00:00:00 IGIHE NETWORK KN KINYARWANDA EN ENGLISH FR FRANCAIS

Leta y’u Burundi yavuze ku byo kwamagana abahanzi bo mu Rwanda bigaruriye umuziki waho

Yanditswe na Nsengiyumva Emmy
Kuya 13 Mutarama 2023 saa 01:58
Yasuwe :

Minisitiri ufite umuco mu nshingano i Burundi, Amb. Ezechiel Nibigira yasabye abahanzi bo muri iki gihugu gukora cyane bagakora umuziki mwiza kugira ngo bawuheshe agaciro, igisubizo ku bamaze igihe barikomye abanyamahanga kurya amafaranga bakabaye bagenerwa.

Ibikorwa byo kwamagana abahanzi b’abanyamahanga i Burundi byakajije umurego mu mpera z’umwaka ushize, aho abahanzi b’imbere mu gihugu bagaragazaga ko batishimiye ibitaramo birenga bine byatumiwemo abahanzi bo mu Rwanda nyamara ab’iwabo bicira isazi mu jisho.

Ibi byatumye abahanzi b’amazina akomeye i Burundi bahitamo gutegura igitaramo cyabereye i Bujumbura ku wa 30 Ukuboza 2022 mu rwego rwo kwerekana ko n’Abarundi bakunda umuziki wabo.

Ni igikorwa cyari gikurikiye ibyari bimaze iminsi aho abahanzi b’i Burundi batahwemye kurwana inkundura yo kwamagana abanyamakuru, aba DJs n’abategura ibitaramo babashinja guha agaciro abaturuka mu mahanga by’umwihariko mu Rwanda kurusha ab’iwabo.

Aha bavuga ko batumva ukuntu abafite aho bahurira n’iterambere rya muzika bagaragaza intege nke mu guteza imbere abahanzi b’i Burundi ahubwo bakimakaza abanyamahanga mu gihugu cyabo.

Ikindi baba bashingiraho ni uko abahanzi baturuka mu mahanga usanga bahenze kurusha abo mu gihugu bityo bagahamya ko amafaranga y’Abarundi ajya hanze ari menshi nyamara yakabaye agirira akamaro abenegihugu.

Ni inkundura abahanzi banageze aho basaba Leta y’u Burundi kugira icyo ikora kugira ngo ibi bicike.

Mu gusubiza iki kibazo ubwo yari akibajijwe n’abanyamakuru, Minisitiri ufite umuco mu nshingano i Burundi, Amb. Ezechiel Nibigira yasabye abahanzi bo muri iki gihugu gukora cyane bagakora ibintu byiza bikundwa iwabo aho kwijujutira abahandi bajyanayo ibyiza.

Ati “Aha rero genda mukore namwe, kuko Abarundi nimutabaha ibyo bakeneye bazashaka ababibaha. Nkunda iby’u Burundi cyane ariko umuziki tuba dushimisha abantu bacu, mu kubashimisha rero bisaba ko tubaha ibiryoshye.”

Uyu muyobozi yavuze ko ashyigikiye igitekerezo cy’uko abahanzi b’i Burundi bahabwa agaciro iwabo, ariko abasaba ko bakora cyane kugira ngo ibyo bigerweho.

Ati “Mugende mukore umuziki uryoshye, ni nde uzajya guhamagara uwo mu kindi gihugu azi ko ino aha dufite abantu bameze neza batanga umuziki mwiza?”

Ku rundi ruhande ariko uyu muyobozi yasabye abanyamakuru kutamagana ibyo gutumira abahanzi bo hanze.

Ati “Ndabasabye ibyo bintu byo gutumira abo hanze ntimubyange, ndabibasabye. Si bibi rwose, none se twe Abarundi bacu nibabakumira iwabo bizagenda gute? Uko mwemera ko abo baza kuririmba inaha, niko n’umurundi wacu ajyayo akaririmba neza.”

Amb. Ezechiel Nibigira avuga ko ibi bitaramo by’abanyamahanga i Burundi bakwiye kubifata nk’amahirwe yo kugira ibyo babigiraho.

Ikindi yibukije abanyamakuru ni uko ibitaramo bitumirwamo abanyamahanga bikwiye gusiga imisoro i Burundi kandi ntibikorwe n’abanyamahanga gusa ahubwo n’abahanzi b’imbere mu gihugu bagatangira kwiga gusora.

Minisitiri ufite umuco mu nshingano i Burundi, Amb. Ezechiel Nibigira yasabye abahanzi bo muri iki gihugu gukora cyane bagakora umuziki mwiza aho kwivovotera ab'ahandi bakunzweyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .