00:00:00 IGIHE NETWORK KN KINYARWANDA EN ENGLISH FR FRANCAIS

Israel Mbonyi yanyuze abitabiriye igitaramo yakoreye ku musozi wa Carmel mu nyubako imaze imyaka 2000

Yanditswe na Nsengiyumva Emmy
Kuya 19 April 2022 saa 08:08
Yasuwe :

Mu ijoro ryo ku wa 18 Mata 2022, Israel Mbonyi yataramiye Abanya-Israel n’ikipe y’abo baturukanye mu Mujyi wa Kigali berekeza muri Israel mu rugendo rutagatifu rwiswe ‘Twende Jerusalem’. Ni igitaramo yahuriyemo na Avraham Tal uri mu bagezweho muri iki gihugu.

Iki gitaramo cyabereye mu nyubako y’amateka yitwa ‘Shuni’ imaze imyaka ibihumbi birenga bibiri, ikaba imwe mu zikunze kuberamo ibitaramo bikomeye.

Shuni ni imwe mu nyubako ziri ku musozi wa Carmel ukaba umwe mu ifite amateka akomeye muri Israel no muri Bibiliya.

Abakunzi b’umuziki bari bakubise baruzura kuko amatike yo kwinjira muri iki gitaramo yari amaze iminsi ine yarashize.

Ahagana saa tatu z’ijoro nibwo Avraham Tal wabanje ku rubyiniro yari atangiye gutaramira abakunzi b’umuziki we bari bitabiriye ari benshi.

Nyuma y’iminota irenga 30 ari ku rubyiniro, Avraham Tal yahamagaye Israel Mbonyi ngo bafatanye gushimisha abakunzi b’umuziki bari bitabiriye igitaramo cyabo.

Byamusabye iminota mike cyane kugira ngo abe amaze kwigarurira imitima y’Abanya-Israel abinyujije mu ndirimbo ze zibyinitse.

Uretse indirimbo ze eshatu yaririmbye, Israel Mbonyi yanaririmbye indirimbo imwe mu zizwi cyane muri Israel iri mu rurimi rw’Igiheburayo arushaho kongera kwigarurira abari bitabiriye iki gitaramo.

Mu gusoza umwanya we ku rubyiniro, Israel Mbonyi yatunguranye atera indirimbo ‘One love’ ya Lucky Dube yongera kwigwizaho abakunzi b’umuziki.

Nyuma yo kuva ku rubyiniro, Israel Mbonyi yasizeho Avraham Tal wongeye kwisubiza abakunzi be mu minota 30 yongeye kumara ku rubyiniro aba ari nawe usoza igitaramo.

Uretse abaturutse mu Rwanda bitabiriye urugendo ‘Twende Jerusalem’ bari bagiye gushyigikira Israel Mbonyi, iki gitaramo cyari cyitabiriwe na Dr Ron Adam uhagarariye Israel mu Rwanda.

Umusozi wa Carmel cyabereyeho ufite amateka akomeye muri Bibiliya kuko ni ho abahanuzi 450 ba Bayali biciwe nyuma y’itegeko ryatanzwe na Eliya.

Nyuma y’iki gitaramo byitezwe ko aba bahanzi bazongera guhurira ku rubyiniro ku wa Gatatu tariki 20 Mata 2022, bazaririmbira i Heburayo.

Uru rugendo rw’icyumweru rwitabiriwe n’abarenga 120 baturutse mu bihugu bitandukanye. Rwateguwe na Sosiyete Go Tell ku bufatanye na Ambasade ya Israel mu Rwanda, ruterwa inkunga na Banki ya Kigali.

Biteganyijwe ko abarwitabiriye bazasura uduce dutandukanye dufite amateka akomeye muri Bibiliya turimo Tiberiya, Kana, Galilaya, Umusozi Tabora na Betelehemu.

Abantu baterera umusozi wa Carmel aho iki gitaramo cyabereye
Kwinjira muri iki gitaramo ntabwo byasabaga kubanza gusakwa ku bw'umutekano
Mbere y'uko igitaramo gitangira Israel Mbonyi na Avraham Tal bafatanye ifoto y'urwibutso na Ambasaderi wa Israel mu Rwanda, Ron Adam
Israel Mbonyi na Avraham Tal mbere y'igitaramo
Abafana bari bakubise baruzura
Inyubako yabereyemo iki gitaramo imaze imyaka ibihumbi bibiri
Igitaramo cyari giteguye neza mu nguni zose
Abanyarwanda bari bashyigikiye Israel Mbonyi
Umuhanzi Mugunga Christian na Miss Mutesi Nadia mu bihumbi by'abakurikiye iki gitaramo
Bari bambaye umwambaro uranga ikigo bakorera
Bamwe mu bakozi ba BK bitabiriye iki gitaramo
Avraham Tal ni umwe mu bahanzi bakomeye muri Israel
Avraham Tal afite abakunzi batari bake
Uretse kuririmba, Avraham Tal anyuzamo akanacuranga
Buri wese yifuzaga gucyura urwibutso
Israel Mbonyi yafatanyije na Avraham Tal biryoha kurushaho
Israel Mbonyi yafashijwe na bamwe mu bacuranzi basanzwe bakorana na Avraham Tal
Israel Mbonyi yisanzuraga nk'uri i Kigali
Israel Mbonyi yabaye umwe mu bahanzi bake bagiye hanze y'u Rwanda batagiye gutaramira aba Diaspora gusa ahubwo harimo n'abanyamahanga
Umuziki ugira ururimi rwawo
Avraham Tal ati "U Rwanda na Israel ni ibihugu by'abavandimwe, nishimiye umuvandimwe Israel Mbonyi"
Avraham Tal yakunze impano ya Israel Mbonyi
Avraham Tal ni umwe mu bafashijwe n'umuziki wa Israel Mbonyi
Israel Mbonyi yanyuzagamo agacuranga na gitari
Mbonyi yakoze ibishoboka byose ngo abe yakwigarurira abakunzi b'umuziki muri Israel
Igitaramo kirangiye bashimiye abafana
Abanyarwanda bari mu gitaramo bafatanye ifoto na Israel Mbonyi nyuma yo kubahesha ishema

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .