Ishyamba si ryeru! Urugo rwa Kanye West na Kim Kardashian mu manga ishobora gutuma rusenyuka

Yanditswe na Uwiduhaye Theos
Kuya 6 Mutarama 2021 saa 09:04
Yasuwe :
0 0

Aka ya mvugo y’Abanyarwanda ‘Akaryoshye ntigahora mu itama!’, urugo rwa Kanye West na Kim Kardashian ruravugwamo urunturuntu ndetse byadogereye ku buryo bashobora gutandukana.

Ni nyuma y’imyaka isaga itandatu aba bombi basezeranye kubana akaramata, ibyabo byasubiye irudubi ku buryo Kim Kardashian yahisemo gushaka umunyamategeko usanzwe uburanira ibyamamare witwa Laura Wasse, uzamufasha kwitabaza inkiko mu gihe yaba yafashe umwanzuro wo gutandukana n’umugabo we bafitanye abana bane.

Mu bitangazamakuru bikomeye ku Isi niyo nkuru ishyushye, ndetse niyo iri kuza ku mapaji y’imbere. Sibyo gusa bimwe biri gusubiza amaso inyuma byongera kureba uko umubano w’aba bombi wari wifashe mu gihe bamaranye, bakabaninura banagaragaza ibihe byiza by’urukundo bagiranye, n’ubwo byose bigiye kuba umuyonga.

TMZ izwiho gutangaza amakuru y’ubwiru ku byamamare, yanditse inkuru igaragaza ko Kim Kardashian na Kanye West, ubu bari kugirwa inama n’abantu ba hafi yabo ngo barebe ko umwuka mubi waje mu mubano wabo washira.

Kimwe cya kabiri cy’umwaka ushize cyose, iyi couple yakimaze mu bihe bibi nk’uko benshi babwiye TMZ, ngo Kim Kardashian yari agiye gutandukana n’umugabo we ariko bihurirana n’uko yari agifite ikibazo cy’uburwayi bwo mu mutwe buzwi nka ‘Bipolar disorder’ aba abisubitse.

Aba bombi bamaze amezi make buri wese aba ukwe, kuko Kanye West amaze iminsi aba muri Wyoming mu gihe umugore we yabaga muri Calabasas muri Leta ya California n’abana.

Ubu Kim Kardashian ntacyambara impeta, ibintu bigaragaza ko umubano we n’umugabo uri mu manga.

Kim Kardashian yagiye ashaka gutandukana n’umugabo we, ariko rimwe na rimwe akabona kubaka byaba ari byo byiza kuruta gusenya, ndetse ni nayo mpamvu umwaka ushize bafashe umwanzuro wo kujya mu biruhuko ngo baganire ku by’urugo rwabo.

Ibintu byabaye bibi mu biruhuko by’iminsi mikuru cyane ko batigeze babijyanamo. Aba bombi barushinze muri Gicurasi 2014. Kim Kardashian afite imyaka 40 mu gihe Kanye West afite imyaka 43.

-  Umwaka wa 2020 urugo rwa Kanye West rwaranzwe na bombori bombori!

Uyu mwaka niwo uru rugo rwajemo ibibazo biganisha ku gutandukana kurusha indi myaka.

Guhera muri Nyakanga 2020, Kanye West yashinje umugore we Kim Kardashian kumuca inyuma muri hoteli hamwe n’umuraperi Meek Mill, avuga ko amaze igihe kinini yifuza ko batandukana.

Icyo gihe, Kanye West yanditse kuri Twitter agaragaza ko umugore we yamuciye inyuma na Meek Mill, nyuma yo kugirana umubano ubwo batangiraga kuganira uburyo bavuganira imfungwa hakagira impinduka ziba mu magereza.

Kanye West yanditse ati “Maze igihe ngerageza gutandukana na Kim Kardashian kuva yahura na Meek Mill bari kuganira uko bavuganira imfungwa hakaba impinduka mu magereza. Bahuriye kuri Warldolf.”

Kim Kardashin mu masaha make yari ashize na we yanditse kuri Instagram agaragaza ko umugabo we ibyo ari gukora muri iyi minsi ari kubiterwa n’uburwayi bwo mu mutwe asanganywe buzwi nka ‘Bipolar Disorder’, butuma amarangamutima y’umuntu ahindagurika mu buryo butitezwe.

Muri uko kwezi, ubwo yatangiraga ibikorwa byo kwiyamamariza kuyobora Leta Zunze Ubumwe za Amerika ku wa 19 Nyakanga 2020 mu Mujyi wa Charleston muri Leta ya South Carolina; Kanye West yatangaje amagambo yavugishije benshi.

Muri aya magambo hari aho yavuze ati ‘ababyeyi banjye bari bagiye gukuramo inda yanjye, papa yarabishakaga, mama arokora ubuzima bwanjye’.

Yanashyize hanze amabanga y’urugo rwe n’umugore we Kim Kadashian avuga ko bari bagiye gukuramo inda y’umukobwa wabo mukuru witwa North West, ubu ufite imyaka irindwi. Ibintu nabyo byatumye umubano wabo ibintu bikomeza kudogera.

Mu 2020 hari igihe nabwo yanditse kuri Twitter agaragaza nyina wa Kim Kardashian, Kris Jenner nk’umugore w’umugome, mu kwandika amazina ye yongeraho aya Kim Jong-Un uzwiho ibikorwa nk’ibyo.

Mu Ukwakira uwo mwaka ariko, hagaragayemo agahenge ndetse bajyana mu biruhuko banashyira hanze amafoto menshi bahuje urugwiro.

Urugo rwa Kanye West na Kim Kardashian ruri mu marembera
Aba bombi bari bakunze kugenda bafatanye agatoki ku kandi
Uyu muryango ufitanye abana bane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .