Sonia Rolland yararikiye abantu kureba filime yakoze k’u Rwanda

Yanditswe na Uwiduhaye Theos
Kuya 13 Mata 2021 saa 04:24
Yasuwe :
0 0

Mu gihe Abanyarwanda bari kwifatanya n’Isi yose mu bihe bikomeye by’iminsi ijana yo kwibuka Abatutsi bishwe muri Jenoside mu 1994, Uwitonze Sonia Rolland, yibukije abantu kureba filime mbarankuru yakoze k’u Rwanda.

Uyu mugore ukomoka mu Rwanda wabaye Nyampinga w’u Bufaransa mu 2000, yanditse ku rukuta rwe rwa Instagram ati “Tugendeye kuri ibi bihe byo kwibuka Jenoside yakorewe Abatutsi mu Rwanda mu 1994, mbatumiye kureba filime yanjye mbarankuru ‘Rwanda: Du Chaos au miracle’.”

Iyi filime mu Kinyarwanda ugenekereje yitwa ‘U Rwanda: Rwavuye mu kaga rujya mu bitangaza’ igaragaza intambwe ikomeye rwateye nyuma ya Jenoside yakorewe Abatutsi mu 1994. Iyi filime imara iminota 52.

Filime ‘Rwanda: Du Chaos au miracle’ ya Sonia Rolland yatangiye kuyifatira amashusho mu 2013 ayirangiza mu 2014, yayikoze afatanyije na mugenzi we Patrick Hernandez wafashe amashusho. Yayerekanye bwa mbere mu Rwanda tariki ya 21 Ugushyingo 2017 muri Kigali Century Cinema.

Yayikoze agamije kwerekana intambwe u Rwanda rwateye mu nguni zose uhereye mu buzima, imiyoborere myiza, ubumwe n’ubwiyunge, ubukungu, uburezi, ubukerarugendo ndetse by’umwihariko yikije ku buryo Abanyarwanda babanye mu mahoro nyuma y’uko mu 1994 Abatutsi bakorewe Jenoside ‘yari yarateguwe’ bigizwemo uruhare n’ubutegetsi.

Muri iyi filime Sonia Rolland yashyizemo ubuhamya bw’abarokotse Jenoside n’uburyo babanye n’ababiciye.

Yanakoreshejemo abantu bazwi mu Rwanda barimo Albert Rudatsimburwa, Sayinzoga Jean, Nasson Munyandamutsa [witabye Imana], Tito Rutaremera, Louise Mushikiwabo uyobora OIF, Dr Agnes Binagwaho, Gen. Paul Rwarakabije n’abandi.

Mu kuvuga neza aho u Rwanda rwavuye n’aho rugeze ubu, Sonia Rolland yifashishije abahanga mu mateka nka Marcel Kabanda, François Robinet ndetse n’umwanditsi ukomeye Benoît Guillou [wanditse igitabo “Le pardon est-il durable? Une enquête au Rwanda”].

Muri iyi filime, Sonia Rolland yageze mu bice bitandukanye by’igihugu akivuga uhereye ku Ngoma ya Cyami kugeza ubwo cyayobowe na Perezida Paul Kagame. Ayimurika yavuze ko ‘yayitanze nk’impano ku Rwanda’.

Inkuru iri muri iyi filime ibarwa na Sonia muri ngenga ya mbere y’ubumwe [asa n’uvuga inkuru yihuza nayo] aho asobanura neza uburyo u Rwanda rwanyuze mu bihe by’icuraburindi ariko rukaba ruri kwiyubaka mu buryo bwihuse.

Ushaka kureba iyi filime wakanda hano

Sonia Rolland ubwo yamurikaga iyi filime mu Rwanda
Patrick Hernandez ni we wafashe amashusho ya filime ya Sonia Rolland

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .