Uyu mukobwa winjiranye mu muziki izina rya ‘Adecute’ yabwiye IGIHE ko gukora umuziki ari inzozi yakuranye nubwo atari azi neza inzira bizacamo ngo azigereho.

Ati “Gukora umuziki zari inzozi zanjye kuva mu bwana ariko ntazi ngo bizagenda gute ngo nzikabye, rero ubu ntekereza ko aricyo gihe ngo nzikabye.”

Nyuma y’igihe agerageza gukora indirimbo ntibikunde, Adecute ahamya ko yaje kugira amahirwe yo kujya muri studio akora indirimbo ye ya mbere yanamaze gushyira hanze mu gihe ategereje ko amashusho yayo nayo arangira.

Adecute wari mu bakobwa barenga 100 bitabiriye irushanwa rya Miss Rwanda mu 2022 bifuza guhagararira Umujyi wa Kigali icyakora ntiyahirwa.

Ubwo yitabiraga iri rushanwa, Adecute yari afite umushinga yise ‘Garuka mu nzira mwana w’u Rwanda dufatanye kubaka igihugu cyacu.

Ni umushinga yavugaga ko ugamije kuvana abana mu mihanda mu rwego rwo kunganira Leta.

Adecute ni umwe mu bakobwa bifuzaga guhagararira Umujyi wa Kigali mu irushanwa rya Miss Rwanda

Adecute yamaze kwinjira mu muziki ndetse indirimbo ye ya mbere yamaze kuyishyira hanze