Jules Sentore yagereranyije umusore wahamirije mu ndirimbo ye na Butera bwa Nturo wari Intore ikomeye mu Rwanda

Yanditswe na Uwiduhaye Theos
Kuya 21 Ugushyingo 2019 saa 02:56
Yasuwe :
0 0

Abazi gutatura amateka bemeza ko Intore yabaga yahize izindi mu gihugu yashimirwaga mu ruhame ndetse bakemeza ko Butera Bwa Nturo cyangwa Semivumbi wa Rwatangabo bari urugero rw’Intore zagize amateka akomeye zikanabishimirwa cyane.

Nka Butera Bwa Nturo we amateka ye no guhamiriza mu buryo bukomeye yarenze imipaka y’u Rwanda bituma ajya ku noti ya Congo-Mbiligi bitewe n’uburyo yari umuhanga uhambaye.

Uyu mugabo yashyizwe ku noti y’amafaranga 10 mu 1952 yakoreshwaga muri Congo-Mbiligi yahindutse Repubulika Iharanira Demukarasi ya Congo bikozwe n’Ababiligi.

Ibi bigaragaraza ko yari umuhanga uzi guhamiriza adasobanya kandi byari biri mu misokoro ye.

Butera bwa Nturo ni we wabaye intore y’ikirenga mu zabayeho zose mu Rwanda, yari umutoza w’Itorero ry’Umwami Rudahigwa akaba ari nawe wigishije Sentore Athanase umubyeyi wa Masamba Intore akaba sekuru wa Jules Sentore.

Butera yari umuhungu w’umutware Nturo wari ukomeye ku ngoma y’umwami Mutara III Rudahigwa.

Uko umuco ugenda uhinduka ubu biragoye ko umuntu uhiga abandi mu guhamiriza yamenyekana bitewe n’iterambere ririho ndetse hakaba haraje imbyino nyinshi z’urusobe zinatuma usanga abazi gucinya akadiho, no guca umugara bya Kinyarwanda wababarira ku mitwe y’intoki cyangwa se n’ababizi ntibamenyekane kuko atari ibintu bikunda gushyirwa imbere.

Jules Sentore we ariko si ko abibona kuko yatangaje ko umuco nk’uyu udakwiriye gucika kuko wari ubumbatiye byinshi.

Ni nayo mpamvu, n’ubwo muri iki gihe ibyo gutoranya intore ihiga izindi bitakibaho we avuga ko ku bwe hari umusore ukwiye kwitwa Intore ihiga izindi.

Jules Sentore yabwiye IGIHE ko umusore witwa Gatore Yannick muri iki gihe mu mboni ze n’iza benshi bamuba hafi ari umwe mu bafite impano ikomeye mu gucinya akadiho bya Kinyarwanda.

Ati “Kera habagaho umuco w’uko Intore yabaga ari iya mbere mu gihugu yabishimirwaga nka Butera Bwa Nturo n’abandi, ariko ubu Intore zihari usanga batazizi ntibabivuge. Baba bashaka kuvuga ku munyamuziki gusa kandi umuziki ukubiyemo ubutore bwo kubyina kandi mu muco w’u Rwanda habaho kubyina bitandukanye.”

“Nk’ikinyemera, igishakamba […] njye ubu nemeza ko Gatore Yannick ariwe Ntore nabonye muri iki gihe igwa mu ntege Semivumbi na Butera bwa Nturo. Arusha izindi zose. Nshingiye ku buhanga bwe namubonanye.”

Gatore ubusanzwe abyina mu Urukerereza. Ni nawe ugaragara abyina mu mashusho y’indirimbo Jules Sentore aherutse gushyira hanze yise ‘Dimba Hasi’.

Gatore ni we wahamirije muri iyi ndirimbo Jules Sentore aheruka gushyira hanze

Butera Bwa Nturo(ibumoso) na Gatore wagereranyijwe nawe kubera ubuhanga bwe mu guhamiriza
Gatore ari mu ntore ziri mu gisekuru cy'ubu zikwiriye guhangwa amaso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza