Kassav’, itsinda ry’abanyabigwi bamaze imyaka 41 bahesha ikuzo injyana ya Zouk ku Isi

Yanditswe na Ishimwe Israel
Kuya 13 Gashyantare 2020 saa 11:06
Yasuwe :
0 0

Izina Kassav’ rirazwi cyane! Mu 1979 nibwo iri tsinda rifite ubuhanga bwihariye mu njyana ya Zouk ryabonye izuba. Imyaka 41 irashize rigifite igikundiro ndetse ibihangano byaryo binyura ab’ingeri zose.

Kassav’ ifatwa nk’iyatangije injyana ya zouk. Iri tsinda ryatangirijwe i Guadeloupe mu gace ka Caraïbes mu Bufaransa mu 1979. Urugendo rwo gushinga Kassav’ rwatangijwe na Pierre-Edouard Décimus wabarizwaga mu itsinda ryitwa Les VICKINGS ryamamaye kuva mu 1960; uyu yahisemo kwiyegereza Freddy Marshall na we wari umucuranzi, amugisha inama kuri uwo mushinga.

Yaje kwiyambaza Georges Decimus [umuvandimwe wa Pierre akaba umuhanga mu gucuranga gitari ya bass] na Jacob Desvarieux wacurangaga gitari akagira urukundo ruhambaye rw’injyana ya Rock na R’n’B.

Aba biyongeyeho Jocelyne Béroard, Jean-Philippe Marthély na Jean-Claude Naimro na Patrick Saint-Éloi witabye Imana mu 2010.

Edouard Décimus wakundaga bihebuje umuziki wari ukunzwe cyane mu gace ka Guadeloupe, yagerageje kwiyungura ubumenyi bw’umuziki wari ugezweho. Ni ho havuye injyana ya zouk ikozwe mu mvange ya rock, rumba, samba n’umudiho w’injyana za Kinyafurika.

Urubuga rwa Kassav’ rugaragaza ko ku ikubitiro abayigize bakoreshaga umuziki ufite umudiho w’ingoma nini zikoreshwa mu Bufaransa zizwi nka Gwoka zifashishwaga muri Guadeloupe. Ubusanzwe izina Kassav’ rifite igisobanuro cy’umwumbati.

Pierre-Edouard Décimus ni we watangije Kassav’

Kassav’ umuziki wayo yawubakiye ku ruvangitirane rw’umudiho w’imbyino zizwi nka Haitian kompa yamamaye muri Haiti mu 1955; Dominica Cadence-lypso igizwe n’imbyino za cadence rampa zo muri Haiti na calypso zikomoka muri Trinidad & Tobago zanamamaye mu bihugu byo muri Caraïbes bivuga Icyongereza. Byiyongeraho injyana yakunzwe cyane muri Cameroun mu myaka ya za 1980.

Umuziki wayo ufite isoko ku ruvange rw’injyana ya cadence-lypso cyangwa izakoreshejwe n’amatsinda arimo compas bands, Grammacks, Exile One, Les Aiglons na Experience 7 yamamaye mu 1970.

Ahagana mu 1980, Kassav’ yazamuye ibendera ry’umuziki wo muri ako gace, yifashisha ikoranabuhanga ryari rigezweho ryo gutunganya indirimbo i Paris biyiha amahirwe yo kwicara ku ntebe y’icyubahiro muri Zouk.

Kassav’ yari imaze kugenda yaguka yinjiye bwa mbere muri studio mu Ugushyingo n’intangiriro za 1979, inakora album ya mbere yise ‘‘Love and Ka Dance’’. Yakurikiwe n’iyitwa Lagué moin yo mu 1980.

Mu 1984, album "Yélélé" yatumye izina rya Kassav’ rigera hanze y’imipaka ya Guadeloupe n’u Bufaransa.

Iri tsinda ryataramiye mu Bufaransa mu 1985 no mu ntangiriro za 1986, mu kwishimira intambwe yatewe yo kugurisha CD zirenga ibihumbi 500 kuri album imwe bizwi nka Gold mu gikorwa cyahuje abasaga 40,000 muri Guadeloupe. Yahembwe nk’itsinda ryiza mu 1988.

Iri tsinda ryitwaga ‘‘Soukwé kò’w’’ cyangwa ‘‘Kassav’’’, ryaranzwe n’urujya n’uruza rw’abacuranzi n’abahanzi bagendaga bagaruka kuva mu 1984.

Muri icyo gihe abahanzi bo mu Birwa bya Antilles bakoraga umuziki nk’umwuga bari mbarwa; umuziki wakorwaga nk’uburyo bwo kuryoshya, si benshi bawufataga nk’umwuga ushobora gushingirwaho imibereho.

Kassav’ yinjiye mu muziki byeruye ndetse itangira gutunganya album aho imaze gukora izigera kuri 15 yakoze nk’itsinda [utabariyemo amashusho yafatiwe mu bitaramo] na album zirenga 30 zakozwe n’abayigize.

Mu kwigarurira igikundiro mu bakunzi ba Zouk mu Bufaransa, album zayo za mbere zatanzwe na Sonodisc, Sosiyete ikora mu bijyanye no gusakaza CD [zakoreshwaga icyo gihe] yashinzwe na Marcel Perse na Michel David, itangirizwa mu Mujyi wa Paris mu 1970.

Hagati ya 1984 na 1987, Kassav’ yabarizwaga mu biganza bya label ya GD Productions ya Georges Debs.

Aya masezerano yatumye Kassav’ ihagarara yemye ikora album zifite umwimerere kandi zikorewe muri studio zikomeye i Paris.

Kassav’ yahinduye umuvuno kuva icyo gihe yiyemeza nibura gukora album imwe buri mwaka iri ku izina ryayo ariko zikaba zagera kuri eshatu zivuye mu bayigize.

  • Iyaguka rya Kassav’

Ukuboza kwa 1984 kwaciye amarenga yo guhirwa no kwamamara kwa Kassav’ mu ruhando mpuzamahanga. Indirimbo ‘‘Zouk La Sé Sèl Médikaman Nou Ni’’ yari kuri album ya Georges na Jacob, yari icuranze mu njyana ya Zouk kandi iryo zina ryatanzwe n’abafana.

Ubusanzwe ‘Zouk’ ni ijambo ryakoreshwaga kuva mu myaka yo mu 1960 abantu bashaka gusobanura ibirori bitunguranye cyangwa umugoroba wo kwizihirwa.

Umuziki wa Kassav’ niwo wacurangwaga cyane muri icyo gihe ahantu hatandukanye kugera no kuri za radio.

Mu 1985 Kassav’ yakoreye urugendo rwayo rwa mbere muri Afurika, aho yataramiye abakunzi b’umuziki basaga 90 000 mu Mujyi wa Luanda muri Angola.

Kassav’ ubwo yataramiraga muri Angola hari abafana benshi

Mu gitaramo yakoreye bwa mbere i Paris, abasaga 250 000 baracyitabiriye ahazwi nka Esplanade de Vincennes. Cyari ikimenyetso ko umuziki ugenda waguka cyane.

Mu Ukuboza 1986, umuhanzikazi Jocelyne Béroard yakoze album ye ya mbere, aba umugore uteye iyo ntambwe mu bo mu Birwa bya Antilles. Imwe mu ndirimbo ze yitwa ‘‘Kolé séré’’ yakoranye na Philippe Lavil yabaye ku mwanya wa kabiri w’indirimbo 50 zikunzwe mu Bufaransa, inyuma ya Joe Le Taxi y’Umufaransa Vanessa Paradis.

Kuva icyo gihe, umuziki wa Kassav’ wakuriwe ingofero bidasanzwe. Byatumye Sony Music yari igifite izina rya CBS Records (1965–1991), isinyana n’iryo tsinda kuko aribwo buryo bwashoboraga gutuma iryigarurira cyane ko ryari rimaze kwemeza ko rishoboye.

Ibifashijwemo na CBS mu 1987 yasohoye album "Vini Pou", iyikurikiza "Majestik Zouk" yagiye hanze mu 1989. Muri iyi myaka yombi nibwo iri tsinda ryatangiye no guhabwa ibihembo bitandukanye.

Kassav’ yatandukanye na Sony Music mu 2002, ndetse Patrick Saint Eloi ava muri iri tsinda ajya gukora umuziki nk’uwigenga; yaje kwitaba Imana mu 2010.

Georges Décimus wavuye muri iryo tsinda mu 1991, akajya gushinga itsinda rya muzika ryitwa Volt Face, yasimbuwe na Frédéric Caracas ariko aza kugaruka muri Kassav’ mu 2004.

Mu 2004, Georges Décimus yongeye kwiyunga na Kassav’ yari yaravuyemo

Guy Nsangué wacurangaga guitar bass yasimbuwe na Stéphane Castry hagati ya 2002 na 2004 mbere y’igaruka rya Georges Décimus.

Indirimbo yitwa “Zouk-la-sé Sel Médikaman Nou Ni” iri kuri album ya Yélélé yo mu 1984, yazamuye izina rya Kassav’. Yacuranzwe mu tubari, utubyiniro ndetse imbyino yayo ikundwa n’abo muri Amerika y’Epfo, u Burayi, Afurika, Aziya na Brésil aho abenegihugu bahimbye imbyino bayita Brasazouk.

Kwamamara kwa Kassav’ ntikwagarukiye mu muziki gusa kuko abanyamuryango bayo banayobotse cinema mu 1992. Bakinnye muri film yayobowe na "Simeon".

Indirimbo za Kassav’ zakunzwe cyane zirimo ‘Ou Lé’ yahuriyemo Toofan ft. Jacob Desvarieux imaze kurebwa n’abantu barenga miliyoni eshanu ku rubuga rwa Youtube mu mwaka usaga ishyizweho; “Kolé Séré’’, ‘‘Rété’’, “Sye bwa”, “Solei”, “Sé dam bonjou”, “Wép wép”, “Zouk la se sel medikaman nou ni”, “Mwen di ou awa”, “Oh Madiana”, “Doméyis”, “Siwo”, “Pa bizwen pale” n’izindi.

Muri album zakunzwe za harimo "K’Toz" yo mu 2004; "Saga" yakorewe muri Label ya Warner Music France mu 2009; ’Kassav n°3 yo mu 1982; ’Difé’ yo mu 1995; "Tékit izi" yo mu 1992.

Mu guhuza uwo muziki unyura amatwi niho ubwamamare bwa Kassav’ bufite isoko! Iri tsinda ryaramamaye ndetse rikorera ibitaramo by’imbaturamugabo mu bihugu bitandukanye ku Isi.

Kuva mu 1979, Kassav’ yihariye igikundiro ku Isi yose. Mu 1985, iri tsinda nibwo ryatangiye kuzenguruka mu bice bitandukanye by’Isi. Ryataramiye muri Congo Brazzaville, Sénégal, Amerika, u Buyapani, u Burusiya, Amerika y’Epfo, Afurika n’ahandi.

  • Kassav’ yatanze ibyishimo, inahosha imvururu

Mu bitaramo bikomeye, Kassav’ yakoreye muri Afurika harimo n’icyo muri Angola cyabereye mu Mujyi wa Malanje muri Angola mu 1985. Ni igitaramo cyitabiriwe n’abantu bagera ku 90 000.

Yanyuzwe n’ibihe yahagiriye cyane ko icyo gitaramo cyatanze agahenge ku makimbirane ya gisivili yari amaze imyaka 10 muri iki gihugu.

Byatumye igaruka kuhataramira muri Zouk Festival yabaye ku wa 16 Nzeri 2018.

Icyo gihe Jocelyne Béroard yabwiye itangazamakuru ko ‘‘Ni ibyishimo kugaruka hano kuko Kassav’ ifitanye igihango n’abatuye Angola kuva mu 1985.’’

-  Amatariki y’ingenzi mu buzima bwa Kassav’

  • 1985: Yakoze igitaramo cya mbere i Zénith de Paris cyitabiriwe n’abantu 8000.
  • 1986: Album ya Jacob Desvarieux na Georges Decimus yitwa ‘‘Yélélé’’ yagurishije kopi zirenga ibihumbi 500.
  • 1987: Yataramiye abasaga 70 000 mu gitaramo cyabereye muri Komini ya Baillif muri Guadeloupe.
  • 1989 : Yabaye itsinda rya mbere ry’abirabura ryataramiye amajoro atatu muri Leta Zunze Ubumwe z’Abasoviyete (URSS)
  • 1991: Georges Decimus yavuye mu itsinda, asimburwa na Frederic Caracas.
  • 1992: Yagaragaye muri film ya Euzhan Palcy ‘‘Siméon’’ yakozwe ku mateka yayo mu muziki.
  • 1999: Yakoze isabukuru y’imyaka 20 ishinzwe, yakoze ibitaramo bibiri byabereye Bercy ahateraniye abantu 34 000.
  • 2009: Yizihije isabukuru y’imyaka 30 mu birori byabereye muri Stade de France.

-  Ibihembo n’amashimwe bya Kassav’

  • 1988: Best Group muri Victoires de la Musique yo mu Bufaransa.
  • 1989: Best Group mu bihugu bivuga Igifaransa, Francophonie
  • 1990: Best performing Group muri African Referendum ya RFI
  • 1993: Best Zouk Group muri West Indies Awards, New York - USA
  • 1994: Best Group muri Curacao / Best Concert – Curacao
  • 1997: Best Group – Africar Awards, Libreville – Gabon
  • 1999: Best Performing Group – Music Awards, Martinique
  • 2001: Prix SACEM Guadeloupe du Meilleur zouk

Abahanzi bayibarizwamo na bo bagiye bahabwa ibihembo bitandukanye birimo iby’abanditsi, abaririmbyi beza, album nziza muri Guadeloupe, Martinique, Afurika no muri Caraïbes.

Ngayo amateka y’itsinda ry’abanyabigwi ritegerejwe i Kigali ku wa 14 Gashyantare 2020. Kassav’ yatumiwe mu gitaramo kizabera muri Kigali Convention Centre ku munsi w’abakundana, aho izafatanya na Christopher Muneza umaze imyaka icumi mu muziki.

Kucyinjiramo ni 10 000 Frw mu myanya isanzwe, 20 000 Frw muri VIP na 30 000 muri VVIP. Amatike agurirwa kuri https://rgtickets.com/ n’ahandi hantu hatandukanye.

Iri tsinda rizava i Kigali ryerekeza mu bindi bitaramo rizakorera i Berlin mu Budage n’i New York muri Amerika.

-  Indirimbo "Zouk La Sé Sèl Médikaman Nou Ni” yatumbagije Zouk ya Kassav’

-  ’Ou lé" ya Kassav’ iracyakunzwe bihambaye

-  Reba indirimbo ‘‘Soleil’’ ya Kassav’

Igitaramo Kassav’ yizihirijemo isabukuru y'imyaka 30 cyitabiriwe n'abantu benshi
Igitaramo Kassav’ yizihirijemo isabukuru y'imyaka 30 cyitabiriwe n'abasaga 65 000
Abagize iri tsinda baba bambaye mu buryo bworoheje mu bitaramo bakorera mu bice bitandukanye
Imwe mu mafoto ya Kassav’ ubwo yizihizaga isabukuru y'imyaka 20 mu 1999
Georges Décimus afite ubuhanga bwihariye mu gucuranga gitari
Yamamaye kuva kera! Aha ni mu gitaramo Kassav' yakoreye muri Haïti mu 1985
Abaririmbyi mu gitaramo cya mbere Kassav' yakoreye kuri Zénith de Paris mu 1985
Jacob Desvarieux ni umuhanga mu gucuranga gitari
Jean Claude Naimro afite impano ihambaye mu gucuranga piano
Jean Claude Naimro ni we ucuranga piano muri Kassav’
Jean-Philippe Marthély mu bagize itsinda ry'abanyabigwi mu muziki ucuranzwe mu njyana ya Zouk
Jocelyne Béroard Kasav' ni we mugore rukumbi ubarizwa muri Kassav’
Jocelyne Béroard ari mu baririmbyi b'abahanga babarizwa muri iri tsinda
Ijwi rye rinyura benshi mu bakunzi b'ibihangano bya Kassav’
Mu Ukuboza 1986, umuhanzikazi Jocelyne Béroard yakoze album ye ya mbere
Kassav’ yahawe igihembo cya gatanu kubera album yayo yacurujwe cyane. Iyi album ya 11 yiswe "Tékit Izi" yagize hanze mu 1992. Aha Jacob Devasrieux yashyikirizwaga igihembo n'Umuyobozi Mukuru wa Sony Music France
Kassav' mu gitaramo cya kabiri yakoreye kuri Zénith de Paris mu 1986, aha yari yaserukiwe na Patrick Saint-Eloi, Jocelyne Béroard na Jean-Philippe Marthély
Kassav' yatangiye icuranga umuziki wari umenyerewe mu gace ka Guadeloupe, iwutunganya mu buryo bugezweho
Umuziki wayo unyura amatwi y'abawumva kandi b'ingeri zose
Kassav’ imaze imyaka igera kuri 41 ihagaze bwuma mu muziki
Ni abanyabigwi bafite igikundiro cyambukiranyije ikinyejana
Ni itsinda rihambaye mu njyana ya Zouk. Ibitaramo byaryo byitabirwa bihebuje
Kassav’ itegerejwe mu Mujyi wa Kigali aho izakorera igitaramo ku nshuro ya mbere
Kassav’ izava i Kigali yerekeza i Berlin mu Budage n’i New York muri Amerika
Amatike yo kwinjira mu gitaramo yatangiye gucuruzwa ahantu hatandukanye mu Mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza