Ishyamba si ryeru mu itsinda rya Active

Yanditswe na Nsengiyumva Emmy
Kuya 7 Nzeri 2020 saa 08:58
Yasuwe :
0 0

Mu itsinda rya Active ryakanyujujijeho mu muziki w’u Rwanda harimo umwuka mubi n’ibibazo bishobora gusiga abarigize batandukanye.

Iri tsinda rigizwe na Tizzo, Olivis na Derek ryatangiye gututumbamo umwuka mubi ku buryo hatagize igikorwa ryasenyuka.

Aya makuru yatangiye gututumba kuva mu 2019 ariko bwo byari bitarafata indi ntera nk’uko biri uyu munsi. Abagize Active baracungana ku jisho bategereje rutenderi ngo buri wese amenye icyo gukora.

Iri tsinda rimaze imyaka irindwi mu muziki, icyakora ibiri muri yo bayimaze umutima utari hamwe, bagerageje guhisha umwotsi ariko inzu ikomeje gucumba.

Tariki 11 Mutarama 2018 mu buryo butunguranye Sano Derek yagaragaye mu banyempano bifuzaga kujya kwiga umuziki ku Nyundo. Uyu musore utari waricaje bagenzi be ngo abagezeho iki gitekerezo, yatumye bagwa mu kantu babibonye mu itangazamakuru.

Umwuka mubi ni aha watangiriye, icyakora kuko kwiga ari ikintu cyiza buri wese yakwifuriza inshuti ye, Tizzo na Olivis bagerageje kumwumva bamushyigikira mu masomo ye.

Kuva uyu musore yajya ku ishuri, ibikorwa by’itsinda byatangiye kugenda biguru ntege ku buryo bugaragarira buri wese ukurikiranira hafi umuziki.

Uko iminsi yicumaga ni ko umwuka mubi wakomezaga gututumba mu itsinda, abari inshuti ndetse bameze nk’impanga eshatu batangira kwishishanya.

Abasore bagize itsinda rya Active mu nama bagiye bagirana bumvikanaga kutazatandukana nabi.

Umwe mu bantu ba hafi b’iri tsinda, yabwiye IGIHE ko aba basore bakundaga gukora inama bakumvikana ko nibiba ngombwa ko batandukana, bazicara bakabiganiraho nk’abantu batabanye nabi.
Mu minsi ishize hari amakuru yatangiye gukwirakwira mu bakurikiranira hafi umuziki, ahamya ko Derek yaba ari muri studio yikorana indirimbo wenyine.

Bagenzi be nabo bumvise ibyavugwaga, bafashe icyemezo cyo guca ku ruhande nabo bagakora ibyabo bucece. Ibi byarangiye babiretse ahubwo biyemeza kubaza Derek niba yiteguye kuva mu itsinda.

Uyu musore yararahiye aratsemba ahamya ko ntaho ahuriye n’izo nkuru zo kuva muri Active.

Mu minsi ishize basohoye indirimbo nshya bise “Kigali n’ibyayo”, iyi yari ibaye nk’ihuma amaso abari batangiye kubona igihu cyo gutandukana ku iri tsinda.

Icyakora ntibyateye kabiri, abasanzwe bazi imikorere ya Active batangiye kwibaza impamvu iyi ndirimbo nta mashusho bayikoreye.

Umwe mu bantu ba hafi y’iri tsinda yaduhishuriye ko kugeza ubu nta gitekerezo gihari cyo gufata amashusho kuko abagize iri tsinda bari mu rungabangabo.

Ati”Ntibazi neza aho bahagaze, baraye bari kumwe na Derek mu itsinda ariko ntibizeye ko bamubyukana. Ibi byabaciye intege bafata icyemezo cyo kugenda gake mu ikorwa ry’aya mashusho.”

Mu gihe abagize Active bari bakibaza kuri ibi byose, batunguwe no kubona Derek yafunguye shene ye kuri Youtube mu mpera z’iki cyumweru turi gusoza. Baguye mu kantu ariko gasa n’agatsindagira ibyo bamaze igihe bibaza.

Yaba Tizzo cyangwa Olivis, bamaze kwakira ko igihe icyo aricyo cyose bakumva inkuru y’igenda rya mugenzi wabo.

Ubwo twifuzaga kumva icyo impande zombi zivuga kuri iki kibazo, urwa Tizzo na Olivis birinze kugira byinshi badutangariza bavuga ko ntacyo bafite bavuga kuri iki kibazo.

Derek ahamya ko akiri muri Active nubwo adahakana kuba akora no ku mishinga ye

Mu kiganiro na IGIHE, Derek yavuze ko we akiri mu itsinda rya Active, ati”Dufite indirimbo nshya ariko, ndabizi urayizi. Ahubwo kuki atari yo umbajije?”

Ku kijyanye no kuba yamaze gufungura shene ye kuri Youtube, yagize ati” None se simfite konti yanjye kuri Facebook cyangwa Instagram? Kuki ho mutigeze muvuga ahubwo ikibazo kikaba kibaye Youtube?”

Uyu muhanzi yashimangiye ko Youtube yayifunguye nkuko yanafungura izindi mbuga nkoranyambaga bidafite aho bihuriye no gutandukana kwa Active.

Abajijwe iby’imishinga y’indirimbo yatangiye kwikorana, yavuze ko nta cyakabaye gitangaza abantu kuko na mbere hose yikoranaga umuziki.

Ati “Njye ariko kuva na kera narakoraga, icyo nari narahagaritse ni ugusohora ibihangano byanjye ariko kuva na kera nari mfite indirimbo zanjye.”

Abajijwe ibyo kuba yenda gusubukura gusohora indirimbo ze, Derek yaruciye ararumira. Ati ”Ubwo nyine nibakore subscribe bazaba bareba.”

Ku bijyanye n’imishinga y’itsinda muri rusange, Derek yavuze ko ihari kandi bafite indirimbo nyinshi zitarasohoka kandi zikomeye.

Active, ni itsinda rigizwe n’abasore batatu Tizzo, Olivis na Derek. Bagiye kuzuza imyaka irindwi bakorana nk’itsinda kuko batangiye ku itariki 25 Nyakanga 2013.

Batangiriye muri Label ya Incredible hanyuma muri 2014 bimukira muri Infinity Records yaje kuba New level.

Derek (ubanza ibumoso bw'iyi foto) bivugwa ko yatangiye ibikorwa bye wenyine ndetse akanafungura shene ya Youtube, ibi byose akabikora bagenzi be batabizi
Sano Derek yafunguye shene ye ya Youtube, biravugwa ko hari n'ibihangano biri muri studio yiteguye gushyiraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .