Amakuru yizewe IGIHE ifite ni uko Israel Mbonyi waherukaga gukora igitaramo cyo kumurika album mu 2017 ubwo yashyiraga hanze iyitwa ‘Intashyo’, ari gutegura igitaramo kizaba muri Kanama 2022 iki akazakimurikiramo album ebyiri aherutse gusohora.

Mu mpera z’umwaka ushize, Israel Mbonyi yasohoye album ye ya kane yise ‘Icyambu’, iyi ikaba yari yarabanjirijwe n’iya gatatu yise ‘Mbwira’ , yagiye hanze mu 2019.

Mu 2014, Israel Mbonyi yasohoye album ye ya mbere ‘Number one’, yamurikiye mu gitaramo yakoreye muri Kigali Serena Hotel mu 2015. Iya kabiri yise ‘Intashyo’, yamuritswe mu gitaramo yakoreye muri Camp Kigali mu 2017.

Mu Ukuboza 2020 Israel Mbonyi yagombaga gukora igitaramo cyo kumurika album ye ya gatatu ‘Mbwira’ ariko imirimo yo kugitegura ibangamirwa n’icyorezo cya Covid-19.

Iki gitaramo cye, Israel Mbonyi atangye kugitegura mu gihe amaze iminsi mike avuye muri Israel aho yari yitabiriye urugendo rwa ’Twende Jerusalem’ aho yanakoreye ibitaramo bibiri bikomeye.

Israel Mbonyi na bamwe mu bacuranzi be ubwo bari mu mihanda y'i Tel Aviv muri Israel

Israel Mbonyi ari kwitegura kumurika album ze ebyiri aherutse gusohora muri enye afite zose hamwe

Ibitaramo Israel Mbonyi yakoreye muri Israel byamukumbuje gutaramira abakunzi be b'i Kigali no mu Rwanda muri rusange