00:00:00 IGIHE NETWORK KN KINYARWANDA EN ENGLISH FR FRANCAIS

Kim Kardashian yasabye imbabazi ku bw’ibibazo umuryango we watewe na Ye

Yanditswe na Uwiduhaye Theos
Kuya 26 May 2022 saa 03:51
Yasuwe :

Umunyamideli Kim Kardashian yagaragaje ko yicuza ibihe bikomeye umuryango we wanyuzemo biturutse ku muraperi Kanye Omari West usigaye akoresha amazina ya Ye muri muzika wari umugabo we mu myaka yashize.

Uyu mugore yabivugiye mu kiganiro The Kardashians kinyura kuri Televiziyo Hulu yisegura ku kuba Ye yarasebeje umuryango we imbere ya rubanda.

Muri iki kiganiro yari yicaranye na nyina Kris Jenner, abavandimwe be Kourtney Kardashian, Khloé Kardashian na Kendall Jenner. Hari kandi n’umukunzi wa Kris, Corey Gamble n’umugabo wa Kourtney, Travis Barker.

Yagize ati “Abagabo benshi ntabwo basebya ababyeyi b’abana babo kuriya mu ruhame.”

Murumuna we Khloé Kardashian bari kumwe yahise avuga ko ibyo uyu mugabo yakoze nk’umuryango babyakiriye, kandi badateze kwicara ngo baterane amagambo na we.

Kris Jenner yavuze ko ibintu bibi iyo bivuzwe kuri umwe mu muryango we bibabaza, ati “Iyo abantu bari kuvuga ibintu by’iteshagaciro ku muntu umwe muri twe, birababaza kubera ko umunsi umwe abana bawe bazabisoma bakanabibona ndetse n’ibintu buri wese akwiriye kwitondera.”

Khloé yahise yunga mu rya nyina abwira mukuru we [Kim Kardashian] kutazigera yicuza kuba yarabereye umuntu mwiza Ye. Undi nawe mu kumusubiza avuga ko bigoye guhagarika ibyo Ye akunze gukora asebya umuryango we ariko akaba agiye guhangana na byo.

Yakomeje agaragariza umuryango we ko azi ingaruka urukundo rwe na Ye rwawugizeho, ati “Mumbabarire. Namukingiye ikibaba kenshi ariko nyuma naje kuvuga ko ibyabaye bitazongera kubaho. Nibura bwa rimwe mu buzima numvise nkomeye. Ntabwo nzongera kwihanganira umuntu uwo ariwe wese ko ababangamira muri buriya buryo cyangwa ngo yongere kubinkora.”

Kuva mu mwaka ushize byatangira guhwihwiswa ko Pete Davidson na Kim Kardashian bari mu munyenga w’urukundo, Ye yahise atangira kugira akangononwa abibasira bombi.

Hari igihe yaserereje Pete ko abana n’ubwandu bwa virusi itera SIDA, anavuga ko uyu munyarwenya afite amakenga ko azatuma uyu wahoze ari umugore we aba imbata y’ibiyobyabwenge nk’uko na we bimeze.

Kim Kardashian we uyu muraperi yavuze ko yashimuse abana babyaranye uko ari bane ndetse akaba asigaye abamwimaho uburenganzira. Hari n’igihe yigeze guserereza Kris Jenner amwita izina rya “Kris Jong-Un’’ amusanisha na Perezida wa Korea ya Ruguru, Kim Jong Un uzwiho kugira ubugome.

Nubwo byari bimeze gutyo ariko Julia Fox wahoze akundana na Ye mu minsi yashize, yavuze ko ibyo yakoraga nta kibazo we abibonamo. Ubu Ye acuditse na Chaney Jones.

Kim Kardashian bwa mbere yasabye kuba ingaragu mu Ukuboza umwaka ushize muri Werurwe uyu mwaka aza kubyemererwa, byari nyuma y’uko yari yasabye gatanya muri Gashyantare uwo mwaka. Aba bombi bari basezeranye kubana akaramata mu 2014 bafitanye abana bane.

Ye na Kim Kardashian mu minsi yashize bateranaga amagambo mu buryo bukomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .