Lilly Tronn, Umunyarwanda wihinduye umukobwa urisha ikimero ku mbuga nkoranyambaga (Amafoto)

Yanditswe na Uwiduhaye Theos
Kuya 4 Werurwe 2021 saa 07:14
Yasuwe :
0 0

Mu gihe byahoze bimenyerewe ko buri muntu wese kuva akivuka kugera ashaje abarizwa muri kimwe mu bitsina [genders] bibiri birimo icy’abagore, n’abagabo ndetse hamwe na hamwe hakanavugwa abo bita ibinyabibiri, kuri ubu ibitsina abantu babarizwamo bishobora guhinduka uko imyaka yabo y’ubukure yigira imbere. Ibi byatumye ibitsina [gender] abantu babarizwamo biva kuri bibiri cyangwa bitatu birenga 15.

Kuri ubu umuntu ashobora kuvuka ari umukobwa ndetse anafite igitsinagore, gusa uko agenda akura akarushaho kwiyumvamo kuba ari umugabo cyangwa se kimwe mu bindi bitsina [genders] byinshi biriho birenga 15. Icyo gihe biba bishobora kurangira ahinduye igitsina [gender] bityo akaba yahitamo ikindi kijyanye n’uko yiyumva.

Urutonde rw’ibitsina [genders] biriho kuri ubu ndetse binagoye ko byabonerwa inyito mu Kinyarwanda birimo Agender, Androgyne, Bigender, Butch, Cisgender, Gender expansive, Genderfluid, Gender outlaw, Genderqueer, Masculine of center, Nonbinary, Omnigender, Polygender & pangender, Transgender, Trans na Two Spirit.

Ibi bitsina byose biza byiyongera kuri bibiri bisanzwe bimenyerewe “Gabo” [Male] na “Gore” [Female].

Ibi nubwo bitamenyerewe cyane muri sosiyete nyarwanda, n’inaha mu Rwanda abiyumva cyangwa bibara mu bitsina [genders] bitandukanye n’ibyo bavutse babarizwamo bari kwiyongera cyane uko bukeye n’uko bwije, nubwo bigoye cyane kubibona kubera ukuntu bene abo babarizwa mu bitsina bitandukanye n’ibyo bavutse babarizwamo kenshi usanga babaho babihishira.

Hagati aho ariko mu mahanga ho hamaze kugaraga abanyarwanda batari bacye bari mu cyiciro cy’abo tuvuze haruguru. Aba barimo uwahoze ari umusore witwaga Lionel kuri ubu ubarizwa muri Leta Zunze Ubumwe za Amerika, yahisemo kwihindura umukobwa ndetse ahindura n’amazina yiyita ‘Lilly Tronn’.

Lilly Tronn akunze kwifashisha imbuga nkoranyambaga asangiza abamukurikira amashusho n’amafoto bitandukanye byo gushotora abagabo, cyane ko utamenya ko yahoze ari umuhungu kubera imiterere ye.

Afite ikibuno giteye nk’icy’abakobwa, afite amabere ndetse yishyizeho imisatsi imeze nk’iy’abakobwa, inzara ziba zisize nk’iz’abakobwa, anitwara nka bo neza neza. Mbese udasanzwe umuzi ntabwo wahirahira utekereza ko yigeze kuba umuhungu.

Mu kiganiro IGIHE yagiranye n’uwahoze ari inshuti ya Lilly Tronn, yasobanuye ko nyuma yo kwihindura umukobwa, inshuti ze nyinshi yazikumiriye [block] ku mbuga nkoranyambaga kubera ko yabangamirwaga n’uko zabona amashusho ye asangiza abamukurikira harimo n’ayo aba ari gukora imibonano mpuzabitsina.

Yanayobotse inzira yo gushakira amaramuko ku mbuga zicuruza amashusho y’urukozasoni zimwe na Shaddy Boo mu minsi ishize aherutse gutangaza ko yatangiye gukoreraho ubucuruzi, n’ubwo we ataratangira gushyira amashusho arimo ibikorwa by’urukozasoni nka benshi bazikoresha.

Abazi Lilly Tronn bavuga ko yihinduje umukobwa mu 2019, kuri ubu atuye mu Mujyi wa Dallas muri Leta ya Texas.

Lilly Tronn ari mu bihe bya “Transition” ?

Ukurikiranye neza Lilly Tronn ku mbuga nkoranyambaga yifata nk’uri mu cyitwa ‘Transition’. Transition itangirira ku mitekerereze yo kwihinduza igitsina, hakabaho guhinduka umukobwa cyangwa umuhungu ku mutima ndetse no kugira ibyiyumviro byo kwihinduza ku mubiri.

Iyo umuntu amaze kugira iyi mitekerereze nibwo agana abaganga kuko aba yiyumvamo ko igitsina [gender] abarizwamo gitandukanye cyane n’icyo we yavukanye, agafata umwanzuro wo gutangira urugendo rwo kwihinduza igitsina ku buryo abarizwa mu cyo yishimira kandi yumva kimunyuze.

‘Transition’ ishobora gufata amezi cyangwa imyaka. Urebye nk’amafoto ya Lilly Tronn ya kera uhita ubona ko atandukanye cyane n’uw’ubu kubera ko kera agitangira uru rugendo yari afite amabere mato, ikibuno gito ariko byose hifashishijwe uburyo bwa ‘Feminizing hormone therapy’ bwo guhindura imisemburo yari asanganywe ya gisore, ubona harimo itandukaniro bitewe n’uko igihe cyagiye cyicuma.

Inzobere zo mu rugaga rwitwa “Mayo Clinic” rw’ibitaro bya Kaminuza zo muri Leta Zunze Ubumwe z’Amerika zigaragaza ko ubu buryo bukorwa hagamijwe guhindura imisemburo umuntu yari asanganywe yatewe n’impinduka zo mu gihe cy’ubugimbi. Bwifashishwa umuntu ashaka kugira imisemburo y’igitsinagore.

Feminizing hormone therapy yifashishwa mu guhindura ijwi rya kigabo rigahinduka ijwi ryoroshye mu buryo bwa kigore, koroshya umubiri ukarushaho kuba nk’uw’abagore, kugabanya impwemwe kugera zikendereye n’ibindi biranga abagabo bigahinduka.

Muri ubu buryo umuntu ahabwa imiti yo guhagarika imisemburo ya kigabo izwi nka ‘hormone testosterone’ , agahabwa indi ya kigore izwi nka ‘hormone estrogen’ mu kugabanya gukomeza kwiyubaka kw’imisemburo ya kigabo no gukomeza gukuza cyane iya kigore. Impinduka zatewe nabyo zishobora kumara igihe gito cyangwa kirekire.

Feminizing hormone therapy ishobora gukorwa yonyine cyangwa igafatanywa no kwihinduza burundu uwari umugabo akikuzaho igitsina cya kigabo hifashishijwe uburyo bwitwa feminizing surgery.

Feminizing surgery bwo ni uburyo umugabo akoresha ashaka guhuza neza uko agaragara [nyuma yo gukuza amabere, ikibuno n’ibindi] n’imiterere y’igitsina cye [sex], aha haba harimo “top surgery” yifashishwa hongerwa ingano y’amabere na “bottom surgery” ikorwa hakurwaho ibiranga igitsinagabo byose [gushahurwa], umuntu agahangirwa igitsina cy’abagore ku mubiri we.

Gukora ibi bishobora guhenda cyane ndetse bitera ingaruka n’ibindi bibazo bikomeye kuko bisaba abaganga guhoza ijisho ku muntu wabikoze. Ndetse mbere yo kubagwa umuntu asabwa kubanza kugana abaganga bashinzwe gukurikirana abafite ibibazo by’imitekerereze. Umuganga nk’umwe mu basanzwe bakora ibi bikorwa iyo agiye kubikora abanza kwereka uwo agiye kubikorera ibyiza n’ibibi we akihitiramo.

Amwe mu magambo akunzwe kwifahishwa hashingiwe ku buryo abantu biyumva bagendeye ku gitsina

Bijya bigorana cyane mu Rwanda gutandukanya igitsina[gender] ndetse n’igitsina gisanzwe umuntu yifashisha akora ibikorwa birimo imibonano mpuzabitsina n’ibindi. Gusa, nyuma yo gukora ubucumbukuzi twahisemo kubashakira ubusobanuro bw’ibitsina[gender] butandukanye twagaragaje muri iyi nkuru twifashishije imbuga zitandukanye.

Kubera ko Ikinyarwanda akenshi usanga gikennye ku magambo amwe yiganjemo agenda yaduka bitewe n’ibihe arimo n’ubusobanuro bw’izi ‘genders’ ntabwo turaza kwizimba mu magambo turagenda tuzandika mu Cyongereza gusa.

Agender, neutral gender, null-gender, genderless cyangwa neutrois
Umuntu wiyumva nka ‘Agender’, yifata nk’utagira uruhande rushingiye ku gitsinda (gender) na rumwe abarizwamo.

Androgyne

Ufite gender ya androgyne usanga yiyumva nk’umugabo cyangwa umugore icyarimwe cyangwa se yiyumva nk’umugabo cyangwa umugore mo kimwe. Usanga abari muri icyi cyiciro kumenya neza uruhande rwabo bigoye, ashobora kuba ari igitsinagabo akiyumva nk’umugore, cyangwa se ari igitsinagore akuyumva nk’umugabo, hakaba ubwo abivanze.

Bigender

‘Bigender’ aba ari umuntu ufite ‘genders’ ebyiri. Abantu bameze gutya bagaragaza imico y’abagabo n’iy’abagore.

Butch

Abagore n’abakobwa by’umwihariko abaryamana bahuje igitsina (lesbians) bakoresha iri ijambo mu buryo bwo gusobanura imyitwarire y’ubugabo. Ni abakobwa cyangwa abagore baryamana bahuje igitsina ariko rigahabwa umwe muri bo ufite imyitwarire ya kigabo.

Transgender

Iri jambo rikubiyemo abantu bose bagiye bahura n’imbogamizi ndetse no kubarizwa cyane mu bafite igitsina[gender] bavukanye gitandukanye n’uko bateye mu mubiri ndetse n’imyitwarire.

N’ubwo abantu benshi batekereza ku bagabo cyangwa abagore iyo bumvise iri jambo ‘Transgender’, iri jambo na none rinakoreshwa ku bantu batiyumva nk’abagabo cyangwa abagore barimo n’abitwa ‘Non-binary’ cyangwa se ‘genderfluid’.

Cisgender

Ni umuntu ufite imyitwarire na gender bihuye n’igitsina yavukanye. Ni ukuvuga niba ari umugabo wavukanye igitsinagabo, akitwara nk’umugabo.

Gender expansive

Iyi gender isobanurwa nk’ikoreshwa ku bantu baguye imico yabo bwite ijyanye n’ibisobanuro bw’ibitsina, birimo ibiba byitezwe ku uko bisobanurwa, umumaro wabyo n’andi mahame ajyanye nabyo.

Abafatwa nka gender expansive barimo abitwa transgender n’abandi bafite imitekereze yabo ijyanye na gender yagutse kurushaho yarenze uko sosiyete ibakikije ibifata.

Genderfluid

Umuntu ugaragaza ko ari genderfluid, aba afite igitsina [gender] gihinduka hagati cyangwa hanze y’ibyo sosiyete iba itekereza ku gitsina. Uyu ashobora kuba uryamana n’abo bahuje igitsina ariko akaba yanaryamana n’abo batagihuje.

Gender outlaw

Uyu we ntabwo aba yemera ubusonuro bwa sosiyete bw’igitsina[gender] gabo cyangwa gore.

Masculine of center

Akenshi aba- lesbienne[abakobwa baryamana na bagenzi babo] nibo bakunda kuba bari muri iki cyiciro ndetse n’aba-Trans[ababa bifata nk’abatari ibinyabibiri ndetse n’abatagira aho babarizwa mu bijyanye n’ibitsina(genderless)], baba bashaka kugaragaza inyifato mu bijyanye n’ibitsina mu mitwarire isa nk’iya kigabo.

Non-binary

Umuntu umeze gutya ntabwo yishyira mu gatebo k’ibinyabibiri. Abantu nk’aba bashobora no kugaragara nk’abatagira igitsina[genderless].

Omnigender

Uyu we ni wa wundi uba umeze nk’uruvu aho ageze hose, ku buryo yisanisha na buri gitsina bitewe n’aho ari.

Lilly Tronn atarafata umwanzuro wo kwihinduza umukobwa
Lilly Tronn ntabwo wapfa kumenya ko yahoze ari umuhungu
Lilly Tronn yahoze ari umuhungu none asigaye arisha ikimero ku mbuga nkoranyambaga
Byagorana kumenya ko iyi nkumi y'ikimero yahoze ari umusore
Imiterere ye iratangaje, bikini arazambara akaberwa
Ari mu Banyarwanda bake babashije kujya mu mubare w'abihinduje igitsina
Uyu yahoze ari umuhungu none yihinduye umukobwa mu myitwarire ye yose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .