Angel Uwamahoro azatanga ikiganiro mu nama ikomeye y’abagore yateguwe na Forbes

Yanditswe na Nsengiyumva Emmy
Kuya 13 Gashyantare 2020 saa 01:26
Yasuwe :
0 0

Umunyarwandakazi uba muri Leta Zunze Ubumwe za Amerika, Angel Malaika Uwamahoro, wamamaye cyane mu guhimba imivugo no gukina ikinamico na filime, yatoranyijwe mu bazatanga ikiganiro muri FORBES WOMAN AFRICA 2020 Leading Women Summit izabera muri Afurika y’Epfo mu Ntara ya Kwa Zulu-Natal.

Ni igikorwa giteganyijwe kuba kuwa 6 Werurwe 2020, ahazahurira ab’igitsinagore batandukanye bo muri Afurika no hanze yayo.

Iki kiganiro kizaba kiba ku nshuro ya Gatanu gifite umutwe ugira uti ‘The Ceiling Crashers 2.0: Power with Purpose’.

Iki gikorwa kimaze kumenyakana cyane ku Isi, kigamije gutera imbaraga abari n’abategarugori baba bitabiriye. Icy’uyu mwaka kizabera ahitwa Inkosi Albert Luthuli ICC Complex i Durban.

Kizakurikirwa n’igikorwa cy’umugoroba wo gutanga amashimwe ku bategarugori babaye indashyikirwa mu cyiswe ‘Forbes Woman Africa awards gala dinner’

Renuka Methil, uyobora ikinyamakuru Forbes Woman Africa yabwiye Risingsunoverport ko abazaba bitabiriye bazaganirizwa ku byatuma umubare w’abagore mu myanya ifata ibyemezo no mu bikorera biyongera.

Iki gikorwa ngarukamwaka kiba mu rwego rwo kwizihiza umunsi w’abagore, uyu mwaka byitezwe ko kizitabirwa n’abarenga igihumbi baturutse mu bice bitandukanye by’isi.

Uyu mwaka hazitabira abarimo abayobozi mu nzego zitandukanye mu by’ubuzima n’ubushabitsi,impirimbanyi mu burenganzira bwa muntu, abarengera ibidukikije, abahanzi b’ingeri zitandukanye bagiye begukana ibihembo n’abandi bagore bazwi ku rwego mpuzamahanga.

Kuri iyi nshuro hazatangazwa urutonde rw’abagore bahize abandi mu cyiswe ‘Africa’s Most Powerful Women’ bazaba batoranyijwe mu bitabiriye.

Malaika watumiwe muri iyi nama asanzwe aba muri Leta Zunze Ubumwe za Amerika.

Yamenyekanye bitewe n’imivugo irimo ubuhanga bukomeye yagiye atambutsa mu mihango ikomeye yabaga yitabiriwe na Perezida Kagame nka Rwanda Day.

Ni umukinnyi w’ikinamico uri ku rwego rwo hejuru kuko yanabashije kugira uruhare mu mukino witwa Miracle in Rwanda ushingiye ku buhamya bwa Immaculée, werekaniwe i Broadway muri New York.

Malaika afite n’impano yo gukina filime aho yakinnye mu yitwa Notre Dame du Nil yaturutse ku gitabo cya Mukasonga Scholastique. Azi no kuririmba cyane ko Dj Marnaud aherutse kumwitabaza mu ndirimbo aherutse gushyira hanze yise ‘Reka Turye Show’.

Uwamahoro yamenyekanye cyane mu mivugo itandukanye
Malaika Uwamahoro azatanga ikiganiro mu nama ikomeye y’abagore yateguwe na Forbes

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .