Ishimwe rya Miss Umuhoza Sharifa uherutse kwibaruka imfura yise Igabe

Yanditswe na Uwiduhaye Theos
Kuya 16 Nzeri 2019 saa 04:06
Yasuwe :
0 0

Nta kabuza mu minsi itazibagirana mu mutima wa Umuhoza Sharifa wabaye nyampinga wagize igikundiro kurusha abandi akanambikwa ikamba ry’Igisonga cya Kane muri Miss Rwanda mu 2016, ntihazaburamo uwo yibarutseho imfura ye y’umuhungu.

Impundu zavuze mu muryango wa Sharifa n’umugabo we ku wa 28 Kanama 2019. Yabyariye mu bitaro bya La Croix du Sud ahazwi nko kwa Nyirinkwaya ku mugoroba wo kuri iyo tariki.

Mu kiganiro yahaye IGIHE yavuze amazina y’umwana we arangije avuga ko afite ishimwe rikomeye mu mutima we nyuma yo kwibaruka imfura.

Ati “Umwana yitwa Igabe Thierry Caelan. Ubu mfite ishimwe rikomeye cyane ku Mana ko yampaye umwana kuko umwana ni umugisha rero imigisha yariyongereye mu muryango wacu.”

Abajijwe abana ateganya kubyara yavuze ko kubyara ari umugisha kandi urubyaro rutangwa n’Imana.

Ati “Imana yaravuze ngo tubyare twuzuze Isi rero nta mubare nateganyije w’abana nzabyara abo Imana yangeneye bose nzababyara.”

Miss Umuhoza yarushinganye na Niyonteze Thierry bari bamaze igihe bakundana, ubukwe bwabo bwabereye i Kigali ku wa Gatandatu tariki ya 14 Nyakanga 2018.

Icyo gihe yambikanye impeta na Niyonteze nyuma y’indi mihango bari bamaze iminsi bakoze basezeranira imbere y’Imana, nyuma y’uko ku itariki ya 5 Nyakanga 2018 basezeranye imbere y’amategeko mu Murenge wa Kimihurura.

Mu bukwe bwe, Miss Umuhoza Sharifa yavuzwe imyato ndetse ashimirwa uburyo yabanye n’urungano, ibikorwa by’urukundo yakoraga mu bukumi bwe, uko yitangiraga abatishoboye n’ibindi byinshi byiza.

Miss Mutesi Jolly yavuze mu izina ry’abakobwa bahataniye ikamba rya Miss Rwanda mu 2016 ari nabwo Sharifa yabaye Miss Popularity, yabwiye Niyonteze Thierry ko yagize umugisha ukomeye kuba yarakundanye n’uyu nyampinga.

Urukundo rwa Miss Sharifa na Niyonteze rwatangiye kwigaragaza mu buryo bweruye muri Mutarama 2018 ari nabwo yamwambitse impeta y’urukundo bahita banatangaza ko ari intambwe ya mbere iganisha ku bukwe bwabo.

Umuhoza Sharifa w’imyaka 24 yahagarariye Intara y’Amajyaruguru muri Miss Rwanda. Yari ashyigikiwe bikomeye n’ubuyobozi bw’Intara, umuryango akomokamo ndetse n’abaturage bo muri aka gace bari barahigiye kuzamufasha agakora amateka akaba Nyampinga w’u Rwanda.

Yabaye igisonga cya kane anahabwa ikamba rya Nyampinga ukunzwe kurusha abandi (Miss Popularity) bishimangira uburyo yari ashyigikiwe cyane.

Umuhoza Sharifa ubwo yari atwite imfura ye
Miss Umuhoza yarushinganye na Niyonteze Thierry bari bamaze igihe bakundana
Umuhoza Sharifa yabaye nyampinga wagize igikundiro kurusha abandi mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza