00:00:00 IGIHE NETWORK KN KINYARWANDA EN ENGLISH FR FRANCAIS

I Kigali hateguwe igitaramo kitazakandagiramo abari munsi y’imyaka 18

Yanditswe na Nsengiyumva Emmy
Kuya 27 April 2022 saa 11:22
Yasuwe :

Mu mujyi wa Kigali hari gutegurwa igitaramo cyo kwiyibutsa imiziki yo mu myaka yo hambere cyiswe ‘Oldies Music Festival’, kikazacurangwamo imiziki yo mu myaka yo kuva mu 1980 kugeza mu 2000.

Iki gitaramo cyakumiriwemo abatarageza imyaka 18 byitezwe ko kizaba ku wa 27 Gicurasi 2022. Kizitabirwa n’aba DJs bakanyujijeho mu myaka yo hambere.

Basile Uwimana uri mu bari kugitegura, yabwiye IGIHE ko batekereje iki gitaramo mu rwego rwo kwibutsa abantu ibijyanye n’imyaka yo hambere.

Ati “Ni igitaramo kizacurangwamo indirimbo zo guhera mu 2000 kugeza muri za 1980. Turifuza gusubiza abantu mu myaka yo hambere bakiyibutsa ibihe bagize. Tuzaba dufite aba DJs b’abanyarwanda bacurangaga muri iyo myaka bazaba basusurutsa abakunzi b’umuziki n’aba MCs bari basanzwe bakora muri iyo myaka.”

Uyu mugabo yavuze ko abazitabira iki gitaramo bazasabwa kwambara imyambaro yo mu myaka yabo ku buryo bizaba ari ibirori byo kwiyibutsa ahahise.

Icyakora muri iki gitaramo ngo abari munsi y’imyaka 18 ntabwo bemerewe kucyitabira. Uwimana yabwiye IGIHE ko bahisemo kukirekera abantu bakuru gusa kugira ngo biyibutse ibihe bya cyera.

Ati “Abari munsi y’imyaka 18 twahisemo kubareka, ni igitaramo twahariye abantu bakuru gusa, abakiri bato bazatwihanganire turashaka ko abazakitabira bazaba biyibutsa ibihe byabo. Urumva rero ko abana batazibona.”

Uwimana yavuze kandi ko kimwe mu biteganyijwe harimo kuzahemba abazaseruka barimbye kurusha abandi.

Nubwo hatahise hatangazwa aho kizabera, Uwimana yavuze ko hagomba kuzaba ari ahantu h’amateka benshi basohokeraga mu myaka yo hambere ku buryo kuhasubira nabyo ubwabyo bizaba bifite kinini bisobanuye.

Igitaramo 'Oldies Music Festival' kizitabirwa n'inarawubyinnye kuko hazacurangwa indirimbo zo kuva mu 1980 kugeza mu 2000

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .