00:00:00 IGIHE NETWORK KN KINYARWANDA EN ENGLISH FR FRANCAIS

Izina Element ashobora kuryamburwa: Amashirakinyoma ku mwuka mubi uvugwa muri Country Records

Yanditswe na Nsengiyumva Emmy
Kuya 16 Mutarama 2023 saa 09:35
Yasuwe :

Umwuka mubi ukomeje gututumba hagati ya Producer Element n’ubuyobozi bwa Country Records yari amaze hafi imyaka itatu akoreramo nk’utunganya indirimbo z’abahanzi banyuranye.

Ni umwuka mubi wazamuwe cyane n’uko uyu Producer Element bivugwa ko avuye muri Country Records mu buryo batumvikanye.

Ni amakuru amaze iminsi avugwa cyane yaba ku mbuga nkoranyambaga ndetse no mu itangazamakuru, gusa bikomeza kuvugwa mu buryo bw’ibihuha kuko nta ruhande na rumwe ruremeza aya makuru.

Icyakora hari impamvu nyinshi umuntu yashingiraho ahamya ko Element yamaze gutera umugongo Country Records agahitamo kwigira muri 1:55AM Ltd isanzwe ifasha Bruce Melodie.

Izina Element rishobora kuba atari rishya mu matwi yawe mu gihe waba usanzwe ukurikirana umuziki nyarwanda, imyaka ibaye itatu uyu musore yihariye gukora indirimbo zakunzwe ndetse yagiye abihemberwa mu bihe binyuranye.

Ni izina benshi bamenyeye muri Country Records, studio yatangiriyemo ibyo gukora no gutunganya imiziki y’abahanzi, icyakora kuri ubu basigaye barebana ay’ingwe.

Muri Country Records Element yahakoreye nyinshi mu ndirimbo zigezweho muri iki gihe nka Henzapu ya Bruce Melodie, Kola ya The Ben, Micro ya Davis D, Saa moya ya Bruce Melodie, Mpa formula ya Juno Kizigenza n’izindi nyinshi.

Kuri ubu hari amakuru yizewe ahamya ko uyu musore yamaze kwinjira muri 1:55AM Ltd ndetse amaze igihe akorana n’iyi sosiyete isanzwe ifasha Bruce Melodie.

Icyakora nubwo nta gisasu kiraturika ngo intambara y’amagambo itangire, hari gututumba aganisha ku guhamya ko Element agiye atumvikanye n’abahoze ari ba shebuja.

Element yamaze kwinjira muri 1:55AM Ltd isanzwe ifasha Bruce Melodie

Producer Element yinjiye muri Country Records nk’umuhanzi none ahavuye ari Producer w’ikirangirire

Mugisha Fred Robinson wamenyekanye cyane nka Producer Element, ni umwe mu bakora bakanatunganya indirimbo bagezweho muri iyi minsi bitewe n’izo yakoze ziri kubica bigacika.

Umwaka ushize kuri Youtube charts bagaragaza ko byibuza mu ndirimbo 15 z’abahanzi nyarwanda zacuranzwe cyane ku butaka bw’u Rwanda zirindwi ari izakozwe na Producer Element.

Ibi byumvikanisha uburyo uyu musore yashyize intera hagati ye n’abo basangiye umwuga binatumye byanahise bizamura urwego rwe.

Producer Element witegura kuzuza imyaka 22 y’amavuko nubwo amaze gukora indirimbo nyinshi ndetse zanakunzwe yigeze kubwira IGIHE ko bitari mu nzozi yahoze arota.

Nyuma yo kurangiza amashuri ategereje ibya kaminuza, Element yinjiye mu buhanzi. Ni umwana wari warakuranye ubuhanga mu gucuranga ariko atazi ko byazaba imbarutso y’umwuga umutunze uyu munsi.

Uyu musore w’imfura mu muryango w’abana bane, yarangije amashuri yisumbuye mu 2018 muri ‘MPC (Maths, Physics and Computer Science)’.

Element wakirigitwaga n’impano yaje kwigira inama yo kwerekeza mu murwa ngo arebe ko yakabya inzozi, birangira ahingukiye muri Country Records.

Muri iki gihe yari agiye gukorana indirimbo na Iyzo Pro wabarizwaga muri Country Records, aha akaba ari naho yamenyaniye na Noopja ku nshuro ya mbere.

Nyuma y’igihe asaba ko yafashwa na Country Records, amakuru ahari ahamya ko Noopja yaje kwiyemeza kumufasha ndetse bajyana iwabo amusaba ababyeyi babiha umugisha.

Element wari winjiye muri Country Records nk’umuhanzi, yagiye nk’umuvandimwe kurusha ko yaba umukozi cyangwa akorana na bo.

Ibi byatumye nta masezerano bagirana ahubwo bakorana ku cyizere, gusa hari byinshi baganiriye mu rwego rw’imikoranire.

Ku giti cye, Element akunze kwivugira ko yagerageje gukora umuziki gusa ntibyamuhira kubera aba producers bamugoraga bituma acika intege.

Noopja wari wariyemeje gufasha Element gukora umuziki akanabyemerera ababyeyi yahisemo gufatanya nawe urugendo rushya rwo kwiga gutunganya indirimbo z’abahanzi.

Ni urugendo bakoranye bucece, uyu musore atangira kumenyekana cyane mu bihe bya Covid-19 ubwo yakoreraga Bruce Melodie indirimbo bise ‘Henzapu’.

Ni indirimbo yagizwemo uruhare n’abantu benshi barimo n’abatarigeze bavugwa, icyakora ku rundi ruhande yahise izamura izina rya Element wahise asamirwa hejuru n’abahanzi banyuranye bari babonye umunyempano mu gutunganya indirimbo.

Kuva icyo gihe Element ryabaye izina ry’ikimenyabose mu muziki byagera mu bahanzi bo bakamukundira ko adasahinda cyangwa ngo yangize gahunda zabo.

Mu myaka yari amaze muri Country Records, Element yakusanyije ibihembo byose byabaga bigenewe aba Producers

Producer Element avuye muri Country Records ajya kuba umusimbura wa Madebeats

Kuva yakwamamara biturutse ku ndirimbo yakoranye na Bruce Melodie, byubatse ubucuti hagati yabo ndetse uretse kumukorera indirimbo yiyongera ku bavandimwe yari amaze kungukira i Kigali.

Ubwo Bruce Melodie yari amaze kwinjira muri 1:55 AM Ltd, byabaye ngombwa ko asa n’uteye umugongo Element, amaso ayahanga Madebeats.

Uyu bakoranye indirimbo zinyuranye zirimo n’izakunzwe ariko umubano we na Elements uzamo agatotsi.

Nyuma y’uko Madebeats abonye ibyangombwa byo kujya gutura mu Bwongereza, Bruce Melodie n’itsinda ry’abamufasha bongeye kwiyegereza Element batangira gukorana imishinga inyuranye.

Madebeats akimara kuva mu Rwanda, hagombaga gushakwa uzaziba icyuho cye, hatekerezwa kuri ba Producers batandukanye, ariko ntibagere ku nyota ya Bruce Melodie n’itsinda rye.

Aha niho bahereye bigira inama yo kwegera Element bari bamaze igihe bagenda runono, birangira yemereye 1:55AM Ltd gukorana nabo atanasezeye aho yarerewe.

Umunyarwanda ni we wavuze ngo aho ifaranga rikubise haroroha, yunganirwa n’uwagize ati “Ikinaniye ifaranga uzarekere!”

Ibi nibyo byabaye kuri Element waganirijwe gake gake bikarangira ateye umugongo uwamusabye ababyeyi akisangira abafite ifeza.

Jugujugu ku Kibuye, Element na Bruce Melodie batangira gukorana album nshya yiyongera ku zindi uyu muhanzi yakoranye na Madebeats.

Ubwo bari ku Kibuye bakorana uyu mushinga wa album nibwo amakuru y’uko Element yamaze kuva muri Country Records yagiye hanze.

Igenda rya Element risize inkuru ki muri Country Records?

Nubwo ubuyobozi bwa Country Records butaravayo ngo buvuge ku igenda rya Element, amakuru ahari avuga ko bababajwe bikomeye no kuba uyu musore agiye atunguranye ndetse nabo ubwabo abatunguye.

Bashinja Element kuba yaracunze Noopja atari mu gihugu (yari amaze igihe i Burayi) afata icyemezo cyo kwinjira muri 1:55AM Ltd.

Abari hafi ya Noopja washinze ‘Country Records’ bahamya ko yababajwe no kuba uyu mu producer yarahisemo kugenda mu gihe bari bamaze iminsi mike babuze umuvandimwe Kinyoni wafatwaga nk’ukuboko ku iburyo mu mirimo yabo.

Kinyoni tuvuga ni umwe mu basore bagiraga uruhare mu gufasha abahanzi muri studio cyane akabunganira mu miririmbire.

Ku rundi ruhande ariko yari murumuna wa Noopja mu buryo bw’amaraso.

Kugenda kwa Element bakiri ku kiriyo cy’uyu musore, muri Country Records babifata nko kubasonga.

Umwe mu bantu ba hafi ya Noopja waganiriye na IGIHE yavuze ko uyu mugabo yababajwe bikomeye n’uburyo uyu musore afata nk’umwana yirereye yagiyemo.

Ati “Ni umusore yafashe akiri muto amuha izina, buriya Element ni izina Noopja yamuhaye, nibaza ko nawe ubwe ajya abyivugira, ni umwana yarereye mu rugo iwe imyaka myinshi kugeza akuze arahava atangira kwibana.”

Uyu muntu twirinze gutangaza amazina ye, yakomeje avuga ko Noopja atigeze yiyumvisha ko Element yamuta mu gihe bari bari mu byago, ati “Ndibuka Noopja amenya ko Element yagiye yari i Burayi yanga kubyemera kuko atumvaga ko uyu musore yamuca inyuma gutyo.”

Uyu nawe yahamije ko Noopja yababajwe cyane n’uburyo Element yagiye mu gihe bari bakiri mu kiriyo cy’uwari umuvandimwe wabo Kinyoni.

Ati “Mu byababaje Noopja ni ukuntu Element yagiye atunguranye kandi abizi ko bakiri mu kiriyo cya Kinyoni, umuvandimwe wabo wari ukuboko ku iburyo muri Country Records.”

Abari hafi ya Noopja bahamya ko afata ibyo Element yakoze nko gushaka gusenya Country Records, ari nabyo bimeze nko kubona ‘umwana uhaze ushaka kumena imbehe yaririyeho!’

Noopja na Element bari bamaze imyaka bakorana nk'abavandimwe none bagiye gutandukana mu nduru

Ashobora kuzamburwa izina ‘Element Eleeeh’

Amakuru IGIHE ifite ni uko nibiramuka bibaye ko Element ava muri Country Records atabashije kumvikana n’ubuyobozi bwayo, azamburwa izina ‘Element Eleeeh’ cyane ko yarihawe na Noopja.

Uyu waduhaye amakuru yizewe ahamya ko Noopja wariye karungu nubwo atarerura ariko mu gihe atakumvikana na Element yafata icyemezo cyo kumwambura izina yamuhaye.

Ati “Ngira ngo na Element yigeze kubivuga ko izina yarihawe na Noopja, uyu mugabo rero yamaze kwiyemeza kuba yamwambura izina yamuhaye.”

Amakuru yizewe ahari ahamya ko Noopja afite inyandiko zihamya ko ari we wise iri zina Element ku buryo kugira ngo uyu musore akomezanye iri zina bishobora kuzarangirira mu nkiko.

Amakuru ahari avuga ko Noopja yababajwe bikomeye no kuba Element yaragiye mu gihe bari bakiri mu kiriyo cy'umuvandimwe Kinyoni
Element yakoreye benshi mu bahanzi uyu munsi bagezweho
Element yize ibyo gutunganya indirimbo abifashijwemo n'abarimo Pastor P na Bob Pro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .