00:00:00 IGIHE NETWORK KN KINYARWANDA EN ENGLISH FR FRANCAIS

Koffi Olomide yatokoye Tshisekedi, yerekana imungu yamunze RDC

Yanditswe na Umwali Zhuri
Kuya 5 August 2022 saa 05:45
Yasuwe :

Koffi Olomide yashyize hanze indirimbo iri mu Lingala, yise “Miyibi’ bishatse kuvuga ‘Abajura’ aho agaruka ku bibazo igihugu cye gifite, birimo abayobozi badakunda igihugu ahubwo banyereza umutungo w’igihugu mu nyungu zabo bwite.

Ni indirimbo iri mu njyana ya Rumba, ariko itandukanye n’izindi z’Abanye-Congo aho baba babyina bizihiwe. Yo icuranze mu buryo bumeze nk’aho abantu bari mu kiriyo ndetse n’imyenda bambaye, ni amabara Abanye-Congo bakunda kwambara mu gihe cy’agahinda, umukara n’umutuku.

Igaragaramo amashusho yafatiwe mu Biro by’Umugenzuzi Mukuru w’Imari ya Leta, IGF [Inspection General de Finance], aho Koffi aba aririmba uburyo umutungo w’igihugu utikira.

Mu magambo amwe n’amwe uyu mugabo ufatwa nk’umwami wa Rumba aririmba, harimo nk’aho aririmba ko amafaranga agenewe imishahara y’abakozi, yakoreshejwe mu kubaka inzu y’akataraboneka y’umugore wa gatatu.

Ntavuga mu mazina abayobozi banyereje umutungo ariko ingero atanga zigaruka ku bikorwa bya Perezida Tshisekedi, ibya Vital Kamerhe wahoze ayobora ibiro bye n’abandi.

Aririmba ko amafaranga y’imishinga igenewe kwita ku bafite ubumuga, yakoreshejwe mu kugura imodoka igezweho ya Ferrari ya murumuna wa Perezida.

Uwo murumuna wa Perezida aba aririmba ni Christian Tshisekedi. Aherutse kugura Ferrari itukura.

Ku rundi ruhande, Koffi aririmba ko amafaranga agenewe kugura intebe zo mu mashuri, anyerezwa akagura inzu z’akataraboneka muri Espagne n’ahandi. Ni mu gihe bivugwa ko Perezida Tshisekedi afite inzu zigezweho ku mugabane w’u Burayi.

Ati “Umushahara w’abakozi wakoreshejwe mu kubaka inzu y’umugore wa gatatu, amafaranga yari agenewe kugura intebe z’abanyeshuri yakoreshejwe mu kugura inzu igezweho muri Espagne [...] muhagarike gufata Abanye-Congo nk’ibicucu.”

Yanavuzemo uburyo igihugu kiri kugurishwa agace ku kandi, ibirombe by’amabuye y’agaciro bikaba byareguriwe Abanya-Liban n’Abashinwa.

Mu nyikirizo avugamo ko abaturage badakunda igihugu cyabo, ko ababyeyi badashoboye konsa abana babo, ko abantu bageze aho baryana ku buryo igihugu cyose cyuzuye abajura.

Yakomeje agira ati “Bari kugurisha igihugu agace ku kandi. Nta munye-congo ukunda igihugu cye.”

Hari bamwe buririye kuri iyi ndirimbo bakumvikanisha ko abayobozi ba RDC bakwiriye guhagarika gukomeza kuvuga ko ibibazo igihugu gifite bituruka ku Rwanda, ahubwo bo bagasobanura aho umutungo wa leta ujya.

Koffi Olomide yakoze indirimbo ivuga ku bikorwa byo kunyereza umutungo biri mu gihugu cye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .