00:00:00 IGIHE NETWORK KN KINYARWANDA EN ENGLISH FR FRANCAIS

Ku myaka 36, Judith Heard agiye gusubira mu ishuri gusoza ayisumbuye

Yanditswe na Nsengiyumva Emmy
Kuya 19 May 2022 saa 04:31
Yasuwe :

Umunyamideri Kantengwa Judith wubatse izina mu kumurika imideri nka Judith Heard w’imyaka 36, ari mu myiteguro yo gusubukura amasomo agasubira ku ishuri kurangiza ayisumbuye yasubikiye mu wa gatanu.

Judith Heard wize amashuri abanza muri Kigali Parents School agakomereza amashuri yisumbuye muri FAWE Girls School aho yize Icyiciro rusange cy’amashuri yisumbuye.

Ageze mu mwaka wa kane w’amashuri yisumbuye, Judith Heard yerekeje muri APRED Ndera kwigayo Ubumenyamuntu [Sciences Humaine], agarukira mu mwaka wa gatanu ahita yerekeza muri Uganda.

Nyuma yo kwerekeza muri Uganda Judith Heard, avuga ko yahugiye mu byo gushaka ubuzima ndetse anayoboka iyo kumurika imideri birangira adasubiye ku ishuri.

Mu kiganiro cyihariye yahaye IGIHE, Judith Heard yavuze ko yahisemo gusubira ku ishuri kugira ngo arangize ayisumbuye byanagenda neza agakomereza muri Kaminuza.

Ati “Kuba ntarabashije kurangiza amasomo biri mu bintu bimbabaza, yego ntabwo nabitekerereje igihe ariko aho bigeze ndashaka gusubira kurangiza ayisumbuye. Nta pfunwe biteye kujya kurangiza ayisumbuye, Imana yamfasha nkanakomeza Kaminuza.”

Judith Heard wifuza gukomeza kwiga ibijyanye na Sciences Humaine yavuze ko iki gitekerezo akimaranye igihe ndetse byamusabye guhindura byinshi ku buzima bwe.

Ati “Ubu muri Kampala hari abakubwira ko bambuze kuko batakimbona mu bubari amajoro yose, nahisemo kureka inzoga n’ibindi byantwaraga umwanya w’ubusa kuko hari ibyo nashakaga guhindura ku buzima bwanjye. Mfite imishinga myinshi ndi gutekereza ariko uwihutirwa ni ukubanza gusubira ku ishuri nkarangiza ayisumbuye nkaba nanakomeza muri Kaminuza.”

Iki ni igitekerezo Judith Heard agize nyuma y’iminsi yitabira amarushanwa y’ubwiza nka Miss Elite World yakuyemo irya Miss Elite Africa ndetse n’irya Miss Environment World yegukanyemo nanone Miss Environment Africa.

Ku myaka 36, Judith Heard agiye gusubira mu ishuri gusoza ayisumbuye
Judith Kantengwa wifuza kurangiza amashuri yisumbuye yavuze adatewe ipfunwe no gusubira mu ishuri akigana n'abandi mu mashuri yisumbuye
Judith Heard amaze iminsi yitabira amarushanwa y'ubwiza ubusanzwe yitabirwa n'abato kandi akegukana amakamba
Kugeza ubu Judith Heard avuga ko yamaze guhagarika inzoga n'ibindi byamuteshaga gahunda bitewe n'intego yihaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .