uduce twa Tabagwe, Gishuro, Kaborogota, Gikoba, Shonga, Ndego n’igice gito cya Karama.

Ingabo za RPA zari muri iki gice ku buryo Perezida Habyarimana yavugaga ko bagomba kuzitsinsura zigasubira hakurya y’umupaka.

Muri Santimetero harimo indake ya Gikoba ifite metero ebyiri umanutsemo hasi, n’ebyiri z’intambike. Iyi ikaba yari irimo akameza n’intebe Perezida Kagame yifashishaga mu gupanga neza urugamba, hirya gato uhasanga aho abayobozi b’ingabo bicaraga ubwo bazaga guhabwa amabwiriza.

Muri Santimemetero kandi uhasanga umusozi wa Shonga uri hejuru cyane ahitegeye indi misozi yari igose Sentimetero, iriho n’imbunda z’umwanzi. Iyo misozi ni Mabare, Bushara 1, Kabuga, Mutojo, Nyamirama, Bushara 2, Kentarama na Nyabihara.

Aha bikaba byitezwe ko bazasura uduce turimo Tabagwe, Gishuro, Kaborogota, Gikoba, Shonga, Kabuga na Karama.

Uru rugendo ruzaba tariki 2-3 Nyakanga 2022, abazarwitabira basabwe kuzaba bambaye imyenda ikoze mu mabara ya gisirikare, bakishyura ibihumbi 100Frw ku muntu umwe n’ibihumbi 160Frw.

Aya akaba arimo amafaranga y’Urugendo, amafunguro yose, icyumba cya hoteli ndetse n’itike yo kwitbira igitaramo cyo kwizihiza umunsi wo kwibohora n’ibindi byinshi.

Abitabira uru rugendo basabwa kugenda bambaye imyenda ya gisirikare
Mariya Yohana, Cyusa na Alouette bazataramana n’abazitabira urugendo rwo kwihugura amateka yo kubohora u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .