00:00:00 IGIHE NETWORK KN KINYARWANDA EN ENGLISH FR FRANCAIS

Lee Ndayisaba yahawe gutegura igitaramo cya Wizkid kizabera muri Ghana

Yanditswe na Nsengiyumva Emmy
Kuya 28 Ugushyingo 2022 saa 04:00
Yasuwe :

Lee Ndayisaba uherutse kugirwa umuyobozi wa Kiss FM akaba umwe mu Banyarwanda bazwiho ubuhanga mu gutegura ibitaramo, yahawe inshingano zo guhuza ibikorwa mu gitaramo Wizkid agiye gukorera muri Ghana.

Ni igitaramo gitegerejwe ku wa 10 Ukuboza 2022 kizabera muri stade ya Accra Sports, kikaba icya mbere agiye gukorera muri Afurika nyuma yo gusohora album ye nshya yise ’More Love Less Ego’.

Ibikorwa byo gutegura iki gitaramo cyitezwe cyane n’abakunzi b’umuziki muri Afurika byahawe Lee Ndayisaba.

Mu kiganiro na IGIHE, Ndayisaba yavuze ko na we yatunguwe na telefone y’abajyanama ba Wizkid bamuhamagaye bamubwira ko bamuhisemo nk’uzaba ashinzwe guhuza ibikorwa mu gutegura iki gitaramo.

Ati "Ni ibintu byantunguye cyane, ntiwambaza ngo bagendeye kuki ariko byaranshimishije. Umbajije icyo ntekereza bagendeyeho wenda byaba igitaramo naherukaga gutegura cya Bruce Melodie ndetse n’icyo nateguriye Wizkid i Kigali mu 2016."

Lee Ndayisaba byitezwe ko mu minsi mike ahaguruka i Kigali yerekeza i Accra muri Ghana, icyakora nubwo ari i Kigali, uyu mugabo yavuze ko akazi ko gutegura iki gitaramo akamazemo iminsi.

Ati "Akazi karatangiye, erega njye nshinzwe guhuza ibikorwa byo gutegura iki gitaramo. Hari bimwe mu bikoresho bituruka muri Nigeria, Afurika y’Epfo ndetse n’ibikorwa binyuranye, icyo nshinzwe ni ukumenya aho buri wese n’ibyo ashinzwe."

Lee Ndayisaba aherutse kugirwa umuyobozi wa Kiss FM ndetse yanabayeho umujyanama wa Bruce Melodie ndetse ni na we wamuteguriye igitaramo yakoze mu minsi ishize ubwo yizihizaga imyaka 10 amaze mu muziki.

Mu 2016 nibwo Lee Ndayisaba yateguye igitaramo cyatumiwemo Wizkid mu Rwanda, icyo gihe cyabereye i Rugende ahari hakubise huzura abakunzi b’umuziki.

Wizkid agiye gukorera igitaramo gikomeye muri Ghana
Lee Ndayisaba uherutse kugirwa umuyobozi wa Kiss FM yahawe inshingano zo gutegurira igitaramo Wizkid
Lee Ndayisaba yabayeho umujyanama wa Bruce Melodie
Lee Ndayisaba ni we uheruka gutegurira Wizkid igitaramo i Kigali
Igitaramo Lee Ndayisaba yateguriye Wizkid i Kigali cyitabiriwe ku rwego rwo hejuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .