00:00:00 IGIHE NETWORK KN KINYARWANDA EN ENGLISH FR FRANCAIS

Album King James amaze gucuruzamo miliyoni 66 Frw igiye kujya kuri YouTube

Yanditswe na Nsengiyumva Emmy
Kuya 9 June 2022 saa 07:49
Yasuwe :

Ruhumuriza James uzwi nka King James agiye gushyira kuri YouTube album ye ya karindwi ‘Ubushobozi’, amaze gusaruramo arenga miliyoni 66 Frw kuva mu Ukuboza 2021 ubwo yayishyiraga ku rubuga rwe rucururizwaho ibihangano.

Mu ntangiriro z’Ukuboza 2021 nibwo King James yamuritse ku mugaragaro urubuga ‘Zana Talent’ ahita ashyiraho album ye nshya, atangaza ko ushaka kuyumva ariho honyine azajya ayikura. Icyo gihe album ye yaguraga 5 000Frw.

Iki gihe King James yavugaga ko agamije gushyiraho uburyo umuhanzi w’Umunyarwanda yakwifashisha agakorera amafaranga mu bihangano bye bitabaye ngombwa ko ayoboka isoko ryo muri Amerika no ku mugabane w’ u Burayi.

Nyuma y’amezi atandatu agurisha album ye kuri uru rubuga King James yahishuye ko gucuruza kopi 13 347, zingana na 66 735 000Frw.

King James avuga ko ari ibintu byo kwishimira kuko byari inshuro ya mbere yari agurishije ibihangano bye muri ubu buryo, byongeye ku rubuga benshi batamenyereye.

King James avuga ko abantu bamaze kumenya urubuga rwe kuko byibuza 3 303 577 basuye album ye.

Nyuma yo gucuruza iyi album, King James avuga ko ari gutekereza ku bakunzi be batabashije kuyigura, kuri ubu akaba agiye gutangira kuyibumvisha yifashishije YouTube.

Ati “Hari abatarabashije kugura album ariko bifuza kuyumva, igihe kirageze nabo mu minsi mike ngiye kuyibaha binyuze kuri YouTube. Kuva ku wa 24 Kamena 2022 album yose iraba yagezeho.”

Album nshya ya King James iriho indirimbo 17 zirimo ‘Ejo’, ‘Ubanguke’, ‘Ndagukumbuye’ ye na Ariel Wayz, ‘Ubushobozi’, ‘Ubudahwema’, ‘Habe namba’, ‘Uhari Udahari’ , ‘Uyu Mutima’, ‘Nyabugogo’, ‘Reka gukurura, ‘Kimbagira’, ‘Nyishyura Nishyure, ‘Ikiniga, ‘Nzakuguma Iruhande’, ‘Pinene yahuriyemo na Bulldogg, ‘Hinduka’ na Inshuti Magara yakoranye na Israel Mbonyi.

Kanda hano ubashe kugura album ya King James

King James avuga ko gucururiza album ye ku rubuga rwe byavuyemo inyungu ikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .