Madamu Jeannette Kagame yitabiriye igitaramo cya Kassav’ cyanyuze benshi, hemezwa ko hakorwa n’icya kabiri (Amafoto)

Yanditswe na Uwiduhaye Theos
Kuya 15 Gashyantare 2020 saa 10:26
Yasuwe :
0 0

Umunsi wahariwe abakundana wari uw’ibyishimo bikomeye muri Kigali Convention Centre, ubwo ibihumbi by’abantu bakoraniraga mu gitaramo cy’itsinda Kassav’ ryubatse izina mu njyana ya Zouk, biba agahebuzo kuko Madamu Jeannette Kagame yitabiriye iki gitaramo.

Iki gitaramo cyabaye kuri uyu wa 14 Gashyantare 2020, cyitabiriwe bidasanzwe kugeza ubwo bamwe mu baguze amatike batabashije kureba itsinda bihebeye, kubera ubwinshi bwabo.

Umunota ku wundi mu mihanda yegereye cyangwa igana kuri Kigali Convention Centre habereye igitaramo cya Kassav’ na Chritopher Muneza, hari urujya n’uruza rw’abantu n’ibinyabiziga, ndetse bamwe bahitagamo kuva mu modoka bagakoresha amaguru kugira ngo bahagere hakiri kare.

Amatsiko yari yose! Abakunze Kassav’ mu myaka yo mu 1980, 1990, 2000 n’abandi, bagiye banogerwa n’ibihangano byabo bose ku buryo buri gisekuru cyose wasangaga cyisanga mu gitaramo nk’iki cy’imbaturamugabo.

Kwinjira byari 10 000 Frw mu myanya isanzwe, muri VIP 20 000 Frw na 30 000 muri VVIP, ndetse ikinyobwa cyari cyihagazeho ku buryo kuhajyana umukunzi byari ukumwereka ko umuha agaciro kandi uzirikana urukundo rwe.

Guhera saa mbili na 40 kugeza saa tatu na 20 umuhanzi Christopher niwo mwanya yahawe ku rubyiniro, aruvaho asigiye ibyishimo abitabiriye igitaramo.

Saa tatu na 40 nibwo itsinda rya Kassav’ ryagiye ku rubyiniro kugeza saa sita na 20, ryishimirwa mu ndirimbo zitandukanye zakunzwe mu bihe byashize, bigeze ku yitwa ‘Ou Lé’ biba ibindi bindi, kuko abenshi mu bitabiriye igitaramo hafi ya bose bahagurukiye rimwe buri wese agacinya akadiho.

Madamu Jeannette Kagame yageze muri Kigali Convention Centre ahagana saa tatu n’iminota mike, Christopher ari ku rubyiniro, ku buryo Kassav’ yanzitse yahageze.

Abitabiriye iki gitaramo batahanye akanyamuneza abandi batahana ingingimira, cyane ko guhera nyuma ya saa tatu n’igice kwinjira byari ingorabahizi kuko ahabereye igitaramo hari hakubise huzuye, maze abarenga 500 bataha batarebye igitaramo.

Nyuma yo kubona ko iki gitaramo cyitabiriwe mu buryo bukomeye ariko abagiteguye ntibabashe kwinjiza umubare wose w’abari baguze amatike, bahisemo gutegura ikindi kuri uyu wa Gatandatu tariki 15 Gashyantare 2020 muri Kigali Convention Centre nanone, guhera saa munani z’amanywa.

Kwinjira muri iki gitaramo ni 20 000 Frw, mu gihe abari baguze amatike ntibabashe kwinjira ku munsi w’abakundana bemerewe kwinjira mu gihe bayerekanye.

Izina Kassav’ rizwi cyane guhera mu 1979, rifite ubuhanga bwihariye mu njyana ya Zouk. Imyaka 41 irashize rikunzwe bikomeye ndetse ibihangano byaryo binyura ab’ingeri zose, ntibajya babihararukwa.

Kassav’ ifatwa nk’iyatangije injyana ya zouk. Iri tsinda ryatangirijwe muri Guadeloupe mu Bufaransa. Urugendo rwo gushinga Kassav’ rwatangijwe na Pierre-Edouard Décimus wabarizwaga mu itsinda Les VICKINGS ryamamaye kuva mu 1960; wahisemo kwiyegereza Freddy Marshall wari umucuranzi, amugisha inama kuri uwo mushinga.

Yaje no kwiyambaza Georges Decimus [umuvandimwe wa Pierre akaba umuhanga mu gucuranga gitari ya bass] na Jacob Desvarieux wacurangaga gitari akagira urukundo ruhambaye rw’injyana ya Rock na R’n’B.

Aba biyongeyeho Jocelyne Béroard, Jean-Philippe Marthély na Jean-Claude Naimro na Patrick Saint-Éloi witabye Imana mu 2010.

Edouard Décimus wakundaga bihebuje umuziki wari ukunzwe cyane muri Guadeloupe, yagerageje kwiyungura ubumenyi bw’umuziki wari ugezweho. Ni ho havuye injyana ya zouk ikozwe mu mvange ya Rock, Rumba, Samba n’umudiho w’injyana za Kinyafurika.

Ahabereye igitaramo hari huzuye
Madamu Jeannette Kagame yitabiriye iki gitaramo
Madamu Jeannette Kagame yahimbawe kubera umuziki wa Kassav'
Madamu Jeannette Kagame yifatanya n'abandi mu gitaramo
Abantu bari bahimbawe bikomeye muri iki gitaramo
Abenshi bari bambaye amabara yiganjemo umutuku n'umukara aranga umunsi w'abakundana
Kassav' yataramiye abantu biratinda
Ababishoboye babyinnye biratinda
Christopher yashimishije abakunzi be mu ndirimbo nyinshi z'urukundo
Jacob Desvarieux ni umuhanga mu gucuranga gitari
Jean Claude Naimro ucuranga piano muri Kassav’ yanyuze benshi
Jocelyne Béroard ari mu baririmbyi b'abahanga babarizwa muri Kassav', yaririmbye benshi baranyurwa
Kassav' ifite ifite amateka ahambaye muri muzika ku Isi yose, mu gitaramo yakoreye mu Rwanda yizihizaha imyaka 40 imaze
Kassav' ni itsinda rifite umuziki uryohera benshi
Nathalie Munyampenda n'Umugabo we Clement Ndegeya bitabiriye iki gitaramo
Madamu Jeannette Kagame mu ifoto y'urwibutso na Kassav'

Amafoto: Moïse Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza