Itsinda Shauku Band ririmo Sophia Nzayisenga na DJ Ira ryasohoye indirimbo ya mbere

Yanditswe na Nsengiyumva Emmy
Kuya 1 Mutarama 2021 saa 01:02
Yasuwe :
0 0

Sophia Nzayisenga umenyerewe mu gucuranga inanga na Dj Ira uzwi cyane mu kuvangavanga imiziki, ni bamwe mu banyamuziki icyenda bagize itsinda rishya mu muziki ryitwa ‘Shauku Band’ ryasohoye indirimbo yabo ya mbere "Jolie".

Iri tsinda ryinjiranye umwihariko mu muziki wo gukora indirimbo zabo aho gucurangira abandi bahanzi.

Ku ikubitiro bahise bahera kuyo bise "Jolie" iri kuri album bitegura gusohora mu minsi iri imbere.

Ubuyobozi bw’iri tsinda buvuga ko bavanzemo DJ Ira kugira ngo bajye bakorera abantu ibirori bigezweho. Naho Sophia Nzayisenga we bamushyizemo mu rwego rwo gushyigikira umuziki gakondo bahesha inanga agaciro.

Iri tsinda ryamuritswe ku mugaragaro tariki 13 Ugushyingo 2020, ahari studio ya Shauku ya Africa, ari naho abacuranzi bo muri iri tsinda batuye.

‘Shauku Band’ yiganjemo abasore n’inkumi bize umuziki mu ishuri rya Muzika rya Nyundo.

Barimo Umuyobozi w’iri tsinda unacuranga piano, Nkomeza Alex; Aimable Iradukunda ucuranga ingoma, Izerimana Gad ucuranga guitar (bass), Niyobyiringiro Elam ucuranga gitari akaba n’umuririmbyi.

Harimo kandi Imanizabayo Lydia uririmba muri iri tsinda, Ndushabandi David ucuranga Saxophone, Akayezu Patient ucuranga inanga akaba n’umuririmbyi [ni umuhungu wa Nzayisenga].

Iyakaremye Fred ukuriye iri tsinda ‘Shauku Band’, yavuze ko batekereje iri tsinda bifuza gushyigikira abanyempano bari bavuye kwiga ku ishuri rya muzika rya Nyundo ndetse no kugerageza kuzana itsinda ricuranga ariko rinahimba indirimbo zaryo.

Ati “Twe ntabwo tuzajya ducurangira abandi bahanzi, tuzajya dukora indirimbo zacu. Wenda ngiye kure turashaka kugarura umuziki wakunzwe nk’uwa Orchestre Impala n’andi matsinda akomeye ku Isi yicurangira akanaririmba.”

Yavuze ko bazajya bagerageza kuvanga injyana zitandukanye kuko abacuranzi bafite babifitiye ubushobozi.

Itsinda Shauku Band ryiyemeje gukora umuziki
Nzayisenga Sophia ari mu itsinda rya Shauku Band

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .