Habyarimana yatangiye gusohora filime zakanyujijeho hambere ahereye ku yitwa ’Ntawe umenya aho bwira ageze’

Yanditswe na Nsengiyumva Emmy
Kuya 10 Nzeri 2020 saa 01:59
Yasuwe :
0 0

Habyarimana Charles wakoze filime zakunzwe mu myaka yo hambere, aherutse gutangaza ko agiye kongera gukora filimi nshya, nubwo ngo azabanza kwibutsa Abanyarwanda iza cyera yakoze ahereye ku yo yise “Ntawe umenya aho bwira ageze”.

“Ntawe umenya aho bwira ageze” ni imwe muri filime zo hambere zamenyekanishije abakinnyi babaye ibyamamare mu ruganda rwa sinema nyarwanda nka; Kanyombya, Nyirankende, Kanuma, Samusure, Nyirakimonyo, Nyagahene, Nyirakanyana n’abandi.

Iyi filime igizwe n’ibice birenga 50 yatambukaga kuri televiziyo Rwanda mu myaka ya 2003, yagize igikundiro gikomeye mu banyarwanda kuko igihe yajyaga hanze bari batarabona nyinshi.

Bamwe mu bakinnye muri iyi filime babaye abakinnyi b’ibitangaza ndetse kugeza ubu ni bamwe mu bagezweho.

Ni filime Habyarimana yakoze atewe inkunga n’icyahoze ari ikigo cy’igihugu cy’ubwiteganyirize (Caisse sociale).

Muri iyi filime Kanyombya akinamo ari umusazi, Kanuma (witabye Imana mu myaka ishize) akaba yaragaragayemo nk’umukinnyi ufite abagore benshi.

Usibye iyi filime, Habyarimana yavuze ko igihe azaba amaze kuyishyira hanze azatangira no gusohora izindi nazo zakunzwe nka; “Haranira kubaho” na “Zirara zishya” zakanyujijeho.

Avuga impamvu yatumye ahitamo kongera gusohora izi filime, Habyarimana yagize ati” Ni filime zimaze igihe usibye kuri Televiziyo Rwanda zanyuze ntabwo ari henshi wazibona, nifuje rero ko n’abakiri bato baryoherwa n’inkuru twandikaga icyo gihe.”

Habyarimana avuga ko kuba yari abitse izi filime atazishyira hanze yabibonagamo ikibazo kuko hari benshi batagize amahirwe yo kuzireba bazikeneye ndetse n’abandi bazirebye ariko bakeneye kongera kwiyibutsa bya bihe.

Kugeza ubu, Habyarimana yahereye kuri filime “Ntawe umenya aho bwira ageze” ari gushyira kuri shene ya Youtube yise “Abasare films”.

Habyarimana avuga ko aje guhangana ku isoko rigoye kuko ubwo yinjiraga mu mwuga wa sinema ibigo bitandukanye byabateraga inkunga, ariko uko iminsi yagiye yisunika bagiye babivamo, bituma nawe acika intege.

Ati”Buriya Zirara zishya nakoresheje amafaranga yanjye gusa, nta muntu n’umwe wanteye inkunga. Naje guhura n’umu Dj ambaza impamvu tutagisohora filime, ambwira ko iyo hasohotse nshya we ashobora no gukorera ibihumbi ijana ku munsi.”

Yavuze ko uko iminsi yagiye yicuma ari ko abatwarira ubuntu ibihangano byabo bagiye biyongera bituma abakoraga filime bagwa mu gihombo kuko abazigurishaga bataziranguye bari babaye benshi.

Uko isoko ryapfaga kandi, abakora filime bakagwa mu gihombo byatumaga n’izikorwa zitakaza urwego rwazo bagakora iziciriritse.

Habyarimana utarakundaga gukora ibintu bibi avuga ko yahisemo kubireka. Imyaka ibaye itanu ahagaritse ibyo gukora filime.

Yavuze ko ashimira bikomeye ab’amazina akomeye yakoranye nabo mbere. Ati “Benshi muri bariya, bari abanyempano. Icyo nakoze ni ukubabyutsa ariko bari abahanga cyane kandi murabibona ko bahagaze neza.”

Kuri ubu, Habyarimana avuga ko isoko rya filime rigifite ikibazo nubwo hari abamaze kuyoboka irya Youtube, iri naryo ariko ngo ritanga amafaranga make bigatuma n’abakina filime muri iyi minsi hari ibintu badashyiramo kuko byabatera igihombo.

Nyuma y’imyaka itanu atari muri filime nyarwanda, avuga ko agiye kongera gukora filime. Yavuze ko ari gutekereza uko yasubira inyuma akazamura impano nshya kuko asanga ari ibintu bishoboka.

Reba agace ka mbere ka filime "Ntawe umenya aho bwira ageze"

Habyarimana yatangiye gusohora filime zakanyujijeho hambere, ahereye ku yitwa “Ntawe umenya aho bwira ageze”

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .