00:00:00 IGIHE NETWORK KN KINYARWANDA EN ENGLISH FR FRANCAIS

Jasinta Makwabe, Umunyamideli ukomoka mu Rwanda yongeye kuvugisha benshi kubera Diamond

Yanditswe na Nsengiyumva Emmy
Kuya 19 July 2022 saa 05:59
Yasuwe :

Jasinta Makwabe, umunyamideli ukomoka mu Rwanda uherutse guhagararira Tanzania mu irushanwa rya Miss Africa Calabar, yongeye kuvugisha abantu ku mbuga nkoranyambaga kubera Diamond.

Uyu mukobwa yifashishije imbuga nkoranyambaga, yatunguranye ashyira amafoto ya Diamond kuri Instagram anayakurikiza amagambo yo gutaka uyu muhanzi.

Benshi mu bakurikira uyu mukobwa bamuvuzeho ibintu bitandukanye ndetse bamwe batangira kumucyurira ko ari kwikundisha kuri uyu muhanzi.

Nyuma yo kubona ibyanditswe byose, Jasinta yavuze ko adatewe impungenge n’amagambo ari kubwirwa cyane ko afite uburenganzira bwo kuvuga ibyo ashaka mu gihe bimuha umunezero.

Si ubwa mbere Jasinta avuzwe mu rukundo na Diamond; mu 2021 nabwo ibi byaravuzwe icyakora aya makuru ayatera ishoti.

Ubwo izi nkuru zavugwaga Jasinta yahakaniye IGIHE aya makuru asobanura ko impamvu yari yashyize uyu muhanzi kuri Instagram byari ukumushimira.

Ati “Nagira ngo mushimire gusa, ni umwana mwiza uzi gukora kandi ndatekereza ko atari njye muntu wa mbere wari umushyize kuri uru rubuga, si icyaha kumushyiraho.”

Jasinta yavuze ko hari ibintu bikomeye yafashijwe n’uyu muhanzi. Ati “Kuba tuvugana byo turavugana, namushyize kuri Instagram nshaka kumushimira, hari ibintu yankoreye bikomeye mu buzima, singiye kubivuga byose hano ariko ni umwe mu bantu bagize uruhare mu kwiga kwanjye.”

Yakomeje avuga ko kugira ngo ashyire Diamond kuri Instagram, ari uko yari amaze kubona abantu benshi bakunze kumuvuga uko bishakiye kuko batamuzi. Ahamya ko benshi bamufata nk’umuntu mubi nyamara bihabanye n’ukuri.

Ku rundi ruhande ariko, ntabwo Jasinta yigeze aca ku ruhande mu kuguragaza amarangamutima ye kuri Diamond. Yahishuye ko usibye kuba yubaha umuryango w’uyu muhanzi ariko bibaye ngombwa ko bakundana nta kibazo byaba biteye.

Ati “Ni umugabo utagize icyo amwaye. Sinavuga ko ntigeze mwiyumvamo, byarabaye kumva mukunze, ndamwubaha kandi nubaha n’umuryango we. Abaye adafite umugore akaba na we ankunda namukunda nta kibazo.”

Uyu mukobwa ntabwo asanzwe akurikira Diamond kuri Instagram, yavuze ko atari ikimenyetso cyiza cy’uko atamukunda kuko n’ababyeyi be atabakurikira kandi abakunda.

Jasinta Makwabe, ni umunyamideli ukomoka mu Rwanda uherutse guhagararira Tanzania mu irushanwa rya Miss Africa Calabar.

Mu mpera za 2020 nibwo hatanzwe ikamba rya Miss Africa Calabar ritangirwa muri Nigeria.

Iki gihe u Rwanda rwari ruhagarariwe na Miss Uwihirwe Yassipi Casmir mu gihe Tanzania yari yohereje uwitwa Jasinta Makwabe, umunyamideli w’icyamamare muri iki gihugu ariko unafite inkomoko mu Rwanda.

Jasinta yongeye kurikoroza kubera Diamond
Jasinta yavuze ko nubwo abantu bavuga gute bitamubuza gukora ibyo ashaka mu gihe bimushimisha
Usibye kumurika imideli, Jasinta azwi nk'umukobwa wamamaza imyambaro
Jasinta ukomoka mu Rwanda, aherutse guhagararira Tanzania muri MissAfrica Calabar

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .