00:00:00 IGIHE NETWORK KN KINYARWANDA EN ENGLISH FR FRANCAIS

Jolly Mutesi yagize ikiniga nyuma yo guhura n’umusore biganye muri kaminuza aherutse gusanga i Iwawa

Yanditswe na Nsengiyumva Emmy
Kuya 28 January 2022 saa 04:26
Yasuwe :

Jolly Mutesi yafashwe n’ikiniga nyuma yo guhura n’umusore biganye muri Kaminuza yahoze yitwa SFB (CBE), nyuma akaza kuba imbata y’ibiyobyabwenge akisanga yarajyanywe kugororerwa i Iwawa.

Ubwo Jolly Mutesi yasuraga Ikirwa cya Iwawa mu 2018 yahasanze umusore witwa Bugingo Patrick bari bariganye muri Kaminuza.

Ubwo yavugaga kuri Bugingo biganye ubu akaba ari Iwawa, Mutesi Jolly yabanje kugira ikiniga ndetse biramugora kuvuga. Ati "Ubusanzwe sinjya mbura icyo mvuga, biri kungora..."

Yabanje ariruhutsa, ati “Mbonye n’undi muntu ntabwo nari namubonye, Patrick. Birimo birangora gukomeza kuvuga, ariko igihugu kiradukunda twese. Nabonyemo umuhungu twiganye, yari umuhanga cyane. Yansobanuriraga imibare twigana hariya muri SFB. Nawe ibaze ariko!”

Iki kiniga yagize abonye Bugingo i Iwawa, Jolly Mutesi yongeye kukigira ubwo yongeraga kumubona nyuma y’imyaka itatu bahuriye ku kirwa.

Uyu musore wavuye i Iwawa mu 2019, yaje gusubira mu Karere ka Karongi ari naho avuka.

Kuri ubu ari gukorana na sosiyete z’ubwubatsi aho akora nka kigingi ku makamyo.

Agikubita amaso Jolly Mutesi, yamubwiye ko yigiye byinshi i Iwawa ku buryo ibijyanye n’ibiyobyabwenge yabizinutswe burundu.

Ati “Nari narakubuze ariko ku mutima naragutekerezaga. Ikintu nakubwira ni uko aho wansize ubutumwa wambwiye nabwumvise kandi natashye narikosoye.”

Bugingo yabwiye Jolly Mutesi ko ikintu yamusaba ari ubuvugizi ngo arebe ko yakongera kubona buruse ya Leta yari afie ngo arebe ko yasubira ku ishuri.

Ikindi yasabye Jolly Mutesi kikanatera amarangamutima akomeye uyu mukobwa, ni umurimo wamufasha kubaho kuko akazi akora uyu munsi nubwo atakagaya ariko yumva ko yamufasha kubona akeza kurushaho.

Ati “Ikindi kimbangamiye muri iyi minsi ni icyo gukora, niba hari ahantu wamvuganira, n’iyo wambwira nkaza iwawe nkajya noza imodoka yawe, nabyemera aho gukomeza kuba kigingi.”

Jolly Mutesi wahise afatwa n’ikiniga acyumva ubuzima uyu musore bahoze ari inshuti abayemo, yamusabye kwirinda kuzongera kugwa mu makosa ukundi ndetse no kudaterwa ipfunwe n’ubuzima yabayemo kuko buri wese agira intege nke mu buzima.

Ati “Sinavuga nonaha ko ngiye kukwishyurira ishuri cyangwa akazi, ariko ahari ubushake inzira iraboneka. Ufite ubushake, icyo nzashobora gukora icyo ari cyo cyose nzakubwira kuko sindi umuntu wo hanze.”

Uyu musore abajijwe ikintu yabwira uyu mukobwa wari umaze kumuhumuriza, yavuze ko Jolly Mutesi nta kindi yamwifuriza uretse kuba yazamubona ari Minisitiri.

Jolly Mutesi yongeye guhura na Bugingo Patrick biganye muri Kaminuza baherukaga guhurira i Iwawa
Jolly Mutesi yasabwe n'uyu musore kumurwanaho akamushakira akazi, akanamukorera ubuvugizi bwatuma yongera kujya kwiga
Jolly Mutesi yari yababajwe bikomeye na Bugingo biganye akaza kugwa mu bishuko byo gukoresha ibiyobyabwenge byatumye ajyanwa i Iwawa
Jolly Mutesi yari yasigiye Bugingo umukoro wo kwiga neza no kutazongera kugwa mu bishuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .